Tui Cục Thú y (Mentri Ngak nong saong Patagok palei pala),tal urak ini, dalam taneh ia hu 196 sruh jit ruak pabui chau Phi di 18 tỉnh, ban oh ka tal 21 harei, pabuoi metai saong ba am cuh klak labaih 10.600 drei. Mentri Ngak nong saong Patagok palei pala caong khin dom bhum palei pataom prein tame daong sumu, brei jien jien ka karja pakat xã langyah catang dom sruh jit ruak, oh luai tamuh jit ruak birau; tui nan, am cuh klak pabui ruak, jiak ruak, metai kayua ruak. Gam pacang caga jit, dom bhum palei brei jhul pakhang bruk cakrok patagok gah raong glang athur, manuk ada, kaya ikan piah piah pabah bruk blei di bhap bini…

Meng dom bruk du lịch – ilamo– me-in sambai – daoh tamia – thể thao – pandap mbang – pablei salih, le hoi kraong ia TP.HCM mbang ka 2 pachreih hu 4,5 triệu rahra saong tuai damuai, mai hu mbaok tame. Abih tih dom tuai mai tal TP.HCM tukvak ini lac 1,3 triệu mbang. Abih tih jien mek tame di bruk du lich saong dich vu hu 4.250 tỷ đồng. Mboh cambaih dom kein lagaih bo harei kraong ia ba mai, min ngan haong dom bruk hu manuac sia caik hatai njauk khik tani tanat piah pabak tui hatai caong di rahra, di tuai damuai saong piah ka harei ini jeng lac angan je di TP.HCM.

Tỉnh Hậu Giang birau peih Bruk ngak meriak bhong thun 2024 ngan haong kadha Harei halan hatian brei darah “Kanjok darah di taneh Hậu Giang” saong Meyaom urang brei darah naih gheih thun 2024. Bruk ini rik tame paglong jalan sahaneng di bhap bini ka bruk jak ba halan hatian brei darah saong tame darah hu salamat. Tui nan, iew taong abih kong chuc, vien chuc bhian brei darah rik tame cak rok patagok bruk jak gauk brei darah di tỉnh. Tuk ini, Akok UB bhap bini tỉnh hu alin brei Harak meyom 42 baoh sang, 60 urang naih gheih hu rilo mbang halan hatian brei darah.

Tukvak ini, durain yam tame bilan paik baoh. Di pasak baoh kayau Long Khánh, tỉnh Đồng Nai, urang pala durain biak chreih chrai kayua mbang ini pablei hu yaom. Urak ini durain R6 urang kak kaiy mai blei yaom 60.000 đồng/kg, daok janih durain Thái yaom 85.000 đồng/kg. Ban Long Khánh hu jaik 2.400 ha durain, dalam nan labaih 1.300 ha daok paik baoh. Rilo thun tapa, urang ngak nong bhian hu bac megru ilamo ky thuat pandar tame bruk sangka iek glang, nan ye nang suat, chat luong durain dak harei dak paglaong.

Urak ini, jaik labik kuac mek cuah di xã Tân Khánh Trung, huyện Lấp Vò, tỉnh Đồng Tháp mboh labik glut jaleih, talah ar kraong. Jalan ar pacang pulao Ông hu tauk patau ximang praong 3 mét meteh tapen kraong Tiền hu 2 jalan glut jaleih atah labaih 50met. Dalam nan, hu labik glut jaleih jalan, glong jang jalan labaih 30cm; jalan daok veik mbang tame dalam ar, ngak mbaok jalan daok tok 1 met. Urak ini, đơn vị kuac mek cuah brei padeih saong ramikngak brei kajao labik glut jaleih ar kraong.

Meng bruk bien doi khi hau ngak ka dom mbang langik pandiak dak harei dak khang jang, yaok trieu urang Ấn Độ daok dang anak bruk pilih ruah kan kandah, lac ngak bruk dalam labik kan kandah atau gaok eik lipa. Sa công ty bảo hiểm di Ấn Độ meda biyar ka dom urang ngak di langiu langik sa binah jien bilan yaok harei. Urak ini, hu labaih 46.000 urang kumei di 22 huyen pak Ấn Độ hu bayar abih tih 340.000 USD dalam mbang pandiak di bilan 5. Danak dak ngak iek ini dui atah tal bilan 4/2025.

Namibia daok kham merat daong sraong 135 drei hà mã daok gar dalam gluh baok angaok kraong Chobe di labik khik ramik Salambala, dalam tuk pandiak bhang trak damak dalam bhum. Gah chức năng mboh lac, janih athur ini daok mbuan si lahik nao, nan ye njauk pabak prein daong ka nyu saong dom athur karei di dom labik kraong daok thu lagu. Tui Mintri Môi trường, Lâm nghiệp saong Du lịch taneh ia ini, bruk srau kadau urak ini brei mboh dom kan kandah meng biến đổi khí hậu, nan ye njauk duah jalan brei ka dom janih athur ini hu nao tal bhum ia dalam jang.

Sa bruk parang iek ka Ai Cập klak di abih hu peih tabiak di bilik parang iek negar di bang Victoria, Australia. Hu labaih 500 pandap hu pilih ruah parang iek, dalam nan hu dom pandap điêu khắc, kiến trúc sang kubo saong labik kakuh, quan tài, baar cói, pandap panda ngak ndam matai saong ameh paraik. Dom pandap panda ini mai meng miuyim negar Anh, lac labik hu brei thau lac khik ramik pandap meng kan di Ai Cập praong abih saong taong abih gah di langiu miuyim negar Ai Cập pak Cairo. Bruk parang iek ini brei mboh ilamo di Ai Cập cổ đại dalam 3000 thun, meng bruk yasa Thượng saong Hạ Ai Cập jang yau bruk peih mbaoh di Vương quốc Cổ ngan haong bruk cak rok patagok di akhar tượng hình, tal bruk chinh phuc di urang La Mã.