Dah page ini (29/12), UBND TP.HCM peih ngak Danak dak padang ngak Nút giao thông An Phú, ban Thủ Đức, abih tih jien buh tame labaih 3.400 tỷ đồng. Danak dak praong meng 10 - 12 jalan radaih, binah hầm hu 4 jalan radaih, dom mbaik tatua yaok binah 2 jalan radaih. Binah nút giao thông karei hu padang ngak 3 tal, dalam nan hu gam: labik nút giao jalan ba tagok cao tốc TP.HCM - Long Thành - Dầu Giây ngan haong jalan Mai Chí Thọ. Ini lac danak dak hu caong lac meda daong patagok bruk pambuak ban raya haong jalan cao tốc TP.HCM - Long Thành - Dầu Giây, daong trun manieng bruk gar jalan di dom pabah jalan gah Timun.

Liên đoàn Lao động tỉnh Bình Dương pambuak bruk haong dom pakat công đoàn, dom gah pambuak tal peih ngak danak dak “Sruh radaih  Xuân anit ranam” daong vé radaih ka urang ngak gaok kan kandah hu nao palei mbang Tết, haong yaom jien abih tih labaih 20 tỷ đồng. Dalam nan, alin hadiah 5.000 vé radaih pui nao mai ka urang ngak gaok kan kandah nao palei mbang Tết saong mai veik Bình Dương ngak bruk hadei di Tết. langiu di danak dak ini, công đoàn dom pakat daok hu alin hadiah 2.700 vé radaih ka urang ngak nao palei mbang Tết.

 Tui Sở Lao động, Thương binh saong Xã hội tỉnh Tiền Giang, yaom jien thuong di tuk Tết dương lịch tui kuhria di dom doanh nghiệp lac labaih 1 triệu 1 rituh ribau đồng sa urang. Jien thuong Tết nguyên đán tui kuhria lac labaih 7 trieu 6 rituh ribau dong sa urang, glaong jang yaom thuong di thun dahlau. Dalam nan yaom thuong glaong abih lac 85 triệu đồng sa urang. Langiu di nan dom doanh nghiệp jeng hu daong pandap tết, phiếu blei pandap, daong jien radaih, alin vé radaih ka urang ngak. Abih di nyu nan lac, thun ini Liên đoàn lao động tỉnh hu peih 3 melam “Daoh tamia raok Tết haong urang ngak”.

Kayua urang blei hadang that rilo di puac thun, ngak ka yaom hadang di miền Tây tagok glaong. Di tỉnh Cà Mau, hadang janih 20 drei tame sa kg yaom 205.000 đồng/kg, tôm thẻ janih 60 drei /kg yaom meng 115.000 – 120.000 đồng kg. Yaom hadang tagok lac bruk bui sambai ka urang raong hadang, gam haong nan, daong ka mikva jhul khang bruk pasiam danao palao raong vụ bahrau, hadei di tukvak atah gaok kan kandah kayua jit ruak, jien raong hadang tagok galong. 

Tha bilan jaik di ini, ĐBSCL hu dom sruh jit ruak aih traoh pabui châu Phi sit sot, jabat chức năng hu kakei dom baoh sang raong glang njauk caik hatai tal bruk pabak ralaow pabui ka Tết Nguyên đán daok jaik mai tal. urak ini dalam taneh ia, daok 32 xã di 11 tỉnh ban hu sruh jit aih traoh pabui châu Phi ka oh tapa 21 harei. Min, bruk mbuan tamuh veik saong njom mbak dalam tukvak anak tal daok glaong, abih di nyu nan lac di tukvak pablei salih, pajeng ba pabui pabak ka bruk blei mbang tagok glaong di tuk puac thun mayah oh ngak catang dom jalan pacang caga jit ruak.

Dom danak dak daong “tukvak praong” di Afghanistan urak ini njauk padeih veik hadei di lệnh pakauk di karja Taliban ngan saong dom urang kumei ngak gah cứu hộ saong tapa nan rilo bruk daong karei meda brei padeih tui. Dalam sa panuac brei thau di Liên Hợp Quốc saong dom jabat daong praong pakat dunya hu ndom cambaih, bruk hu mbaok di urang kumei dalam pabak pandap daong lac bruk oh salih karei hu saong brei hu patui veik, ieu karja Taliban salih veik sarak di drei. Liên Hợp Quốc jeng hu panuac lac, ini meda lac bruk cagar veik akaok meti di dunya anak dom bruk oh njauk di Afghanistan, brei mboh bruk cagar veik lệnh pakauk bahrau di karja Taliban ngan saong urang kumei.

Meng harei 5/1/2023, Mỹ ba tame pandar dom jalan pacang caga jit ruak COVID-19 ngan haong yaok urang tuai mai meng Trung Quốc. Tui nan, tuai meng umo 2 thun tagok mai meng negar Trung Quốc, Hồng Công atau Ma Cao meda hu ieu brei hu dut iek mboh âm tính haong COVID-19 dua harei dahlau di tuk par tal Mỹ. Bruk ngak ini di Mỹ piah patakik dom tuai damuai meda gaok ruak COVID-19 tagok sruh kapar haoh tal Mỹ, gam tui di nan piah urang jakar y tế hu tukvak piah ngak cambaih saong thau jang ka dom janih biến thể bahrau meda tamuh tabiak.

Hu takik di abih 40 urang metai saong njauk rambus dalam bruk pui khuah di melam 28/12 di 1 Casino dalam ban Poipet, tỉnh Bon Tia Miên Chây, Campuchia, jaik jalan tapen negar haong Thái Lan. Tuk pui khuah, gah dalam sang hu jaik 400 menuac daok ngak bruk. Dalam harei ini, gah chức năng jeng daok duah dom urang njauk bala saong yaok pataom dom khat lahik./.