Kuhria tal tuk 17 harei kabroi 27/8, tukvak tamat tut tangin online tame bac mbang sa, dalam negar hu labaih 551 ribau anek saih tut angan tame bac di dom sang bac đại học, sumu 81,87% dut saong anek saih hu palih ruah tame angaok He thong daong palih ruah anek saih, tagok labaih 1% dut saong thun dahlau. Yaom lac, harei kabroi meng tamat tukvak tut ngan online tame bac, min rilo labik pato megru đại học hu brei ngak harak ka anek saih tapak di sang bac.  

UBND TP.HCM hu tabiak panuac brei thau ka jit ruak sởi. Ini lac mbang camriep pak TP.HCM tabiak panuac brei thau ka jit ruak sởi saong lac labik camriep dalam rilo thun ini mai tabiak panuac ka jit ruak ini. Tukvak tamuh tabiak jit ruak lac bilan 8/2024 rahtabiak di dalam ban, makna lac kayua vi rút sởi ngak tabiak. UBND Ban raya jeng caik hatai peih ngak dom jalan langyah pacang caga jit ruak. Gam tui di nan meda peih bruk klauk jru vaccine pabak sởi - rubella yaom lac dahlau di nan jeng hu klauk vaccine ini ka abih tih uranaih meng umo meng 1 tal 5 thun daok di Ban raya. Dom urang ruak soi jeng tagok saong hu 3 uranaih ruak soi metai.

Tukvak ini, urang ngak nong tỉnh Hậu Giang daok blei ikan pajaih mai palao raong cang tuk ia ndik palao ikan tame hamu raong. Dahlau diah, di dom bhum taneh dhong di tỉnh Hậu Giang yaok mbang ia ndik tagok, urang ngak nong bhian klak hamu saoh. Dom thun jaik di ini, mikva pandar hamu dhong ia dauk  piah raong ikan saong ba mai kein laba glong. Hadei di labaih 3 bilan raong palao, kaoh abih jien buh tame ngak, urang ngak nong mek jien laba tame 12 trieu dong tal 15 trieu  đồng sa ha. Langiu bruk ngak kinh te, bruk raong ikan  di hamu daok rik daong tame ngak brei rilo siam mekre ka taneh. 

UBND tỉnh Trà Vinh bahrau peih pakah Harei Vu lan Thắng hội huyện Cầu Kè thun 2024; gam haong nan, brei thau harak di Akaok Mintri Ilamo, Thể thao saong Du lịch brei angan Harei ini lac Inem krung ilamo oh mboh di mata pakat negar. Vu lan Thắng hội hu peih ngak di bilan 7 saka ia bulan yaok thun, lac harei ilamo adat cambat siam gheih ndung bak ilamo meng kan di urang Low, harei ini jeng lac harei le hoi di rahra dom bangsa Kinh-Khmer-Hoa di pak ini. Harei ini daok brei mboh talei rohim jumparaom gauk kak kajap haong gauk meng lavik mai meng di tuk dak padang puk palei; rik tame dak padang bruk jumpataom gauk dalam bangsa hu siam gheih, khang kajap.

Sóc Trăng brei ngak salah Danak dak MERIT saong pok tagok likau Rajaei mboh tangin brei pabak phun jien labaih 863 tỷ đồng, ngak brei salah ribaong kraong, brei ramik labik daok ka bhap bini tapen tasik. Dalam danak dak nan, tỉnh Sóc Trăng brei pataom tame  patagok dom ribaong kraong ka dom labik  sit piah pacang caga dom bruk kan kandah kayua BĐKH. Yau ye, bruk padang ngak ar pacang meda khik caga hu dom labik daok di bhap bini saong labik pala drak plaik njiak bruk glut jaleih taneh, ia tasik tagok saong mbuan ba tal ia dauk pambak praong. Danak dak oh lac khik brei salamat  ka bhap bini bo daok khik bruk pala drak  jeng yau bruk ngak mbang di tỉnh anak bruk langik kan kandah kayua BĐKH.

Ndang Kayua taneh ia Thái dang akaok liên minh pan quyen urak ini brei thau, ndang Palang Pracharat thân quân đội meda oh hu mbaok tame lien minh pan quyen anak tal. Tui kuhria, Nội các bahrau di Thái Lan meda hu pathau khan di puac bilan ini piah ka rajaei bahrau meda ngak bruk meng akaok bilan 9. Liên minh pan quyen ba tabiak jalan ngak lac njauk samar drah padang Nội các bahrau piah ka rajaei meda hu tame ngak bruk tui bruk ba tabiak di Hukum negar.

Mentri Y te - Lao động Nhật Bản brei tabiak Tapuk mbong patih Y te - Lao động Nhật Bản 2024. Tapuk mbong patih thun ini hu angan ieu lac “ Bruk salamat di jalan sahaneng”, dalam nan hu khan  lac, kayua bruk diuk rai eng sa drei tagok rilo  gam haong bruk cakrok patagok khang kajap di ky thuat so saong dom bruk kan kandah kayua daok atah di gauk tuk hu jit ruak COVID-19, dom ruak jalan sahaneng dak harei dak trak, urang njauk brei taong ruak chip tagok samar. Yau nan ye, Tapuk mbong patih Y te - Lao động Nhật Bản 2024 kakei lac: “Njauk padang ngak jalan daong pakat negar piha pacang dom ruak jalan sahaneng dak harei dak rilo gam haong bruk salih karei di xa hoi manuac sia”.

Hu tame bac di Sang bac kanja oh abih jien hu taong yaom lac biak kan kandah ngan haong rilo baoh sang daok pak Jakarta di negar Indonesia tuk dom sang bac kanja ka oh pabak ginup labik bac di anek saih. Jakarta hu labaih 10 trieu manuac, hu abih tih 8.868 sang bac. Min, tok hu labaih 2.000 sang bac kanja oh mek jien ka anek saih. Urak ini, Indonesia hu jalan pato magru oh mek jien di dom sang bac kanja piah tani tanat quyen bac magru di anek saih. Jakarta ba tabiak jalan ngak lac rami ramik ka anek saih kan kathaot tui bac oh abih jien di 1.000 sang bac tư thục dalam thun 2025./.