Tuk hu jien, bruk padang sang bac di Labik tái định cư Lộc An - Bình Sơn hu jhul samar. Tui kuhria dahlau akok thun 2024 taong abih sang bac hu ngak salah, ba tame pandar. Urak ini Labik tái định cư Lộc An - Bình Sơn hu yaok ribau urang padang sang, paduan mai daok. Kayua jaik abih dom sang bac oh ka salah yau nan ye thun bac ini, anek saih  daok dalam labik daok meda hu gah chức năng brei radaih taduan raok nao bac megru di dom sang bac jaik taphia.

Akaok negar dahlau daih lac ong Trương Tấn Sang bahrau jao jien daong ngak pasaim veik sang bac Trung học Cơ sở Nguyễn Văn Bộ saong jao jien bac ka anek saih sang kan kandah daok di xã Tân Phước Tây, huyện Tân Trụ, tỉnh Long An. Sang bac Trung học Cơ sở Nguyễn Văn Bộ hu 7 duk bilik bac haong 546 anek saih, 29 gru pato, daok mbaih mbaoh saong caong hu pabak pandap panda piah duh ka bruk pato saong bac. Langiu di nan, meng bruk daong di Gilang pariak Việt Nam Thịnh Vượng, ong Trương Tấn Sang hu jao 50 sruh radaih juak brei ka anek saih sang kan kandah, bac ta-a naih joi saong 100 triệu đồng brei Kadung jien bac di sang bac.                                    

Tỉnh An Giang hu 20 urang jakar Kapol urang kumei lac urang bangsa takik saong 42 akaok dhar kapul urang kumei lac urang bangsa takik. Piah rik daong peih ngak hu siam  bruk pathau khan  dalam kapol nyaom urang kumei bangsa takik di bhum taphia negar, Kapol urang kumei tỉnh An Giang daok patui bruk salih birau saong paglong bruk pathau khan tapa rilo jalan ngak, asar kadha lagaih haong bhum palei, bangsa. Langiu di nan, Kapol nyaom pakhang bruk haong gah chức năng pambuak tal dom danak pathau khan meng sap di bhum palei piah peih praong bruk hu thau khaw tin tal urang kumei bangsa takik.

Urak ini dalam taneh ia hu labaih 3.000 amuk mbuai palei hu bac megru. Piah hu jeng amuk mbuai palei, yaok urang brei tapa tukvak bac megru takik di abih lac 6 bilan tui asal kadha pato pakai di Mintri Y tế. Meng ilamu hu pato pakai saong hu ngak di dom sang iek ruak, amuk mbuai palei meda iek glang urang amaik tuk metian saong ndih tapui, daong mbuai tuk menek, mboh hu dom ruak kik di urang amaik saong anek kamar. GS.TS.Trần Văn Thuấn, Thứ trưởng Mintri Y tế brei thau, amuk mbuai palei lac tangin pambuak atah oh kurang hu di Bilai Y tế xã di dom bhum kan kandah, abih di nyu lac dalam bruk iek glang prein yava urang amaik saong uranaih.

Festival Ao bà ba - Hậu Giang 2023 meda hu peih tabiak dalam 3 harei meng 29/9 - 1/10 anak, di ban Vị Thanh. Ini lac mbang akok meti Festival Ao bà ba hu peih tabiak di tỉnh Hậu Giang. Kadha praong di Festival Ao bà ba mbang ini, lac Danak dak parang iek ao bà ba, parang iek thaot binguk ao bà ba memg kan mai ini. Dalam nan  hu bộ duah pataom ao bà ba ngak meng khan bai rak panaih Cầu Đúc, gam tơ tằm kayua  dom urang nghe thuat menyim tơ tằm di Bảo Lộc (tỉnh Lâm Đồng) saong Nha Xá (tỉnh Hà Nam) parang iek di mbang ini. Ini lac bruk ngak biak hu makna, pamedeih tagok dom ilamu  meng kan  saong lac bruk palagaih piah Hậu Giang pambak praong dom ilamu biak gheih karei  di bhap bini gah Pei negar, ngak jeng rilo kadha pachreih tuai damuai  mai bhum taneh phuong Nam.

Brei panuac di Nyaom biai pakat glaong kapul dom taneh ia Đông Nam Á (ASEAN) - Mỹ mbang ka 11, Phó Tổng thống Mỹ Kamala Harris ndom lac, Washington hu sanya suai lavik haong bhum Đông Nam Á saong praong jang lac bhum Ấn Độ Dương - Thái Bình Dương. Amuk Harris ndom lac ASEAN daok di labik pasak dalam sanya di Mỹ ngan saong bhum Ấn Độ Dương - Thái Bình Dương, gam haong nan ndom lac meta maong di Mỹ saong ASEAN ka bhum taneh ia hu bruk pambuak gauk biak catang.

Harak mbao New York Post (Mỹ) brei thau lac uranaih likei 6 bilan dut mboh ruak COVID -19 hadei di tuk pandiak saong patuh dalm sa harei. Bac si brei jru favipiravir ka uranaih nan menyum. Favipiravir hu mentri Y tế Công cộng Thái Lan mbaoh tangin brei pandar di thun 2022 ka uranaih njom COVID-19 hu dom janih ruak meng jhol tal mbiah. Bruk njuak tatuak drei nan lac, labaih 18 tuk hadei meng menyum jru, dua gah meta jhuk di uranaih salih tapa sambo jao hadah. Dom urang ilamu  oh ka thau cambaic laic jru favipiravir ngak salih sambo mau min medil lac “meda kayua jru, asar salih karei di nyu yau dom asar karei di jru yau titan dioxide saong sắt oxide kanjik katam”.

Nga saong Myanmar hu pambuak veik dom mbang par tapak di dua taneh ia hadei di 30 thun brei padeih. Yau nan, Myanmar urak ini lac taneh ia ka 38 hu jalan par tapak tal Nga. Hãng thông tấn TASS di Nga ba panuac meng Jabat Pajeng ba Jalan kapal haok Liên bang Nga brei thau, mbang par camereip abih di Hãng kapal haok pakat dunya Myanmar hu par tal ban Novosibirsk di harei 5/9 meng blaoh tui njauk tukvak ba tabiak. Tui panuac khan, bruk pambuak veik dom mbang par hu daong palagaih ka urang Nga caong khin nao padeih padei, ravang me-in di Đông Nam Á. Tapa nan jeng hu daong cakrok dom bruk pambuak gauk ngak mbang, pablei salih./.