Rajaei kham merat tal abih thun ini brei padang ngak birau, pasiam veik  hu abih tih 153.000 baoh sang oh daok taik tahak dalam negar. Mbiah tal tukvak ini, dom bhum palei hu padang ngak birau saong pasiam veik hu labaih 50.000 baoh sang dalam abih tih 153.000 baoh sang yau birau ndem blaoh nan. Rilo bhum palei hu dom jalan ngak sami samar piah ngak hu bruk di danak dak. Ban raya HCM urak ini daok 325 baoh sang kathaot, baoh sang jaik kathaot kurang sang daok, ban raya kham merat ngak salah baoh sang birau ka 325 baoh sang nan dahlau harei 30 bilan 4 kuhria abih tih phun jien jaik 16 ti dong.   

Tinh Trà Vinh daok kham merat ngak pasiam ribong ba ia dalam mblang hamu piah pakhang bruk pacang caga pandiak bhang tua riya, khik caga phun mbang baoh, njam patam saong padai bilan dong xuan. Mbiah tal ini, dalam tinh Tra Vinh trun padai pajaih  dong xuan hu jaik 62.000 ha. Yau nan min, ia mbak kuhria mboh 1 angaok ribau njom tame dalam taneh labaih 40km, min brei njuk pruh ia tame hamu, kareik sir kajap pabah ribaong pacang ia mbak saong peih karik dom brong ba ia tabiak mblang hamu  di Tra Vinh hu ginup ia.

Njom ia mbak di tinh Kien Giang daok rah tabiak ngak kandah ralo tal bruk ngak nong pala drak. Dahlau di nan, akaok bilan 2, ia mbak tagok glong ba tal yaok pluh ha padai di huyen Chau Thành palai pajua. Piah caga bruk pandiak bhang tua riya, Chi cục Ribaong kraong Kiên Giang peih dom pabah kraong: Cái Lớn, Cái Bé, Xẻo Rô piah caga ia mbak, khik ia taba lagaih haong bruk rah tabiak tui harei bilan pala drak yaok labik. Gam haong nan, brei beik ar birau, ngak kajap 29 ar binek tui 2 bilan pala drak piah khik caga padai saong ginup ia pandar ka bhap bini.

UB bhap bini tinh Binh Duong daok ngak dom bruk quy hoach parabha  tui 1/2.000 ka Labik jitvu jirah rivang bein sinh thai, padeih padei saong ma-in siam gheih abih di kaoh pulao Tha La, binek ia Dầu Tiếng, huyện Dầu Tiếng. Kuhria abih tih taneh ba tame quy hoach jaik 458 ha. Labik ini hu quy hoach ngak Labik jitvu jirah rivang sinh thai, padeih padei saong ma-in sambai pakat glong. Tui kuhria mboh dahlau taduan raok dalam harei meng labaih 37 tal 61 ribau manuac. Bruk padang quy hoach  ini  piah ngak siam dom bruk patagok bruk yulit jeng yau khik caga alam moi truong, drap ar alam dalam tinh ini.

Ramưwan oh lac piah hu taom mbaok abih gauk dalam baoh sang bo daok pachreih tuai damuai, urang roh duah ilamo mai duah thau. Urang bangsa Cam daok di tinh Ninh Thuan saong Binh Thuan  danei angan  hu dom bruk ngak meng kan lavik mai mukkei caik rai yau ye menyim khan bai njik dahlah, palei lan am Hamu Craok Bau Truc saong rilo rilo ilamo siam gheih yau Roya Kate. Langiu di nan, urang Cam daok hu pandap mbang biak ralo janih bingi karei oh labik halei hu yau tapei nung, lisei manuk, ahar girong laya, girong arieng, tapei choh. Thun ini, urang Cam uan raok Ramưwan biak bui baiy, ginup kaya.

Kuhria pambuak tui langik tasik di Vien Roh duah Thien van hoc saong Dia vat ly Taneh ia, bilan Ramadan di urang Islam tame meng harei 1/3 paguh page di Ai Cập saong jaik abih dom taneh ia Ả-rập. Tui adat meng lavik dahlau mai, bilan Ramadan  iek tui ia bulan mblo tabiak, adat ini hu nga tui meng yaok rituh thun paje. Meyah  mboh ia bulan mblo tabiak harei tuk ia harei tame ceik, lac tuk tame akaok bilan Ramadan, bilan ka 9 tui saka Islam. 

 Gah Y te Dunya kham khik hu bruk ngak brei samar chip y te  dunya pacang caga ruak dau mua khi, kayua urang njom ruak tagok rilo saong jit ruak njom mbak ralo labik. Gah Y te Dunya khan brei thau bruk taong paoh gauk rilo jang di gah Pur Cộng hòa Dân chủ Congo ngak kandah bruk pacang ruak, kan padam hu jit ruak. Meng thun 2024 mbiah tal ini, hu labaih 21.000 duk iek mboh urang ruak, dalam nan hu 70 urang metai, ralo di Congo.

Dalam harei pauc di roya Maha Kumbh Mela di urang Hindu pak Ấn Độ, labaih 15 trieu urang hu mbaok tame taco rao hacih sa-at likau ma-ah tapa bruk menei ia po, dalam ia di 3 baoh kraong praong nan lac kraong Hằng, kraong Yamuna saong kraong Saraswati di bang Uttar Pradesh, gah Barak Ấn Độ. Yau nan ye, hu abih tih  663 trieu urang  hu mbaok tame  roya biak praong di thun ini, glong jiak dua mbang bhap bini Mỹ. Ini lac adat praong ngak tui agama di Ấn Độ, hu peih ngak 12 thun meng hu sa mbang./.