Tui khaw tin meng Mentri Pato megru, kuhria tal mon 5 biar harei 30/7, lac tuk padam blah website tut ngan online, He thong daong palih ruak di Mentri Pato megru hu abih tih labaih 733 ribau anek saih hu tut angan palih ruah tui hatai caong khin, sumu 68,5% dut saong anek saih hu tut angan pakacah tamat THPT thun 2024. Thun 2023, hu labaih 660 ribau anek saih hu tut angan palaih ruah angaok He thong, sumu 65,9% dut saong anek saih tut angan pakacah tamat THPT thun 2023.

Kapul urang kumei Việt Nam pambuak haong Tỉnh ủy Trà Vinh bahrau peih Mbang nyaom baai "patagok bruk ngak di urang hu angan je, halau janeng, dom urang daong bruk dalam dom agama, manuac urang hu angan je dalam bruk pathau khan, jak ba bruk peih ngak samu gauk di urang likei saong urang kumei pak bhum mikva bangsa takik saong bhum ceik” bhum gah maraong negar. Di mbang nyaom, PGS.TS Đặng Thị Hoa, Quyền akaok Viện Tâm lý, Viện Hàn lâm Khoa học xã hội Việt Nam brei thau lac, bhum gah maraong negar yaom lac ka oh hu bhum biak kan kandah, min di bruk ka oh samu gauk di urang likei saong kumei daok ndaong tagok 3 bruk, nan lac bruk bac magru, bruk hu mbaok tame dom bruk ngak chinh tri atau bruk kanja, saong bruk ka klau nan lac labik dang dalam xã hội. Kayua yau nan ye, dom halau janeng glaong jang saong abih di nyu nan lac bac bruk ngak, bac piah hu ilamo dalam. Gam tui di nan, pato sap bangsa rilo jang ka uranaih kumei.

Tapa ngak iek padai bilan he thu 2024 di ban Cần Thơ di Danak dak 1 trieu hecta padai asar siam saong tathuak nerak biar kayua Mentri Ngak nong saong Patagok palei pala brei mboh, kuhria abih tih jien buh tame ngak hu trun labaih 10 tal 15 % dut saong bruk ngak dahlau diah; khak drak trun 30% khak ndam, trun meng 2 -3 mbang pruh jru khik caga phun pala; patak pataom ia pruh labaih 30 -40%. Padai yuak hu 10,5%. Kein laba  bruk ngak iek glong jang  meng 1,3 -6,2 trieu dong sa ha. Trun meng 2 tal 12 tấn CO2/ha dut saong bruk ngak iek. Abih di nyu, rilo doanh nghiep hu sanya blei veik abih padai barah ngak tabiak meng bruk ngak iek nan.

Meng thun 2021 tal urak ini, tỉnh Đồng Tháp hu padang ngak saong ba tabiak 2 Sarak, 3 Quyet đinh saong 6 Jalan ba tabiak pambuak tal Sarak jhul samar bruk peih ngak; padang ngak rilo danak dak, bruk ngak daong pambuak haong rahra peih bruk ngak mbang yau ye Danak dak “mbang radaih peih bruk ngak mbang bhum Taneh caraih”; “Start up tour”, “Labik pagul Doanh nhan”. Urak ini phun jien meng Kadung jien negar ka langyah bruk ngak hu daong ka labaih 200 dam dara, ngan haong labaih 2 ty 8 rituh trieu dong. Tinh jeng khik tani tanat bruk ngak hu lagaih Kadung jien daong dam dara peih bruk ngak mbang, daong ka 10 danak dak hu pasang iek brei masaiy jien, ngan haong paok jien lac 1 ty 7 rituh trieu đồng.

UB bhap bini tỉnh Bình Dương daok caong khin dom đơn vị samar ngak salah dom bruk daok veik di Danak dak Sang iek ruak Đa khoa tỉnh Bình Dương di quy 3 thun 2025. Danak dak Sang iek ruak hu 1.500 gaiy laneng ndik iek ruak hu caong khin lac sa dalam dom pasak y te dang akok di bhum. Yau nan min, hadei di rilo thun peih ngak, danak dak  oh ka hu salah, ngak haduh hatai manuac sia. Urang ngak praong tỉnh Bình Dương khan lac, danak dak nan hu ngak salah bruk padang ngak labaih 93% tui pambuak bruk min gaok rilo kan kandah, tavak tavaiy dalm tuk peih ngak, oh ka sumu tukvak ba tabiak.

Tui sa pasang iek bahrau, amuk Kamala Harris urak ini hu menuac pachreih tui rilo jang Tổng thống Joe Biden atau  Tổng thống dahlau deih ong Donald Trump di yaok tukvak dalam bruk pilih ruah thun 2024. Tal urak ini, Phó tổng thống hu taduan bruk pachreih tui ginup di dom urang dalam Mbang nyaom roya dalam taneh ia di Đảng Dân chủ piah ka amuk hu hu jeng ung vien tổng thống thun 2024 di đảng, gam haong bruk pachreih tui di dom urang pan akaok danei angan yau ye Tổng thống dahlau deih ong Barack Obama, dua diuk pasang Tổng thống dahlau deih Bill Clinton.

Kuhria tal biar mesup 30/7 hu takik abih lac 107 urang metai saong jaik  130 urang njuak rambuac dalam dom mbang glut jaleih taneh di bang Kerala, sa dalam dom labik dulich danei angan abih di bhum gah meraong Ấn Độ. Bruk jaleih taneh rah tabiak  tuk jaik abih  dom urang njauk rambuac lac urang ngak kong bein te saong baoh sang di urang daok ndih dalam dom labik daok tam. Urak ini, rilo urang daok lahik, yau nan min, gah daong urang gaok bala daok gaok rilo kan kandah kayua jalna mbak khut tayak, ba tal rilo labik daok di bhap bini njauk cakak abih.

Thủ tướng Anh Keir Starmer hu nao pasang iek labik rahtabiak bruk taong paoh meng to sa harei dahlau di nan pak Southport, gah barak bhum England, ngak ka 3 adei metai saong 7 urang njauk rambuac trak. Bruk ini rahtabiak di tal bac yoga saong chat tamia ka ranaih meng umo 6 tal 11 thun. Urang medil lac urang dam umo 17 thun, njauk cap khik kayua eng drei pametai manuac. Urak ini, gah chuc nang daok pasang iek, ngak cambaih bruk ini./.