Anak bruk tamuh jit ruak sởi tuk bruk njom mbak tagok 18 mbang, Mentri Y tế  daok pambuak bruk dak padang saong patabiak Jalan peih bruk klauk jru vaccine pacang caga jit ruak sởi di 18 tỉnh, ban ngan haong labaih 1 trieu mbang jru vaccine kayua Rajaei Úc daong. Meng akok thun mbiah tal ini dalam negar hu labaih 2.000 mbang urang njom ruak sởi, dalam nan di TPHCM hu labaih 500 mbang urang ruak saong 3 urang metai. Mentri Y te taong yaom lac mbuan tamuh jit ruak sởi di 63 tỉnh, ban saong brei peih bruk klauk jru vaccine di 100 huyen, ban sit di 18 tỉnh, ban mbuan tamuh jit ruak. Bruk klauk jru mbang ini peih pambak praong umo klauk vaccine sởi ka uranaih umo meng 1 tal 10 thun, langiu dom urang hu klauk ginup 2 mbang jru vaccine sởi.

Tỉnh Bà Rịa - Vũng Tàu  urak ini hu jaik 9.000 sang gam haong 26.000 urang di 38 bangsa takik, dalam nan rilo meng lac urang Low, Khmer, Tày, Nùng, Chơ Ro… daok pablak haong urang Kinh. Tukvak tapa, Bà Rịa - Vũng Tàu hu rilo sarak daong ka mikva urang bangsa takik, yau ye bruk buh brei labaih 634 tỷ đồng daong padang ngak, ramik pasiam sang daok, labik menei labik ruak tian, dui jalan nding raok ia pandar saong đien truac hadah tal sang, daong gah ilamu, pato megru, cakrok bruk ngak mbang, pathau khan adat hukum saong padang ngak hạ tầng, jalan mbak… Bà Rịa - Vũng Tàu daok kham merat tal abih thun ini, dalam tỉnh oh daok sang kan kathaot lac urang bangsa takik.

Tỉnh Lâm Đồng peih bruk jao brei Tu tapuk bhap bini ka 15 xã bhum urang bangsa takik di dom huyện Di Linh, Lâm Hà saong Đức Trọng. Yaok Tu tapuk bhap bini hu 270 baoh tapuk ngan haong dom kadha ka ilamo, padhih the thao, baoh sang, padang raidiuk ilamo di bhum palei; tapuk yaih khan  ilamo siam gheih  di baoh sang, palei pala dalam bhap bini bangsa takik, tapuk tacei pato ka bruk pala drak saong raong glang, patagok kinh te…Ini lac bruk ngak hu makna, rik tame jhul pakhang bruk jak ba saong padang ilamo bac tapuk dalam bhap bini bangsa takik tui dom asar kadha di Danak dak pakat negar 1719.

Piah klah rabha kan kandah haong anek saih huyện Tri Tôn - tỉnh An Giang anak thun bac bahrau, abih di nyu lac anek saih bhum urang bangsa Khmer, dom kapul ngak pahla dalam saong langiu tỉnh hu alin hadiah pandap, khan ao, radaih juak, pandap bac ta-a... piah daong prein dom adei nao tal sang bac. Kapul daong urang jaoh jo, urang ruak kan kathaot saong khik caga quyền uranaih huyện Tri Tôn hu jak ba dom urang ngak pahla di TP. HCM alin hadiah 235 pok pandap ka mikva urang bangsa Khmer saong anek saih kan kathaot, jaik si kan kathaot daok di xã An Tức. Dalam nan hu 100 pok brah,  135 pok pandap brei ka anek saih, hu: ba-lô, siphau, but, kalam saong pandap bac ta-a... kuhria tabiak yaom jien lac labaih 25 triệu đồng.

UB Mat tran negar Viet Nam tỉnh Bạc Liêu gam haong bhum palei hu mai rivang, pachreih ba saong daong 7 baoh sang  jaleih, par tabung kayua hangin ribuk. Dalam nan, 5 baoh sang par tabung  saong khut tayak meng 30 tal 80% saong 2 baoh sang jaleih abih.  Dom baoh sang nan, lac sang urang kan kandah saong biak kathaot.  Akok UBMT negar tỉnh Bạc Liêu Trần Văn Út hu tangin sua, jak ba dom baoh sang saong alin brei jien jaik 80 trieu dong meng Kadung jien Daong pacang caga  bala meng langik tasik piah daong ka dom baoh sang khut tayah nan.

Nyaom biai Robot Dunya 2024 daok peih tabiak di ban ine Bắc Kinh, Trung Quốc, hu mbaok labaih 400 chuyên gia. Tapa nan hu yaih khan tal urang maong iek labaih 600 vi mạch robot bahrau abih. Ini lac bruk hu peih tabiak yaok thun kuhria meng di thun 2015. Bruk njauk caik hatai hu parang tabiak di nyaom biai lac robot thaik thaok menuac urang meda ngak hu dom “biểu cảm” mbaok meta di anek menuac, sau robot atau robot ngak ahar crepe. Trung Quốc daok hu dalam tangin labaih 190.000 bằng sáng chế pambuak tal robot, meblah 2 dalam 3 dom bằng sáng chế angaok dunya.

Thượng viện Philippines harei 21/8 brei thau website di jabat ini njuak kol kanjiak jhak tame mek du lieu, dom tai lieu brei tabiak pandar yau harak vak veik dom mbang ginum biai, bien ban dom mbang ginum biai di Thượng viện…Nyaom an ninh mạng “Deep Web Konek” khan lac kol kanjiak jhak nyu tame he thong “Share Point”, labik khik piah dom harak tai lieu “nhạy cảm”. Dom urang ilamu an ninh  mạng brei thau, oh lac ta-eng Philippines bo taong abih Đông Nam Á daok dang anak bruk kan kandah angaok mạng daok tagok rilo.

Hajan praong gam gam dalam dom harei tapa ngak brei ia dauk dalam di dom tỉnh gah brak Thái Lan, abih di nyu lac tỉnh Nan, Chiang Rai saong Phayao. Hu thau, tỉnh Nan lac labik njuak trak di abih haong yaok ratuh palei, xã di 8 huyện daok njauk ia dauk. Hajan khang ngak brei ia kraong tagok samar, nduac tame dom labik daok saong taneh ngak nong, ba tal dauk di rilo labik praong. Menuac sia dalam palei brei thau lac meng kan mai urang oh ka bhian mboh ia dauk khang yau nan./.