Yaok labik pakacah hu 3 balik pakacah piah caga song hu labik piah pandap di anek saih pakacah, atah di balik pakacah 25m

Labaih 1 triệu anek saih dalam taneh ia hu mbang pakacah tamat Trung học Phổ thông thun 2022 peih tabiak dalam 2 harei 7/7 song 8/7. Dalam nan hu labaih 80% anek saih hu mbaok tame pakacah, piah gam pilih ruah tamat THPT song gam pilih ruah tame đại học. Taeng TPHCM hu 158 labik pakacah tamat THPT song labaih 85.000 anek saih tame pakacah. Yaok labik pakacah hu 3 balik pakacah piah caga song hu labik piah pandap di anek saih pakacah, atah di balik pakacah 25m. Harei ni, dom anek saih pakacah hu pang quy chế song pasiam veik, pabak dom harak gar dok meluh atau kurang, labaih.

Blah khau tin COVID-19 biar harei 5-7 di Mintri Y tế brei thau, dom menuac njom bahrau daok tagok khang, rilo jang 304 urang duk haong harei dahlau di nan saong lac harei tagok khang di abih dalam adit jaik di ini, tui nan, abih tih menuac njauk ruak dalam harei tagok tal jaik 1.000 urang dalam taneh ia. Dahlau di nan, TP.HCM saong Hà Nội jeng brei thau lac hu menuac njaom biến thể BA.4 saong BA.5, lac biến thể hu prein njaom mbak samar saong meda lac makna ngak brei menuac njauk COVID-19 bahrau tagok khang jaik di ini.

Khaw tin meng pasak pasang iek ruak kik tỉnh Ðồng Tháp, meng akaok thun 2022 tal ni, dalam tỉnh hu labaih 3.600 urang ruak pandiak tabiak darah di 12 huyện, ban dalam tỉnh, tagok 417,9% dut song tuk vak ni thun 2021. Urang njom tagok glong abih di huyện Hồng Ngự song ban Hồng Ngự. Dalam tỉnh hu 6 urang metai, kayua ruak pandiak tabiak darah. Ðồng Tháp lac sa dalam 8 tỉnh, ban hu urang ruak pandiak tabiak darah glong, song lac sa dalam 3 labik hu urang metai glong di abih di gah merong.

UBND tỉnh Ninh Thuận bahrau hu sarak ka bruk pandar taneh thun 2022 ka ban Phan Rang - Tháp Chàm. Tui nan, tỉnh meda mek veik labaih 370 ha, dalam nan hu labaih 315 ha taneh ngak nong saong 54 ha taneh oh ngak nong. Jeng tui sarak ini, thun 2022, Ninh Thuận mek veik taneh di 66 danak dak padang ngak. Dalam dom danak dak padang ngak njauk mek veik taneh nan, hu dom danak dak hu mblang taneh praong yau ye: Labik đô thị bahrau Tân Hội (phường Thành Hải labaih 91ha), Labik đô thị bahrau Tây Bắc (phường: Thành Hải, Phước Mỹ labaih 91ha); labik mblang bein pasak jalan 16/4 (phường Mỹ Bình labaih 87ha)…

Pambuak tal bruk dom harei tapa, bhap bini rahra TPHCM dok dang atah cang ngak passpor, Thượng tá Nguyễn Đức Nghiệm, Phaok akaok jabat khik ramik xuất nhập cảnh (PA08), Công an TPHCM brei thau: Urak ni, oh ka hu passport pagam chip. Bhap bini jhui mehit urang ndom glai lac hu passport pagam chíp , bloh jak gauk nao ngak. Passport klak dok tuk vak pandar jeng daok hu nao mai yau dahlau.

Tui Jabat Y tế công negar Prang, mbang tamuh jit ruak bahrau daok pambak praong dalam taneh ia. Dom menuac njauk Covid-19 bahrau harei kabroi (05/7) lac labaih 200.000 urang, tui nan, dalam adit bloh, yaok harei hu labaih 120.000 urang njaom ruak. Dom menuac tame sang iek ruak kayua Covid-19 tagok labaih 17 rabau urang, dalam nan hu labaih 1000 urang ruak trak. Di ban Lyon, ban praong ka 3 di negar Prang, dalam yaok 2 urang nao dut iek ye hu 1 urang dương tính haong virus. Akaok Mintri Y tế bahrau di Prang, ong Francois Braun hu panuac lac taneh ia Prang daok yam tame mbang jit Covid-19 bahrau.

Mesup ni 6-7 (tuk vak Việt Nam), rilo hãng tin dunya hu khan lac Canada hu jeng taneh ia camereip phê chuẩn bruk ba Thụy Điển song Phần Lan tame NATO. Bruk phê chuẩn rah tabiak oh ka tal 2 harei , hadei di tuk sau ngoại trưởng 2 taneh ia ni tal trụ sở NATO di Bỉ piah peih bruk ginum biai song phê chuẩn tame NATO. Lambaok 30 taneh ia dalam NATO, hadei di nan hu mbaoh tangin tame sarak ba tame, peih jalan ka bruk phê chuẩn di dom taneh ia ni.

Tui dom urang ngak praong di Ukraine, harei 5-7, gah Nga taong tame dom labik dalam abih bhum Donetsk dalam harei. Mesruh gauk khang jeng rah tabiak di labik jaik taphia Lugansk haong Donetsk tuk Nga duah jalan daong ka dom đơn vị piah yam trun gah meraong. Tỉnh trưởng Pavlo Kyrylenko ieu bhap bini plaih nao labik karei saong ndom lac bruk panduan ba jaik 350.000 rahra daok di Donetsk lac bruk njauk ngak piah khik ka rahra plaih di metai lahik. Min bruk praong jang nan lac, ong tỉnh trưởng ni brei thau, tuk hu takik rahra daok gar veik, bol lin Ukraine meda pataom tame dom bruk praong yau ye khik caga dom ban sit saong pacang veik jalan nao di lin Nga.

Urang lang: Hani Pha & M. Phương – 06/07