Urak ini, Quận 6 hu 17 bangsa, dalam nan bangsa takik lac 16 bangsa haong jaik 19.000 baoh sang. Dalam 5 thun tapa, dom pakat Uy, kanja meng quận tal bhum labik di Quận 6 hu ba tabiak rilo jalan ngak paglaong raidiuk saong bruk ngak mbang ngak huak di rahra, dalam nan hu urang bangsa takik. Tapa nan, mek hu rilo jak jeng siam lagaih, rik tame ngak salah dom asal kadha cak rok patagok kinh tế - xã hội; tani tanat siam makre chính trị, siam makre salamat rahra dalam quận; daong pabak, patagok dom prein khang jumpataom abih bangsa.

Công an tỉnh Đồng Nai brei thau, tuk Hukum Căn cước 2023 hu ba tame pandar meng harei 1/7 tal, rahra oh ka tut angan thường trú, tạm trú (dahlau daih lac oh ginup harak gar piah ngak thẻ căn cước công dân) hu pasang iek ngak brei the căn cước. Taphia nan, urang Việt Nam oh ka thau cambaih quốc tịch jeng hu ngak brei harak chứng nhận căn cước. Urak ini Công an tỉnh Đồng Nai hu ngak salah blaoh taong abih harak gar ngan saong urang hu asal Việt Nam oh ka thau cambaih quốc tịch daok daok dalam tỉnh, abih tih lac jaik 2.283 urang 

Dalam tỉnh Kiên Giang urak ini hu 6 Sang bac pho thong gam bac gam daok saong sa Sang bac Trung cấp bruk ngak Bangsa gam bac gam daok hu abih tih labaih 4.000 anek saih tui bac. Ong Ngô Văn Ngàn, Phó Hiệu trưởng Sang bac Trung cấp bruk ngak Bangsa gam bac gam daok tỉnh Kiên Giang brei thau, yaok thun, sang bac hu pambuak haong dom jabat, kapul nyaom peih meng 1 tal 2 mbang tacei jalan pilih ruah saong bruk ngak ka dom adei, abih di nyu nan lac ngan haong dom anek saih bangsa takik, sang gaok kan kandah piah ka dom adei hu jalan nao lagaih. Gam tui di nan jeng pambuak haong dom công ty, doanh nghiệp piah mayaih khan bruk ngak, daong ka dom adei hu bruk ngak saong tani tanat raidiuk.

Di rilo labik dalam bhum ĐBSCL, yaom hadang raong pandar kong nghe glaong daok trun khang, urang raong hadang daok dang anak bruk mbuan khat rilo. Urak ini yaom hadang thẻ janih 30 drei/kg lac 110.000 đồng/kg, trun jaik 50.000 đồng/kg duk haong 2 bilan dahlau. Dreih yau nan, yaom ikan pra tamo jeng daok trun biar. Dalam tuk nan, yaom pandap mbang kaya ikan daok gam gam tagok glaong. Tui gah chức năng, makna lac kayua dom doanh nghiệp pablei hadang tapa negar langiu gaok kan kandah, takik pablei hu, saong hadang daok tal bilan mek pablei biak rilo.

Dom harei tapa, bruk glut jaleih ar takai kraong pak Cà Mau - Bạc Liêu labik nao tapa ban Bạc Liêu saong ban sit Giá Rai, tỉnh Bạc Liêu daok rahtabiak sarau kadau. Tui yaok pataom hu 39 baoh sang gaok kan kandah dalam labik glut jaleih atah 800m. Hadei di tuk rahtabiak glut jaleih, kanja  palei hu brei kapul trun daong ka rahra panduan ba menuac saong drap ar nao tal labik salamat saong pacang paga brei thau labik glut jaleih. Tuk camriep, palei hu pambuak haong dom kapul daok kuac raok kraong Cà Mau - Bạc Liêu di labik ini piah daong ka dom sang gaok kan kandah trak, yaok baoh sang 5 triệu đồng.

Tổng thống Philippines sa mbang tra ndom lac taneh ia ini brei langyah dom meriak gauk di Biển Đông tui jalan sron mbon, hòa bình. Panuac nan di Tổng thống Philippines hu ba tabiak hadei di dom bruk catang tagok bahrau ini haong Trung Quốc di Biển Đông, ngan haong rilo panuac ndom lac taneh ia ini meda peih ngak Hiệp ước phòng thủ haong Mỹ. Dahlau di nan, Mỹ rilo mbang khang panuac lac khik caga Philippines, ayut sahabat lavik saman abih di châu Á, meyah lin, kapal gilai saong kapal haoh di Philippines njuak negar halei taong tame, kuhria gam di tasik Biển Đông.

Mintri Y tế Saudi Arabia brei thau lac takik di nyu 1.300 urang metai dalam mbang nao Haji thun ini, dalam nan hu rilo urang metai kayua njauk mebuk pandiak dalam bilan pandiak. Jaik abih dom urang nao Haji metai jeng kayua langik pandiak biak khang, nao takai mala langik pandiak bo oh hu labik plaih nyaih atau pacang ginup. Gah y tế negar ini hu pabak labaih 465.000 dịch vụ taong ruak, dalam nan hu 141.000 dịch vụ ka dom urang oh hu harak gar cambaih hu mbaok tame nao Haji.

Takik di abih 15 cảnh sát saong dom rahra, dalam nan hu 1 linh mục matai dalam dom mbang taong tame di kol phiến quân pamaong tame dom giáo đường Do Thái saong nhà thờ Chính thống giáo di Cộng hòa Dagestan di Nga dalam harei kabroi. Urak ini oh ka hu kapul nyaom halei, menuac urang halei taduan lac ngak bruk nan. Karja Cộng hòa Dagestan hu tabiak panuac brei caik tang dalam dom harei meng 24 tal 26-6, dom labik ngak bruk karja brei tuan hala daok meteh gheng, abih bruk me-in sambai jeng brei padeih dalam dom harei caik tang nan./.