Ong Nguyễn Văn Nên, Ủy viên Mintri Chính trị mai hu mbaok harei peih mbaok thun bac bahrau

Labaih sa ribau sang bac meng pakat mầm non tal THPT di TP.HCM harei ini hu peih mbaok thun bac bahrau thun bac 2022-2023. Di sang bac THPT Lê Quý Đôn, Quận 3, ong Nguyễn Văn Nên, Ủy viên Mintri Chính trị, Bí thư Thành ủy TP.HCM, mai hu mbaok harei peih mbaok thun bac bahrau ngan haong jaik 1.700 anek saih di sang bac. Dalam thun bac ini, gah pato magru TPHCM meda paglaong bruk mbeik drei tame dunya, peih praong bruk pambuak gauk haong dom gah dunya, ngoại giao, dom kapul pato magru dunya. Gam haong nan jeng paglaong bruk bac sap Anh ka urang pato saong urang bac,ba mai sa labik pato sap Anh dalam dom labik pato magru. Pachreih hu anek saih, sinh viên dunya saong gru pato, giảng viên dunya bac megruusaong pato pakai.

Gam song dom sang bac dalam taneh ia, di harei peih thun bac bahra, anek saih di dom sang bac di bhum tanreran krong CL hu pang hara thư tadhau yut thun bahrau di akaok negar song di puk palei. Thun bac ni, sở pato megru dom tỉnh ,ban bhum tanren krong CL hu kuhria caga ginup dom pandap panda, sang bac; gam song nan, brei bruk ka kapul urang gru pato di dom pakat bac gam song dom jalan ngak karei karei, piah duh ka bruk pato song bac dalam tukvak bahrau .

 Rik daong haong puk palei sangka ka anek saih kan kathaot yam tapa kan kandah, Bộ đội Biên phòng tỉnh Bình Phước hu ba tabiak Danak dak “ anek raong di bộ đội” saong “Daong ka adei nao tal sang bac”. Yaok đơn vị bộ đội taduan daong raong takik di nyu 1 anek raong saong daong jien bac ka 5-10 kamuan. Taeng di Đồn Biên phòng pabah mbang tapen negar dunya Hoa Lư, rilo thun ini mai hu taduan raong 1 kamuan tal umo 18 thun. Akaok thun bac ini, kapul jeng hu jao ka jaik 3.000 baoh siphau, kadung bak ka anek saih gaok kan kandah.

UBND tỉnh Đồng Tháp bahrau batabiak bruk patagok gah pandap cariak tal thun 2025. Dalam nan, Đồng Tháp batabiak tal thun 2025, patagok bruk ngak tabiak pandap cariak ngan song taneh prong labaih 1.400 ha, tui kuhria mboh hu labaih 1.148 tấn. Pataom tame roh duah, jhui samar danak dak ngak iek 100 ha bhum pala di Tháp Mười piah batabiak hu pajaih cariak lagaih song taneh riya, peih prong bruk ngak. Gam song nan, peih bruk cấp mã số bhum pala pagam song duah thau ka asal di pandap panda ka dom bhum cariak .

Bahrau ini, huyện Tân Phú saong Định Quán di tỉnh Đồng Nai hu peih bruk daong ka mikva bangsa takik gaok kan kandah di pak ini. Dalam nan Jabat Bangsa huyện Tân Phú hu nao rivang, jao alin hadaih ka 4 sang bangsa takik gaok kan kandah, ngan haong abih tih paok jien jaik 16 triệu đồng. Jabat Bangsa huyện Định Quán hu jak ba 35 paok pandap alin ka urang kan kathaot, sang gaok kan kadha, kuhria tabiak yaom jien lac labaih 11 triệu đồng. Langiu di nan, huyện daok alin ka 5 urang angan je dalam mikva bangsa takik, yaok paok yaom 500 ribau đồng.

Urang brei panuac di Mintri Thống nhất Hàn Quốc brei thau, taneh ia ni duah jalan payua harak thư cong pandar Triều Tiên batabiak panuac khan dahlau di tuk tathuak ia meng dom binek jiak tapen negar 2 taneh I, tuk sa ribuk khang dok mai tal palao kaoh Triều Tiên. Min, Triều Tiên oh ndom cambaih hu taduan panuac cong pandar ni halei oh.

Thủ tướng Ukraine brei thau, taneh ia ini meda hu taduan 5 tỷ Euro (4,98 tỷ USD) jien daong meng Liên minh châu Âu (EU) dalam adit ini. Paok jien daong ini lac paok daong piah padang veik kinh tế, pakhang bol bala Ukraine saong caga pacang ka bilan laar anak tal. Urak ini Ukraine daok abih jien padai saong daok kham marat duah jien daong meng EU, Mỹ saong dom gah brei masaiy jien dunya.

Nhà Trắng hu panuac pandar Quốc hội buh tabiak samar 22,4 tỷ USD ka kadung jien pacang caga jit COVID-19 anak bruk jit ni mbuan rah tabiak gilac veik song 3,9 tỷ USD ka dom kham merat piah pacang cakak  đậu mùa khỉ. Dahlau di nan, rajaei liên bang brei padeih danak dak dut iek COVID-19 brei saoh ka bhap bini Mỹ kayua kurang phun jien./.

Urang lang: Thu Thao & Hani Pha – 05/09