Harei ini, Quốc hội tame adit ngak bruk puac abih di mbang nyaom biai ka 7. Quốc hội yer tangin brei tapa Hukum Peih ngak Tòa án bhap bini (pasiam veik); hadei di nan, ginum biai pak hoi truong ka Dự án Hukum pacang caga pablei salih manuac (pasiam veik). Ini lac Danak dak hukum dui pachreih bruk caik hatai sangka di manuac sia, tukvak tapa, bruk pablei salih manuac daok rahtabiak sarau kadau tui jalan daok tagok jang, haong dom bruk ngak, jalan ngak dak harei dak kan thau, dak harei dak hu rilo bruk pablei salih manuac dalam taneh ia bo urang njauk bala lac urang likei.

Piah peih mbang pakacah tamat THPT thun 2024 hu siam mekre saong bruk me-in bui sambai di uranaih dalam mbang padeih hè hu salamat, Thủ tướng Rajaei ieu Bí thư Tỉnh uỷ, Thành uỷ, akaok UBND dom tỉnh, thành peih ngak dom jalan khik kajap siam mekre, salamat ka mbang pakacah, pacang caga, duah mboh, langyah dom bruk pandar jamriak kong mghe glaong piah bleik saleik dalam pakacah; daong palagaih ka labik mbang, labik ndih daok, nao mai ka anek saih, abih di nyu lac anek kamuan urang bnagsa takik, sang sarak karja, bhum atah bayah… hu mbaok tame pakacah tui jalan ngak lac oh caik ka anek saih halei klaak pakacah. 

Labaih 45.000 urang halain hatain di TP.HCM hu tabiak mbaok daong prein ka mbang pakacah thun ini. Danak dak daong prein pakacah thun ini hu peih ngak jeng 3 tukvak, dalam nan hu dom bruk daong dahlau di mbang pakacah, dom bruk daong dalam mbang pakacah saong daong hadei di mbang pakacah. Tukvak ini, Pasak daong anek saih, sinh vien Ban raya jeng pambuak haong dom kapul piah peih bruk alin jien bac Prein bac dalam bilan pakacah, tui kuhria hu jao 35 paok jien bac “daong prein bilan pakacah” ka anek saih gaok kan kandah, yaok paok 3 triệu đồng, abih tih yaom jien tagok tal 105 triệu đồng.

Yaom lac daok tame bilan hajan min hu biak rilo sang di huyện Châu Thành, tỉnh Bến Tre bhian pandar ia hu njom ia mbak. Makna lac kayua ia di Cty ia Châu Thành pabak brei ka tuai lac ia njuk meng kraong ribaong tame sang mac ia An Hóa. Tuk ia nan njom mbak ye ia pabak tal yaok baoh sang jeng mbak yau nan. Rilo thun tapa, karja palei hu harak payua tagok pakat angaok, Rayo sap ndom VN jeng hu rilo mbang brei thau min Cty ia Châu Thành jeng oh ka ngak hu siam bruk ia pandar hu njom ia mbak.

Sa labik takai ribaong Ông Chưởng di tổ 3, ấp Long Thành, xã Long Giang, huyện Chợ Mới, tỉnh An Giang glut jaleih taneh dui atah labaih 40 mét, ngak ka 2 baoh sang jaleih abih trun ia, 1 baoh sang daok mbuan si jaleih. Gah chức năng brei thau lac mbang glut jaleih lac kayua labik nan cua cong, hu jalan ia nduac khang, gam haong bruk pajeng ba trak angaok jalan. UBND huyện Chợ Mới hu pataom gah daong ba saong jak ba rahra taoh talaih, panduan ba pandap panda nao labik salamat. Gam tui di nan jeng jak ba rahra vil val nan, kaoh tak phun hijao, panduan ba pandap panda,… piah patrun trak damak tagok ar kraong, pacang paga, khik salamat ka bruk nao mai.

Dom tinh ban di gah meraong Trung Quốc daok patagok dom bruk daong ka rahra saong pasang iek ia dauk ia sua tuk hajan praong dui atah dalam luac 2 adit blaoh. Mesup harei kabroi, sa mbang jaleih taneh di sa palei dalam Tân Hoa Đông, ban Hoài Hóa di tỉnh Hồ Nam ngak brei takik di nyu 1 urang matai saong 7 urang lahik, 4 baoh sang jaleih. Pasak Khí tượng negar Trung Quốc brei dui atah tanut cảnh báo sambo kanjik ka hajan rabuk kayua mboh lac daok hu hajan khang di dom labik.

Gah Y te Dunya hu panuac brei thau dahlau lac langik pandiak yau apui khuah pak Dải Gaza meda ngak trak damak jang dom bruk gah prein yava di urang Palestine. Danak dak Pandap mbang Dunya ndom lac sa mbang sarau kadau y te rahra daok mbuan rahtabiak di Gaza kayua kurang ia hacih, pandap mbang saong pandap panda y te. Bruk manuac jak gauk nao daok di labik karei plaih nyaik di masuh metak gam haong langik pandiak meda patagok bruk ruak kik. Kayua kurang ia saong takik hacih, dom urang ruak aih traoh di Gaza glaong jang 25 mbang dut saong tuk halei karei.

Dom mbang pandiak khang daok me-om bak rilo ban di 4 châu lục angaok dunya dalam tuk Bắc Bán cầu daok yam tame bilan hè. Di bhum Nam Á, pandiak khang rilo labik di Ấn Độ ngak brei takik abih 110 urang matai. Di Saudi Arabia, dom menuac matai kayua pandiak tuk nao ngak rukun haji di palei Mecca lac labaih 1.000 urang. Langik di Mecca tagok tal 51,8oC. Tui dom urang tui iek bruk langik tasik, nhiệt độ kuhria rah tapa dalam 5 thun tal meda ấm jang nhiệt độ kuhria rah tapa di 5 thun tapa./.