Ini lac thun bac hu makna biak praong kayua lac thun bac akaok meti danak dak pato bac pho thong birau hu peih ngak bak abih meng tal 1 tal tal 12, jeng lac thun kak kajap haong taong abih gah dalam bruk ngak brei jayak dom sarak di Đảng. Dalam tuk tame thun bac birau, Tong Bi thu, Akok negar Tô Lâm payua harak thư ka gah Pato megru. Dalam harak thư Tong Bi thu, Akok negar vak lac: “Dalam tuk chreih chrai di thun bac birau, dahlak jia lac dom adei anek saih, sinh vien, hoc vien meda kham merat bac megru, pasram, pang taduan saong ngak po ilamo, piah pabak hu dom ilamo jak jeng, ngak hu dom caong khin praong piah daong dak padang taneh ia dak harei dak siam mekre, kaya meda, haniem phol”.

Ndom ka bruk ngak pap uranaih di Mái ấm Hoa Hồng (Quận 12, TP.HCM), 85 uranaih di Mái ấm Hoa Hồng hu gah chức năng ba mai raong di Pasak daong bruk xã hội công lập di Sở Lao động, Thương binh saong Xã hội. Pak ini, dom uranaih hu pasang iek prein yava, rup pabhap, abih di nyu lac dom uranaih njauk taong paoh, ngak pap. Ong Nguyễn Tăng Minh, Phaok Yam ndok Sở Lao động, Thương binh saong Xã hội TP.HCM brei thau, ini lac bruk ngak suan hukum biak trak damak ka quyền di uranaih. Bruk nan daok hu UBND Quận 12 tacei pato gah công an duah thau, ngak brei cambaih laih.

Hadei di sa tukvak atah trun gam gam, birau ini taneh pala tabau di Trà Vinh hu tagok veik. Urak ini, urang ngak nong hu trun pajaih labaih 1.200ha, min oh ka pabak hu prein ngak bruk di sang mac ngak saradang di dalam tỉnh. Kayua yau nan ye, piah pachreih urang ngak nong peih praong taneh pala tabau saong ngak tabiak hu kein laba, bilan tabau 2024-2025, Kong ty Co phan Tabau saradang Trà Vinh brei buh jien tame veik labaih 15 tỷ đồng oh mek laba, piah urang ngak nong blei pajaih, khak drak, bayar jien pah urang…tal tuk kaoh tabau meng bayar ka kong ty.

Gah chức năng tỉnh Bạc Liêu bahrau duah mboh jaik 2.700 baoh tapuk giáo khoa yau ngak ja. Dahlau di nan, tuk pasang iek 2 nhà sách di ban Bạc Liêu saong ban sit Giá Rai, urang jakar mboh hu 2.682 baoh tapuk giáo khoa, tapuk bài tập ka oh hu kiểm duyệt, mboh yau ngak ja tapuk di Nhà xuất bản Giáo dục Việt Nam.  Gah chức năng hu ngak biên bản bruk nan ngan saong po 2 cơ sở, brei mek khik taong abih dom tapuk ini piah langyah tui adat hukum.

Dalam 4 harei padei le Quoc khanh 2/9, gah yulit dalam negar taduan raok tuai labaih 3 trieu mbang mai rivang ma-in, tagok 20% dut saong tukvak ini thun 2030. Dom tuai dunya hu mai tal dom bhum palei hu ralo labik ma-in yulit di Viet Nam hu patagok. Cuc Yulit Viet Nam taong yaom, mbang padeih le Quoc khanh thun 2024 tamat ngan haong rilo bruk jak jeng siam mekre daok patagok veik. Tuai yulit dalam negar patui nan hu tagok glong, yulit dunya jeng daok tagok veik. Ini lac dom bruk biak lagaih patagok di gah yulit dalam 3 bilan puac thun 2024.     

Rajaei Thái Lan brei tapa rilo jalan ngak kayua Mintri Pablei salih ba tabiak piah pacang bruk pablei salih kaya pandap negar langiu suan hukum, daong dom doanh nghiệp Thái Lan meriak gauk haong dom kaya pandap meng negar langiu tame, yaom lap, daok hu pablei biak rilo di darak pasar, abih di nyu lac kaya pandap mai meng Trung Quốc. Dalam nan, brei ngak catang jang bruk pasang iek di dom bilai pasang iek hải quan, patagok bruk tui iek online, ieu dom doanh nghiệp pablei salih điện tử negar langiu tut angan pháp nhân di Thái Lan, saong brei ngak njauk tui dom tiêu chuẩn pak ini.

Tui Gilang pariak dunya, hu tal 400 trieu anek saih di dunya oh hu nao sang bac kayua langik pandiak kuhria meng thun 2022. Langik kan kndah ngak jhak tal bruk pato pakai di dom taneh ia, abih di nyu nan lac dom taneh ia jien mek tame takik. Tui kuhria rah tapa, anek saih di dom taneh ia ini lahik 18 harei yaok thun dut saong 2,4 harei  di dom taneh ia kaya meda jang tuk langik pandiak oh lagaih. Harak pathau khan jeng brei mboh lac, sa uraniah umo 10 thun dalam thun 2024 yam tapa dom mbang ribuk rilo jang 3 mbang, rilo mbang pandiak jang 5 mbang saong rilo mbang pandiak khang jang 36 mbang dalam luac thun diukrai.

Lin padam pui Braxin hu jak jeng dalam bruk ngak brei trun meneing sa bruk khuah glai praong tamuh tabiak dalam 2 harei tapa di glai negar, ngak brei 20% mbaok tane glai khuah ralai abih mbong. Bruk khuah nan meda kayua menuac urang am cuh. Glai negar Braxin lac labik khik ramik langik tasik atah labaih 5 rabau 600 ha glai, khik pacang dom baoh craoh lac labik pabak 70% ia taba ka ban ine ini. Labik glai khuah nan jeng hu kaoh tak klaak jaik meteh di thun 2022 piah mek labik ka cakrok patagok đô thị./.