Jala pandiak ini bruk taduan raok Tổng thống Putin rivang tui pakat karja tal taneh ia drei rah tabiak di Phủ Chủ tịch, patui nan Tổng thống Putin hu dom mbang ginum biai praong haong dom urang jakar ngak praong  di negar drei ka dom jalan pambuak bruk di dua negar dalam tukvak anak tal,  brei mboh bruk iek praong gauk di dua taneh ia. Mbang rivang negar drei tui pakat karja  di Tổng thống Nga Putin mbang ini sa mbang tra brei mboh bruk jum pataom saong pambuak gauk, tapa nan rik daong paglong labik dang di dua taneh ia angaok dunya, kayua  kein laba di dua bangsa saong sron mbon salamat, tani tanat di bhum taneh jeng yau di dunya.

Di tuk Pahadar 99 thun Harei Báo chí Cách mạng Việt Nam (21/6/1925 - 21/6/2024), dom harei tapa, lambaok dom mintri, dom mban, dom gah di trung ương saong dom tinh ban hu mai rivang saong tadhau ayuh Jabat rayo sap ndem Viet Nam, akaok Mintri, akaok Ủy ban bangsa Hầu A Lềnh hu panuac dhar phol Rayo sap ndem Viet Nam dalam tukvak tapa gam haong dom jabat báo chí, caik hatai sangka pathau khan jalan ngak, sarak hukum di Kanja ngan haong mikva dalam taneh ia, abih di nyu nan lac bangsa takik, bhum atah biyah. Phó taong Yam ndok Rayo sap ndem Viet Nam  Ngô Minh Hiền brei thau, Rayo sap ndem Viet Nam hu 12 kenh papar sap bangsa, sap ndem di urang bangsa hu par tal dom bhum atah biyah abih di dalam taneh ia.

Mban Tuyên giáo Tỉnh ủy saong Hội Nha bao tỉnh Sóc Trăng birau peih bruk jao brei yai Bao chi thun 2024 saong taom mbaok pahadar 99 thun Harei Bao chi CMVN. Ong Tạ Đình Nghĩa, Akok Hoi Nha bao tỉnh Sóc Trăng taong yaom, kadha hu pakacah thun ini jeng kak kajap haong bruk chinh tri di tỉnh,  brei thau samar drah bruk rah tabiak, duh ka bruk salih birau, CNH-HĐH bhum palei, taneh ia. Gam haong nan, dom asar kadha cih vak brei mboh bruk sami samar, hadah krah di urang cih vak, brei mboh dom gheih mekre, njauk haong raidiuk xa hoi di bhum palei.

UBND quận Bình Tân, TPHCM bahrau peih nyaom roya lambaok dom bangsa takik quận Bình Tân mbang ka III - thun 2024 ngan haong asal kadha "Dom bangsa jumpataom gauk, sa tangin haong gauk dak padang quận Bình Tân cak rok patagok khang kajap”. Quận Bình Tân urak ini hu labaih 40.200 urang bangsa takik, meblah jaik 5% ngan haong 27 bangsa, dalam nan bangsa Lo meblah rilo abih. Di mbang nyaom ini, ong Võ Trọng Nam, Phaok yam ndok Sở VH-TT TPHCM ieu kakei quận Bình Tân tukvak anak tal paglaong bruk pato pakai, pasram ilamo ka urang jakar ngak bruk bangsa. Abih di nyu nan lac, jak ba mikva dom bangsa caik hatai sangka dak padang baoh sang ilamo; jumpataom gauk saong daong ba gauk yam tagok kan kandah dalam raidiuk.

Sở Lao động -TB saong XH tỉnh Bình Dương birau ndem meyai nao mai haong jaik 100 D.N Đài Loan piah ginum biai, tacei pato peih ngak dom harak gar hanh chinh pambuak  tal urang ngak negar langiu ngak bruk di Viet Nam. Di nyaom biai, urang ngak praong Sở  hu taduan panuac caong khin di D.N piah hu dom jalan peih ngak siam jang bruk khik iek urang ngak negar langiu. Meng nan, ngak brei labik ngak bruk njauk lagaih tui hukum urang ngak bruk negar langiu saong pachreih urang negar langiu buh jien tame ngak mbang di tỉnh Bình Dương. Dalam 5 bilan akaok thun, Sở brei 3.473 harak adat ngak bruk ka urang negar langiu.

Saudi Arabia brei thau lac, hu veik 68 rahra Ấn Độ metai dalam mbang nao Hajj thun ini kayua langik pandiak, patagok dom manuac metai kayua pandiak dalam bilan nao haji thun ini tagok labaih 600 urang. Urak ini, Saudi Arabia ka oh pabak khau tin ka dom urang metai, yaom lac negar ini hu khan lac hu labaih 2.700 urang abih prein kayua langik pandiak dalam harei 16/6. Thun blaoh, labaih 200 urang nao haji metai, jaik abih lac urang Indonesia.

Tui Vien roh duah dom bruk ngak jhak tal prein yawa di Mỹ, jaik 2.000 uranaih metai yaok harei kayua pambuak tal bruk njom nerak langik tasik, lac makna kadua mbuan ba tal metai aval di dunya. Bruk nan jeng hu makna lac nerak khong khi daok jeng bruk mbuan ba tal metai tuk daok sit, tok hadei di ruak darah tagok glong saong dang mangaok dom asar karei yau njuk pakao hala saong bruk mbang huak kurang chất. Njauk duh hatai lac jaik abih manuac urang di dunya jeng daok suak yava dalam langik tasik  njom nerak  yau nan yaok harei.

Lin tasik Colombia pataom mek hu 2,3 tấn jru phin dalam sa danak dak di mangaok tasik, haong bruk hu mbaok tame pambuak gauk haong dom gah dunya. Dahlau di nan, lin tasik negar ini hu peih sa mbang pagui mek di bhum tasik Caribe hadei di tuk mboh sa sruh gilai mai tal Trung Mỹ medil lac oh siam. Piah plaih duas, urang peih gilai hu klam trun paok pandap jru phin trun tasik, meng nan lin tasik pataom mek hu 1,6 tấn. /.