Page ini 11.3, Uy mban Thuong vu Quoc hoi brei panuac ndom ka bruk kuhria iek veik Mbang Nyaom biai oh bhian mbang ka 9, Quoc hoi mbang ka XV. Akaok Quoc hoi Trần Thanh Mẫn ndom lac, Quoc hoi mbang ka XV hu nao tame sajarah haong bruk hu peih 8 mbang nyaom biai bhian haong 9 mbang nyaom biai oh bhian. Akaok Quoc hoi njauk caik hatai sangka, tukvak anak tal bruk ngak biak rilo. Brei peih ngak samu. Ramik radak kapul karja pakat xa anak tal lac pagam 60-70% dalam labaih 10.000 xa. Meng blaoh khol drei hu ramik radak labaih 1.000 xa saong dom huyen bo Uy mban Thuong vu Quoc hoi hu nyaom biai biak rilo mbang. Anak tal brei oh daok karja pakat huyen, blah pagam tinh…bruk ngak biak rilo.

Gah Pato tacei “Brei oh daok baoh sang taik tahak” tinh Kien Giang daok kham merat salah blaoh danak dak dalam bilan 6 anak tal, daong pasiam kein lagaih diuk rai ka baoh sang kan kandah ka sang daok. Kuhria tal abih thun ini, tinh daong padang bahrau 2.314 baoh sang, abih tih jien piah salah blaoh lac labaih 153 ty dong, daok veik brei patui veik jak ba jaik 52 ty dong. Tal tukvak ini, tinh hu taduan labaih 101 ty dong.

Meng ini tal harei 20.3, njom ia mbak di dom kraong di bhum taneran kraong Cuu Long tui jalan tagok glaong tui mbang ia tagok di ia bulan Po Rami bilan 2 saka ia bulan. Ia mbak njom tame 4 angaok sa ribau di dom pabah kraong praong yau Vàm Cỏ Đông haong Vàm Cỏ; Hàm Luông, Cổ Chiên haong kraong  Hậu meng 45 - 58 km… Njom ia mbak bilan thu thun ini di tanut glaong jang kuhria rah tapa di rilo thun min oh khang catang. Dom bhum palei brei samar drah padang pataom ia taba tuk ia tagok biar piah duh ka bruk pala drak saong dom bruk daok dang di rahra.

Nghe nhan Đàng Thị Lúa, palei Hamu Craok, danei angan haong dom pandap kaya lan am Cam siam gheih. Meng sit, sa-ai hu amaik pato bruk ngak saong samar drah thau tani tanat dom bruk ngak lan am. Di Harei pakacah ngak lan am Cam 2024, sa-ai mek hu yai Sa, brei mboh bruk ngak lab am di sa-ai. Urak ini, sa-ai Lúa haong adei kamei sa-ai tari taring ngak lan, ngak tabiak dom pandap lan am hu tuai damuai takre. Ong Đàng Chí Quyết, Akaok palei Hamu Craok, taong yaom glaong ka sa-ai Lúa oh lac neih gheih ka bruk ngak bo daok lac sa urang kamei kreih camin naih gheih, daong ba angan je lan am Cam nao tal grauk labik.

Baoh sang tong 140 thun di “patao iman lamen” Y Thu Knul daok di Buôn Đôn, Dak Lak, dui pachreih tuai damuai kayua kien truc karei saong yaom kaom sajarah. Y Thu Knul, urang hu ieu lac ong kei bruk iman lamen Tay Nguyen, hu padang baoh sang tui dreih Lào hu 3 gian pabung haluek. Baoh sang khik piah pandap kaya inem krung ka rai diuk Y Thu Knul, urang raong randap labaih 400 drei lamen. Buôn Trí, labik hu baoh sang, daok khik piah rilo drap ar ilamo karei, ngak jeng prein dui pachreih ka tuai damuai.

Karja Tong thong My Donald Trump hu ba tabiak sa ung dung bahrau brei ka urang panduan mai daok suan hukum “ta-eng panduan tabiak truh”. Tui nan meyah dom urang panduan mai daok suan hukum pilih bruk tabiak truh di My saong jeng meda daok hu kein lagaih panduan mai gilac njauk hukum dalam harei hadei. Daok meyah dom urang panduan mai daok suan hukum oh ta-eng panduan tabiak truh di My, dom urang nan njauk cap mek, tiaok tabiak saong oh hu gilac mai hu taneh ia My veik tra. Dahlau di nan tuk tagok ngak Tong thong, ong Donald Trump hu pagun sanya tiaok tabiak biak rilo urang panduan mai daok suan hukum tame negar My.

Tavak sraiy karja di Campuchia dalam thun 2024 daok di tanut labaih 12 ty USD. Njauk caik hatai sangka lac dalam thun 2024 Campuchia oh tok mek jien mesraiy bahrau halei meng Trung Quoc. Dahlau di nan thun 2023 Trung Quoc lac taneh ia brei mesraiy praong abih di Campuchia hu labaih 302 trieu USD. Han Quoc jeng sa taneh ia brei mesraiy praong abih di Campuchia dalam thun tapa, ngan haong labaih 264 trieu USD, hadei nan lac Japon hu jaik 253 trieu USD. (VOV)

Sa bruk njauk bala hu pambuak tal radaih bus pajeng tuai njauk pableik di jalan peih nduac samar di gah meraong negar Mexico ngak ka 18 urang metai saong labaih 20 urang njauk rambuas. Tui dom gah truyen thong bhum palei, bruk njauk bala ini rah tabiak tuk sa suh radaih bus pajeng tuai gaok kan kandah laik trun sa kaplah ceik dalam. Urak ini gah ngak bruk daok patui veik pasang iek duah thau ka bruk ini.