Mentri Ngak nong saong Patagok palei pala birau hu harak payua UB bhap bini tỉnh Tây Ninh iew tacei pato brei langyah catang dom bruk pajeng ba, pablei salih pajaih athur raong, pandap athur raong blei tame dauk, oh thau cambaic asal di nyu meng halei mai. Dalam nan, iew karja palei pakhang bruk pasang iek, pacang caga dom bruk pajeng ba suan hukum, blei tame dauk pajaih athur raong, pandap ngak pajaih athur raong tapa negar tame Viet Nam, abih di nyu lac di dom pabah mbang negar, jalan sit di bhum taphia negar. Bruk pasang iek, pacang caga blei dauk tame pajaih athur raong  lac bruk hu makna praong kayua nyu ngak kan kandah tal bruk cakrok patagok taphon athur raong saong pasang jit ruak di negar drei.

Akaok UBND tỉnh Cà Mau hu tacei pato jabat chức năng ba tangin tame duah thau bruk urang blei salih blei padai oh biyar jien ka urang ngak nong. Dahlau di nan, rilo rahra daok pak xã Khánh Bình Tây Bắc (huyện Trần Văn Thời) brei thau lac pablei padai hè thu meng bilan 7 thun 2023 ka urang blei salih. Tui taneh sit atau praong bo hu sang pablei padai ka urang blei salih meng yaok piluh trieu dong tal labaih 100 triệu đồng. Min, tal urak ini hu sang taduan hu meneing jien, hu sang ka oh hu biyar jien. Urang blei salih urak ini oh daok di palei, rahra jeng oh taom gaok hu.

Hadei di sa tukvak kandang jua, birau ini hu urang mai duah blei kruac bung kanduh hijao di dom bein pak tỉnh Bến Tre. Yaom kruac bung janih 1 blei di bein meng 23.000- 25.000 đồng sa kilo. Daok janih baoh praong meng 1,2 kilo tal 1,5 kg daok hu urang blei meng 35.000 - 40.000 đồng/ kg. Tui dom urang blei kruac bung, urak ini dom kong ty daok kham merat blei pataom kruac bung janih sa piah pablei tabiak negar langiu. Yau nan min, baoh kruac bung daok biak takik, abih di nyu lac kruac bung piah pablei tabiak negar langiu. Bến Tre  urak ini hu jaik 6.000 ha taneh pala kruac bung.  

Di Long An, labaih 360 sang rahra saong 1.700 ha taneh ngak mbang, pala drak njauk kan kandah kayua bruk glut jaleih ar takai kraong Vàm Cỏ Tây - di xã Mỹ Thạnh, huyện Thủ Thừa. Labik glut jaleih atah 260 mét, dalam nan hu 2 baoh sang be tong khang kadang. Urak ini tame bilan hajan, ngan haong dom mbang hajan biak khang ngak theik, jaleih takai kraong. Oh lac di Long An bo rahra di dom bhum takai kraong pak dom tinh, ban karei di gah Pai negar jeng mboh lac mbuan glut jaleih kayua jalan ia nduac, abih di nyu nan lac di dom baoh pulao atau dom labik kraong hu jalan ia nduac oh tani tanat.

Page ini 28/5, nyaom gru pato saong anek saih di sang bac Wuoc te Viet - Uc di TP.HCM hu nao rivang saong alin pandap ka anek saih sang bac Tiểu học Lâm Sơn A saong bhum bhap bini Cam di palei Cang - Lương Tri, xã Nhơn Sơn, huyện Ninh Sơn, tỉnh Ninh Thuận. Nyaom hu alin brei 8 baoh tivi, 5 baoh komputer ka sang bac piah pato saong bac. Gam haong nna, hu alin brei 20 paok jien bac ka anek saih hu raidiuk kan kandah saong 357 paok pandap  ka anek saih di sang bac. Langiu di nan, alin brei 5 drei limo ka 5 baoh sang urang Cam kan kandah saong alin 10 got gom dien jalan pandar meng ia harei ka xã Nhơn Sơn.

Tên lửa jhul ba vệ tinh trinh sát Malligyong-1-1 hu cuh nao di melam 27/5 meng labik Mblang cuh Vệ tinh Sohae pak huyện Cholsan, tỉnh Bắc Phyongan, Triều Tiên cuh oh jeng. Tui Hãng Thông tấn negar Triều Tiên (KCNA) tapa pasang iek, dom urang ilamo taong yaom lac makna di bruk nan, lac kayua khut jamraik oxy janih ia sarau haong xang bahrau hu cak rok. Dom urang ilamo brei thau lac, daok brei pasang iek piah thau dom makna ba tal bruk nan.

Dom urang njauk ruak ung thư kalik di Anh lac rilo di abih kuhria meng dahlau mai, haong 20.800 urang tui kuhria hu dut iek ruak dalam thun ini. Tapa langyah brei mboh bruk patagok urang ruak ung thư kalik meda hu mboh di umo thun karei di gauk, min tagok rilo abih di urang umo labaih 80. Jabat Roh duah Ung thư  Vương quoc Anh khan lac, jaik 17.000 urang u ác tính di kalik yaok thun meda pacang caga hu, haong jaik 9/10 urang lac kayua gaok bức xạ tia cực tím UV biak ralo.

Labaih 7.900 urang daok jaik labik glut jaleih taneh biak trak harei  24/5 di Papua New Guinea daok hu paduan ba nao daok di labik karei, kayua huac lac daok hu dom mbang glut jaleih taneh patui veik. Jabat chức năng duh hatai lac hu labaih 2.000 urang meda njauk lam lahik, min tal urak ini bahrau hu 5 urang metai hu ba tabiak truh labik lam nan. Urang jakar hu panuac likau taduan hu rilo jang bruk daong dalam khik ramik bala glut jaleih taneh, rami ramik dom kham marat piah pacang caga saong pabak brei samar drah dom pandap panda pandar yaok harei. Gam haong jeng khan lac, oh hu pabak brei ginup piah pacang  bala ini./.