Harei ini 28/6, labaih 1 trieu 200 ribau anek saih dalam negar tame pakacah harei akok meti, mbang pakacah tamat THPT thun 2023. Var page dom adei pakacah môn ngữ văn, tukvak 120 minit, ini lac mon cih vak ta-eng dalam pakacah tamat THPT. Biar harei pakacah mon toan vaktu  90 minit. Harei paguh 29/6, anek saih  ngak sa dalam tổ hợp Khoa học tự nhiên atau Khoa học xã hội di var page, Ngoại ngữ pakacah di biar harei. Mbang pakacah tamat THPT thun ini, dalam negar hu 63 Hoi dong pakacah, hu 2 ribau 272 anek saih ngan haong labaih  43 ribau duk bilik pakacah. Tanut pakacah brei hu brei thau di mong 8 harei 18 bilan 7. Labaih 100 sang bac đại học hu mek tanut pakacah nan piah brei palih ruah.

 Melam 27/6, UBMT Negar Việt Nam TPHCM hu peih mbang taom gaok, tadhau ayuh Mban lambaok rahra Islam Ban raya, 21 Sang magik, surau saong labik daok di rahra Islam pahadar Harei Raya Idil Adha tui saka Islam 1444 – thun 2023. Bruk ngak ini brei mboh bruk sangka, pachreih ba rahra urang Cam, dom urang tui agama Islam patui veik patagok dom ilamo meng kan siam gheih, halain hatain hu mbaok tame dom danak dak pakacah gauk anit ranam taneh ia. Tukvak urak ini, UBMT Negar Ban raya jeng hu jao paok jien bac ka 112 anek saih bangsa Cam lac sang kan kathaot, yaok adei lac 1 triệu đồng piah ba bui sambai saong daong prein ka dom adei dalam thun bac bahrau.

 UB bhap bini tỉnh Tây Ninh pambuak haong  Tập đoàn Sun Group birau jao brei Balai riyak papar sap Ceik Bà Đen ka Đài Tiếng nói Việt Nam. Ini lac sa dalam dom balai riyak papar sap praong di negar di Đài TNVN gah Meraong. Meng lagaih  hu labik glong jaik 1000 mét dut haong mbaok ia tasik, Balai hu riyak papar sap  siam chat luong glong di tỉnh Tay Ninh, meneing di dom tỉnh miền Đông, Tây Nam Bộ saong duh ka urang Viet daok ngak bruk haong diukrai pak di Campuchia. Dahlau di nan, Đài TNVN  hu ba Rayo papar sap Nam Trung Bộ di Bình Thuận, papar sap ka bhum tasik biển Đông saong dom tỉnh duyên hải Nam Trung Bộ.

Pasak roh duah ilamo Cam tỉnh Ninh Thuận daok peih adit parang iek dom dalikan inem krung ilamo puac Ariya Cam. Bruk ini hu parang iek yaok ratuh kadha thaot binguk tư liệu ka dom mbang ngak, puac Ariya di dalam rahra; papar phim yaih khan dom kadha Ariya Chăm angan je… di mbang ini, dom nghệ nhân hu khan brei thau dom bruk haduh hatai ka bruk mbuan lahik nao di dom kadha puac Ariya saong likau Ủy ban bhap bini tỉnh Ninh Thuận sangka jang tal bruk pato ka dom rai hadei inem krung ilamo ini ka tal ranaih umo saong abih di nyu nan lac jhul samar bruk pato sap Cam meng kan ka anek taco lac urang Cam.

 Meng akaok thun tal ini, di Ca Mau rah tabiak labaih 100 mbang glut jaleih taneh, kuhria atah abih tih labaih 3km. Jaik abih , dom labik glut jaleih hu ngak jhal, kandah tal bruk diukrai, sang danaok, drap ar di bhap bini, cakak dom jalan nao mai dalam palei ba tal kan nao mai, ngak bruk pala drak  di bhap bini. Anak dom bruk drah samar nan, UB bhap bini tỉnh Ca Mau likau T.Ư pasang iek, langyah, daong jien tapa prein di tỉnh, lac labaih 246 tỷ đồng piah langyah pasiam bruk brei ngak drah samar 33  labik glut jaleih.

Thủ tướng Lào Sonexay Siphandone bahrau jak ba rahra sa tangin haong gauk pacang caga pablei salih ma túy. Tui Thủ tướng Lào, ma túy lac sa dalam dom bruk pandiak di dalam xã hội saong lac sa dalam dom makna ba tal bruk taong paoh gauk, ngak suan adat hukum saong dom bruk ngak karei dalam rahra. Urak ini Lào daok gaok dom bruk ngak kanjak jhak meng ma tuy saong bruk ini mada pambak tabiak grauk labik, meng ban praong tal bhum palei saong bhum atah biyah ngan haong dom tanut karei di gauk. Dalam 6 bilan tapa, Lào taong tayah hu 1.734 vụ án ma túy, cap mek hu 2.635 urang gam haong rilo janih ma túy karei di gauk.

Mentri Du lịch Philippines brei thau panuac jak ba birau di dulich taneh ia ini, salih ka panuac klauk daok labaih pluh thun tapa. Tổng thống Philippines brei panuac birau “Yêu Philippines” meda brei mboh kỷ nguyen birau saong lac “ kim chỉ nam” ka gah dulich taneh ia ini. Panuac jak ba birau nan piah jhul pakhang bruk brei ka tuai damuai hu iek ma-in, salih birau brei siam gheih  labik rivang ma-in, yaih khan  dom pandap di bhum palei saong daong dom bruk ngak brei hijao. Chien dich hu payua tal asal kadha lac Philippines blaoh blai, caga ginup taduan raok tuai mai rivang ma-in jneg yau buh jien tame ngak mbang.

 Cao uỷ Liên hợp quốc di urang tị nạn brei thau lac, mayah mesuh oh padeih, dom urang njauk klaak Sudan piah nduac tapa dom taneh ia jaik taphia meda oh padeih di paka lac 1 trieu urang. Tui yaok pataom, bruk mesuh gauk tamuh tabiak di taneh ia châu Phi ini meng kreih bilan 4 bahrau blaoh ngak ka labaih 600 ribau urang njauk nduac tapa dom taneh ia jaik taphia; labaih 2 ribau 500 urang metai saong peih ngak ka sa mbang sarau kadau ngak pahla praong abih./.