Jalan peih samar Ban raya Ho Chi Minh - Mộc Bài (tinh Tay Ninh) lac sa dalam dom danak dak daok dalam harak angan njauk mek taneh piah patagok kinh te - xa hoi, bahrau hu UB Bhap bini Ban raya Ho Chi Minh ba tagok ka HĐ Bhap bini Ban raya Ho Chi Minh brei tapa. Danak dak tukvak ka 1 hu taong abih jien buh tame jaik 20.000 ty dong, brei mek labaih 200ha daok dalam 11 xa di huyen Củ Chi. Hu taong abih 1.877 baoh sang rahra gaok kan kandah kayua tavak tame danak dak. Kuhria tal bilan 1/2026, jalan peih nduac samar brei hu peih ngak.  

Pamong tal bruk pahadar 50 thun Harei peih paha tinh Binh Thuan (19/4/1975 - 19/4/2025) saong salam uan Nyaom roya Đảng bộ tỉnh mbang XV, vaktu 2025 - 2030, tinh Binh Thuan palih ruah 8 danak dak salam uan dalam nan hu 5 danak dak salah blaoh saong 3 danak dak birau padang ngak. Ini lac dom danak dak hu makna biak praong, oh lac ngak salih birau raidiuk bhap bini bo daok rik tame ngak brei pasiam tagok co so ha tang, jhul pakhang bruk cakrok patagok kinh te-xa hoi di tinh ini.

 Huyen Châu Thành A, tinh Hau Giang hu salah blaoh Danak dak brei oh daok baoh sang taik tahak. Ini lac labik pakat huyen akaok meti di tinh Hau Giang ngak hu salah blaoh danak dak ini. Piah ngak  njauk tukvak hu ba tabiak dahlau, yaok adit Mban pato tacei huyen brei kuhria iek veik piah pato tacei samu, daong dom baoh sang. Meng nan bruk ngak danak dak hu rilo kein lagaih, hu rahra njauk hatai glaong. Huyen hu jak ba dom bruk rik daong di rahra jaik 2 ti dong saong jaik 1.200 harei prein ngak bruk, rik daong padang saong pasiam sang daok ka rahra hu praong laneing lanoi, khang kajap.

Pambak tal bala apui khuah mbang rilo gilai ikan di urang nao tasik ban sit Vàm Láng, huyện Gò Công Đông, tỉnh Tiền Giang bo VOV hu khan brei thau di melam 23/3; jabat chức năng mboh lac, apui khuah oh njauk hagait tal manuac, min ngak khat lahik labaih 5 ti dong. Dalam tinh Tiền Giang  hu labaih 1.300 gilai taong chap ikan. Birau ini, kayua langik tasik pandiak hajan oh lagaih, yaom menyek  tagok glong, ikan mek hu tok takik yau nan ye mikva nao tasik gaok rilo kan ndah. Urak ini karja bhum palei daok kuhria sangka daong dom baoh hu gilai apui mbang.

Sang iek ruak Da khoa Cái Nước, tinh Ca Mau bahrau taong ruak ka sa urang njauk jru mek kayua mbang ikan nok. Tui khau tin meng akaok, ong T (umo 46 thun, daok di xa Phú Mỹ, huyen Phú Tân) ngak pandap mbang meng ikan nok. Hadei nan, ong T hu brei mboh dreih yau njauk ruak mek, ba tal bruk langek nan hu rahra ba tame sang iek ruak Da khoa Cái Nước cap cuu di kreh pandiak jala 24/3. Urak ini, anak meta ong T hu truh tapa kan kandah. Dalam bilan 3 bahrau blaoh, Sang iek ruak da khoa Cái Nước jeng taduan 4 urang kayua ruak mek ikan nok. Ruak mek ikan nok meda ba tal bruk metai. Di tinh Ca Mau jeng rah tabiak rilo mbang ruak mek ikan nok.

Gah Pablei salih Dunya (WTO) hu taduan harak Canada yak pathau Trung Quoc. Dalam harak đơn, Canada caong khin peih rilo mbang tacei ba langyah bruk meriak gauk dalam pablei salaih haong Trung Quoc di WTO ka bruk taong jien je ngan haong pandap pablei tame di Bắc Kinh ngan haong dom janih kaya nong, kaya ikan dalam ia di Canada. Tui hukum ba tabiak, WTO jaik peih dom mbang langyah di dua taneh ia ka asar kadha meriak gauk. Meyah dua gah hu njauk gauk, Canada caong khin brei padang kapol langyah karei ka bruk ini.

Danak dak “harak thị thực kanyik” di Tong thong Donald Trump hu peih tabiak kein lagaih “blei harak ngak rahra Mỹ” haong yaom 5 trieu dolla ka dom urang negar langiu hu kein lagaih. Jalan ngak lac dui pachreih bruk buh jien tame meng dom urang meda saong ba mai 1 ribau ty dolla piah patrun jien sraiy negar. Danak dak kuhria brei hu peih ngak dalam labaih 2 adit anak tal, gam tui Mentri Pablei salih Mỹ, 1 ribau kat kanyik hu pablei tok di dalam harei 25/3. Haong tanut yaom 5 trieu dolla, Kat Kanyik di Mỹ jeng sa dalam dom danak dak thị thực chiat jien abih dalam dunya.

Vien Y te Bhap bini taneh riya (INSP) di CHDC Congo khan lac tapa dom mbang dut iek ruak min camereip oh ka thau ruak hagait, ngak ka jaik 50 urang di Tây Bắc taneh ia ini metai, biak di nyu lac ruak la-ar dom. Dom ruak karei nan lac la-ar pandiak dalam rup, glaih glar, glaoh ta-ok saong trun kilo livang. Camereip, gah y te CHDC Congo medil lac metai kayua  ruak la-ar dom atau kaya mbang hu jru mek./.