Lambaok urang dang akaok tỉnh Bình Thuan birau peih bruk padang kapol urang jakar nao rivang saong tadhau ayuh Tết Uan padai birau di urang bangsa Raglai, K’ho daok di 4 xã bhum ceik, bhum glong dalam huyen Bắc Bình nan lac: Phan Lâm, Phan Sơn, Phan Điền saong Phan Tiến. Meng kan mai, harei 14-15 bilan mat tui saka ia bulan yaok thun, urang dom bangsa takik di 4 xã bhum glong ngak yang Uan raok padai birau. Uan padai birau lac harei Tet hu makna praong, ndung bak rilo ilamu siam gheih di bhap bini Raglai, K’ho dalam tỉnh. Dahlau daih, padai apuh lac pandap mbang di urang Raglai, K’ho. Yaok bilan padai bhian dui atah 6 bilan saong yaok mbang yuak blaoh, ba padai tame sang blaoh, mikva peih bruk ngak yang padai.

Ủy ban MT negar Việt Nam TPHCM bahrau peih danak dak sangka Tết thun sak tapai 2023 ngan haong kadha “Xuân jum pataom - Tết anit ranam.  Meng sami samar dalam bruk pambuak gauk, Ban Thường trực Ủy ban MT negar Việt Nam TPHCM haong dom kapul peih bruk sangka Tết thun sak tapai 2023 ngan haong 39.188 paok pandap, yaom meng 1-2 triệu đồng sa urang. Langiu di nan, daok hu labaih 20.500 paok pandap (yaom mala 1 triệu đồng sa paok) hu jak ba meng dom doanh nghiệp. Abih tih phun jien sangka pakat ban hu yaom tui kuhria lac labaih 43,36 tỷ đồng.

Akok UB bhap bini tỉnh Hậu Giang birau alin brei bằng khen ka 40 baoh sang ngak siam bruk dân số,  ndih tapui dua urang anke lac kumei. Dalam 5 thun tapa, Hau Giang  hu jaik 1.700 diuk pasang ngak siam hu meyaom pakat tỉnh, huyen. Ini lac bruk ngak hu meng ngak siam bruk pakacah gauk ndih tapui dua urang anek, meyaom  diuk pasang ndih tapui ginup dua urang anek kumei. Hau Giang lac sa dalam 21 tỉnh, ban dalam negar ndih tapui takik anek. Thun 2022 hu 1,44 anek sa urang amaik, biar jnag dut saong bruk ba tabiak ndih tapui anek lac 2,1 anek sa urang amaik tal thun 2030.

UBND tỉnh Kiên Giang bahrau brei thau bruk ba tame pandar khau tin langyah dom harak gar hành chính saong pambuak pagam cơ sở dữ liệu negar ka rahra. Ong Nguyễn Lưu Trung, Phó akaok UBND tỉnh Kiên Giang khan lac, bruk pambuak hu jak jeng cơ sở dữ liệu negar ka rahra hu makna praong dalam bruk dak padang dom hệ thống khau tin cak rok patagok rajaei điện tử tỉnh. Gam tui di nan, bruk ini jeng daong salih jalan khik ramik, peih ngak dữ liệu rahra meng tangin tapa ngak bahrau, rik daong salih bharau jalan ngak harak gar hành chính tỉnh dalam tukvak anak tal.

Tapa labaih 1 bilan padang ngak, mbiah tal ini brong pacang ia di akok ribong Nguyễn Tấn Thành (xã Bình Đức, huyện Châu Thành, tỉnh Tiền Giang) ngak hu 20% bruk ba tabiak. Brong akaok ribaong kuhria abih tih labaih 460 tỉ đồng meng kadung jien karja. Tui bruk ba tabiak, danak dak hu ngak salah di thun 2024 ngan haong brong pacang ia hu ngak meng betong cot thep; pabah brong ngak meng thep, kareik tau peih meng xilanh thủy lực. Ini lac danak dak  pacang halau ia praong ka 2 di bhum taneran karong Cuu Long. Tuk ngak salah, danak dak ini padang ia taba, pacang ia ndik, khik ia taba brei ka bruk pala drak abaih 12.000 ha bein phun mbang baoh di tỉnh Tien Giang.

Rilo ban praong di Trung Quốc jeng daok glaih glar haong dom urang tame sang iek ruak tagok glaong tuk jit COVID-19 daok di tabung glaong. Dalam tuk nan, bruk jit COVID-19 mbuan pambak mai palei dak harei dak khang tuk dom urang meng ban praong mai palei mbang tết dui atah 40 harei. Kayua yau nan ye rilo tỉnh ban di Trung Quốc hu peih dom jalan ngak piah pasiam veik dom tavak tavaiy di y tế bhum palei pala, daong khik dahlau ka urang taha. Dalam nan padang dom kapul bác sĩ nao tal yaok baoh sang piah daong ka urang ruak daok taong ruak, brei saoh dom paok jru taong ruak COVID-19 ka rahra daok di puk palei.

Mỹ meda ba tabiak ngak tui dom jalan pacang caga meng tuk jit COVID-19 piah pateok urang meng Cuba, Nicaragua saong Haiti tame Mỹ suan hukum tapa jalan taphia negar Mexico. Yau nan min, Mỹ brei adat yaok bilan hu 30 ribau urang meng 3 taneh ia nan saong Venezuela tal Mỹ tapa jalan kapal haok. Bruk nan lac kham merat di Mỹ  piah pacang hu ralo urang abih  daok duah jalan tame Mỹ. Tổng thống Mỹ sa mbang tra  iew QH Mỹ brei tapa jalan salih birau ka bruk di cư taong abih gah./.

Brei panuac di Harei rija meng kan “Ahar klau patao” di điện Élysées, Tổng thống Fance Emmanuel Macron brei thau dom kan kandah ngan haong po ngak ahar meng tangin meng kan, abih di nyu nan lac bruk tagok yaom di năng lượng hu tukvak tagok meng 5 tal 10 mbang dut saong dahlau deih. Tui urang dang akaok negar France, ini oh lac bruk di po ngak ahar meng kan bo daok lac kan kandah di 2/3 dom doanh nghiệp sit hu mala 10 urang ngak di urak ini./.