Rajaei bahrau hu pathau khan Quốc hội ka bruk langyah saiy tui Sarak 94/2019 di Quốc hội. Ini lac sarak hu bruk khoanh saiy jien je, klaak saiy jien phat suai nộp, jien suai nộp ngan haong urang kak jien je oh daok prein kak jien tame kadung jien kanja, hu peih ngak dalam 3 thun meng di harei 1-7-2020. Kuhria tal puac bilan 12-2022, jabat khik ramik jien je hu peih bruk khoanh saiy ngan haong labaih 705 ribau  urang kak jien je ngan haong abih tih paok jien je daok tavak saiy hu khoanh veik lac jaik 29 ribau 900  tỉ đồng. 

Sở Du lịch TP.HCM hu panuac ieu peih rilo jang dom mbang ravang iek jabat UBND di harei senecar haong harei adit puac abih di yaok bilan, meng bilan 5. Jalan ngak ka 1 lac TP brei peih 3 mbang ravang iek jabat UBND TP.HCM meng ini tal jhung thun di dom harei lễ praong, harei salam uan thun bahrau. Yaok mbang ravang iek hu peih ngak di 2 harei puac adit, meng mon 8 mesup tal mon 2 biar harei saong yaok kapul tame rang iek atah di gauk 15 minit. Mbang ravang iek camereip ini, lac di tuk pahadar TP hu caik angan TP.HCM harei 2-7. Jalan ngak ka 2, TP brei peih 9 mbang ravang iek meng ini tal jhung thun di dom harei pahadar, harei lễ saong thun bharau saka ia harei.

# Pasak Đăng kiểm radaih cơ giới 60-02S (ban Long Khánh, tỉnh Đồng Nai) bahrau pathau khan brei padeih ngak 3 harei meng di harei 15/5 tal harei 17/5 kayua kurang urang ngak. Dahlau di nan, pasak đăng kiểm 60-02S jeng brei padeih ngak kayua pasiam veik pandap panda. Pambuak tal bruk ngak suan dalam đăng kiểm, harei 26/4, Jabat Cảnh sát pasang iek Công an tỉnh Đồng Nai hu cap mek samar drah ong Dương Việt Hồng – Yam ndok Pasang iek Đăng kiểm radaih cơ giới Đồng Nai (phường An Bình, ban Biên Hòa) piah pasang iek ka bruk mbang jien hối lộ. Langiu di Pasak đăng kiểm radaih cơ giới Đồng Nai 60-01S, ong Dương Việt Hồng jeng daok lac Yam ndok di dom pasak đăng kiểm karei, lac 60-02S ( ban Long Khánh), 60-03S (huyện Định Quán).

# Mban tacei pato pacang caga bala meng langik tasik saong daong duah urang gaok bala tỉnh Hậu Giang brei thau, dalam ban sit Ngã Bảy bahrau rah tabiak bruk glut jaleih ngak brei yaok ratuh mét vuông taneh jaleih trun kraong. Labik glut jaleih di takai kraong Xáng Cái Côn, dalam palei Đông An 2A, xã Tân Thành, ban sit Ngã Bảy, atah abih tih labik glut jaleih lac labaih 60 mét, mbang dalam tame labik praong abih lac labaih 6 mét, mbaok taneh lahik labaih 360m2, tui kuhria khat lahik jaik 540 triệu đồng.  Kuhria meng akaok thun tal ini, dalam tỉnh Hậu Giang hu 18 labik glut jaleih takai kraong, takai ribaong, atah abih tih 400m, mbaok taneh lahik jaik 2.000 m2, khat lahik labaih 1 tỷ 300 triệu đồng.

 Harei 15/5, Công an ban sit Tân Sơn, huyện Ninh Sơn, tỉnh Ninh Thuận hu pathau khan samar drah ka bruk pamatai menuac rahtabiak di khu phố 4, ban sit Tân Sơn. Bruk ini rahtabiak di maong 5 dah page harei nan di labik sang ka 20 jalan Lê Duẩn, di khu phố 4, ban sit Tân Sơn, huyện Ninh Sơn, ngak ka 2 urang njauk rambuac, 1 urang metai pak di labik. Urang metai lac ong C.H.L (umo 58 thun); 2 urang njauk rambuac hu ba nao cấp cứu lac amuk Nguyễn Thị Mỹ Linh (umo 57 thun) saong anek Cao Hồng Sơn (umo 19 thun), lac diuk saong anek likei di urang njauk bala, gam daok di khu phố 4, ban sit Tân Sơn, huyện Ninh Sơn, tỉnh Ninh Thuận.  dahlau di nan, labaih maong 4 harei 15/5, Nguyễn Văn Phụng (umo 55 thun, daok di khu phố 4, ban sit Tân Sơn), hadei di tuk manyum 2 ly alak di sang hu pan mra tapa sang ong L.

Brei panuac dalam mbang họp báo hadei di tuk bruk pilih ruah tổng tuyển cử di Thái Lan hu khan brei thau, urang pan akaok Kayua taneh ia Thái (Pheu Thai) brei thau lac đảng ini njauk hatai haong bruk padang sa liên minh haong đảng Tiến bước (MFP) saong ndom lac oh hu jalan kuhria padang rajaei haong đảng chính trị halei karei. Urang pan akaok Pheu Thai jeng brei thau lac meng 309 khgaiy dalam Quốc hội Thái Lan, liên minh nan hu ginup prein piah padang sa rajaei tani tanat, min bruk pok ngak thủ tướng daok pagam pambak tame dom adat hukum.

Takik di nyu 4 urang metai, dalam nan hu gam dom urang medil lac kol duas saong rilo urang karei njauk rambuac dalam mbang cuh phao di Farmington, bang New Mexico, Mỹ harei 15/5. Dua sĩ quan cảnh sát njauk rambuac dalam tuk pagui mek saong pametai kol duas. Angan di dom urang njauk bala saong urang cuh phao ka oh hu khan brei thau. Dalam tuk pasang iek daok hu peih tabiak, cảnh sát hu ieu kakei rahra plaih atah di labik jalan praong Dustin daok kreih phố Ute saong phố Apache.  Abih tih dom sang bac di Pha-ming-tơn jeng brei kareih pabah mbang tui panuac ieu di Sở cảnh sát Farmington di harei kabroi.

Takik di abih 12 urang metai saong dom urang karei njauk jru mek hadei di menyum njauk alak ja di mbang Tamil Nadu, gah meraong Ấn Độ.  Di quận Villupuram, dom urang metai kayua menyum njauk alak ja tagok tal 8 urang, dalam tuk di quận Chengalpattu, hu 4 urang metai. Dalam tuk nan, labaih 30 urang karei daok taong ruak di dom sang iek ruak. Cảnh sát bang Tamil Nadu brei thau, dom urang njauk bala meda kayua menyum alak hu ethanol-methanol haong dom chất hóa học karei. Cảnh sát hu cap mek 9 urang ngak alak ja saong brei padeih 7 urang jakar cảnh sát kayua kurang caik hatai tal bruk ngak di drei./.