Dalam 4 bilan akaok thun ini, Việt Nam hu ba labaih 48.300 urang nao ngak bruk di negar langiu. Tapa nan brei mboh lac, ba urang nao ngak bruk di negar langiu dak harei dak tani tanat saong cak rok patagok gilac veik. Mintri Lao động, Thương binh saong Xã hội daok jhul tagok bruk pambuak gauk piah peih praong dom darak pasa bahrau, rilo kein laba jang. Jalan tabiak negar langiu ngak bruk ka urang ngak dak harei dak hu peih praong, patagok rilo pilih ruah ka urang ngak hu hatai caong, abih di nyu nan lac di dom darak pasa hu jien mek tame glaong.

UBND TP. Cần Thơ bahrau peih pakak tatua Cờ Đỏ saong tatua Tây Đô, daok dalam 2 danak dak jalan mbak nao mai praong di TP Cần Thơ tukvak 2021 - 2025. Tatua Cờ Đỏ daok angaok jalan tỉnh 919, nao tapa ban sit Cờ Đỏ, haong yaom jien buh tame ngak jaik 133 tỷ đồng. Tatua Tây Đô labik akaok di jalan tỉnh 923 pak ban sit Phong Điền, labik puac pambuak tame jalan tỉnh 926, xã Nhơn Ái, hu ngak haong yaom jien labaih 225 tỷ đồng. Dua baoh tatua hu ngak salah hu daong pasiam palagaih bruk nao mai di jalan radaih, pambuak pagam dom jalan tỉnh 919, 922 saong 926.

Pasak daong ka dam dara urang ngak saong Urang ngak ranaih umo tỉnh Bình Dương bahrau peih bruk ngak lakhah brei saoh ka 6 yau diuk pasang daok atah palei gaok kan kandah. 6 diuk pasang hu ngak lakhah haong gauk nan, urak ini daok ngak kong nhan dalam tỉnh, raidiuk biak kan kandah, yaom lac hu anek blaoh min oh hu jien piah ngak lakhah. Tapa bruk ngak ini, Pasak daong ka dam dara urang ngak caong hu yam takai nao gam haong dam dara urang ngak dalam padang mbang, dak padang raidiuk trei sir, haniem phul.

Tỉnh An Giang bahrau peih tal pato pasram paglaong ilamu quốc phòng saong an ninh ka 100 ong hakim, na-ib, tuan tuan, urang pan bruk agama Islam daok dalam tỉnh. Tal pato pasam piah paglaong ilamu ka dom ong hakim, na-ib, tuan tuan, rik daong tame bruk jak ba, pathau khan, pato pakai abih gauk ngak siam bruk di rahra dalam khik caga siam mekre, sron mbon, salamat puk palei, daong palagaih ka puk palei patagok KTXH, ngak siam 2 bruk praong lac dak padang saong khik caga khang kajap taneh ia Việt Nam XHCN.  

Di ĐBSCL, bruk glut jaleih bilan thu bahrau kandang joa ye dom mbang hajan akaok bilan rahtabiak ngak ka bruk glut jaleih rahtabiak veik. Huyện Trần Văn Thời, tỉnh Cà Mau hu mboh 10 labik glut jaleih bahrau, patagok dom labik glut jaleih tal 718 labik, dalam nan glut jaleih lac 385 labik. Xã Khánh Hải lac sa dalam dom labik gaok trak damak abih abih di bala glut jaleih, atah abih tih jaik 4km. Bruk ngak pasiam veik dak harei dak kan kandah jang saong ngak ka raidiuk di mikva di dom puk palei tapen kraong biak glaih glar di tukvak urak ini.

Triều Tiên brei thau, bruk ngak iek hạt nhân di Mỹ ba tal dom catang tagok bahrau ka bruk pakacah gauk gah vũ trang hạt nhân dunya, gam haong nan, brei thau lac mada ngak dom bruk njauk ngak piah patagok prein khang di drei. Dahlau di nan, gah An ninh Hạt nhân negar Mỹ hu peih bruk ngak iek jaik tal tanut giới hạn di labik ngak iek daok di Nevada piah pataom mek dữ liệu piah daong bruk njauk caik hatai jia saong siam lagaih di akaok siu hạt nhân.

Tỉnh bang Ontario pak Canada hu sa uranaih ruak uranaih metai kayua ruak ndaih baoh, brei mboh urang metai camriep kayua virus njom pambak ini dalam labaih sa piluh thun tapa. Dom urang roh duah ilamo ka jit te học saong bác sĩ hatai baoh brei thau, ini lac bruk cuang kandah biak trak damak. Tuk dom urang klauk jru vacxin pacang caga ruak daok bier, mbuan ba tal bruk tamuh tabiak ruak ndaih baoh meda tagok rilo yau kol drei bhian mboh. Piah pacang caga ruak dalam rahra, Canada njauk khik tani tanat bruk klauk jru di tanut 95%. Min, bruk klauk jru urak ini tui kuhria daok trun, dom bhum labik hu manuac klauk jru pacang caga tok mala 50%.

Gah khau tin saong dom urang ngak praong dang akaok Iran khan lac Tổng thống Ebrahim Raisi haong 8 urang karei metai dalam bala laik kapal haoh trực thăng di labik tapen negar Azerbaijan di biar harei kabroi (19/5). Tổng thống Iran Ebrahim Raisi thun ini umo 63 thun, tagok pan karja meng bilan 8/2021. Tui Hukum negar Iran, Tổng thống Raisi tantu palang lahik, quyền pan akaok taneh ia lac dalam tangin Tổng thống kayua sa UB đặc biệt dang tabiak./.