Cục Khik iek lao ndong negar langiu (Mentri LĐ, TB saong XH) brei thau, dalam 7 bilan thun ini, urang ngak Viet Nam nao ngak bruk di negar langiu tui harak pambuak bruk lac labaih 85.000 urang. Dalam nan Nhật Bản  lac darak pasar  dang akok taduan urang ngak Viet Nam, ngan haong 41.139 urang. Dalam dom thun  jiak ini, Nhật Bản tuk halei jeng lac darak pasar taduan rilo urang ngak di abih, kayua ini lac darak pasar mbuan ngak bruk, jien mek tame glong saong peih tabiak rilo bruk ngak ka urang Viet Nam. Patui di nan lac dom negar yau ye: Đài Loan (Trung Quốc), Hàn Quốc, Trung Quốc, Singapore, Hungari saong dom negar karei karei.

Sở Pato magru TPHCM bahrau brei thau ka bruk anek saih nộp harak gar pilih ruah pabak tame tal 10 công lập thun bac 2023-2024. Tui nan, tok hu labaih 1.000 anek saih nop harak gar pilih ruah Pabak, meblah 4,9% dut saong abih tih 20.300 anek saih laik tal 10 công lập. Hadei di tuk tamat blaoh mbang pilih ruah pabak, Sở pato magru TPHCM meda pamaong tame bruk pilih ruah pabak piah roh duah jalan pilih ruah tal 10 lagaih ka thun bac hadei. Tui jalan ba tabiak, harei 12-8, dom sang bac THPT meda khan brei thau angan anek saih hu pilih ruah pabak tame tal 10 công lập.

Urak ini, tỉnh Đồng Tháp hu 357 pandap hu brei angan pandap di Danak dak Yaok sa xã sa pandap ( OCOP) mek hu 3 patuh, 4 patuh saong 1 pandap 1 patuh lac asar caraih bluh thu di Công ty Nam Huy Đồng Tháp. Dalam nan hu labaih 50 pandap OCOP ngak meng caraih. Meng blaoh, tỉnh Đồng Tháp hu xac lap ky kuc dunya 200 pandap mbang ngak meng sen caraih, piah pok meyaom bingu caraih, patagok ilamu – kinh te ka dom pandap ngak meng phun caraih. Pamong tal  bruk patagok gah pandap ngak meng caraih Đồng Tháp patagok bhum taneh ngak tabiak padap sen pataom sa labik tal thun 2025 ngan haong taneh praong 1.350 ha.

Piah caga ngak patrun patakik dom khat lahik kayua bala langik tasik, tỉnh Ninh Thuận daok kham merat peih ngak dom jalan khik kajap siam mekre ka dom danak dak thủy lợi, caga dom jalan pacang caga bala langik tasik. Dalam nan, UBND tỉnh ieu kakei dom so, dom gah, kapul, bhum palei paglaong bruk ngak di drei dalam pacang caga bala langik tasik, ribuk ia sua tui jalan ngak lac “pacang caga dahlau, peih ngak samar drah, pasiam veik samar, siam lagaih” saong ngak tui jalan “4 di labik” piah patakik di abih dom khat lahik piah khik caga ka rahra.

 Di huyen Cái Bè, tỉnh Tiền Giang birau rah tabiak glut jaleih praong, ngak 6 baoh sang  jaleih abih trun kraong Tiền. Jaik labik glut jaleih daok mboh hu taneh tapen kraong ra-ai talah mbuan glut jaleih veik, jaik jaleih tal rilo sang daok  di bhap bini. Urang ngak praong di UB bhap bini huyen Cái Bè mai rivang, pachreih ba, camereip daong ka yaok baoh sang gaok bala 5 trieu dong. Meng akaok thun mbiah tal ini, di huyen  Cái Bè  rah tabiak 36 labik glut jaleih atah labiah jiak 6km.

Urang ngak praong di Liên hợp quốc ka dom bruk di châu Phi taong yaom bruk mesuh gauk tamuh tabiak meng kreih bilan 4 di Sudan meda pambak praong tabiak taong abih dom bhum taneh di negar ini. Tui urang ngak praong di Liên hợp quốc, oh hu jalan ngak halei karei  meda salih hu ka bruk yam tal jalan chính trị tapa ginum biai piah langyah bruk mesruh gauk. Dom bruk mesuh gauk dui atah jaik 4 bilan tapa di Sudan ngak ka jaik 4.000 urang metai; 4 triệu urang njauk klak sang danaok nao plaih di bala.

Thủ đô Jakarta di Indonesia daok dang kaok angan ban njom nerak tachrauk abih di dunya. Tui Công ty Chất lượng khong khi Thụy Sỹ  Iqair, Jakarta hu labaih 10 trieu bhap bini, hu mboh njom nerak tachauk khong khi ngak jhal tal prein yawa yaok harei. Bruk ba tal njom nerak tachrauk nan kayua dom radaih, sauk cong nghiep saong dom sang mac nhiet điện dang. Dahlau di nan thun 2021, Tổng thống Indonesia iew Mentri Y te saong ban Jakarta brei ba tabiak dom jlan ngak suai lavik piah pasang iek nerak tachrauk. Yau nan min, bruk nan oh hu hagait karei.

Viện Khí tượng Cuba brei thau lac bilan 7 bahrau blaoh lac bilan pandiak  abih di taneh ia kaoh pulao Caribe ni meng thun 1951. Nhiệt độ tui kuhria di Cuba dalam bilan dahlau lac 29,1 độ C. Njauk caik hatai nan lac, bilai kuhria mboh dahlau bruk langik tasik di gah Timun Granma tagok tal 39 độ dalam harei 22/7. Nhiệt độ mbaok ia tasik jeng tagok jang vil val bhum tasik Caribe saong bhum nhiệt đới Đại Tây Dương, ba tal bruk hu rilo ribuk nhiệt đới jang mbiah tal bilan 11. Dom jabat pasang iek kuhria mboh dahlau lac Cuba meda gaok 13 mbang ribuk dalam bilan ribuk thun ini./.