Ngan haong asal kadha “Tet jumpataom gauk -Xuan thau dhar phol Ndang”, jalan ba tabiak lac “abih urang doan vien, urang ngak jeng hu mbang Tet”, Liên đoàn Lao động (LĐLĐ) tỉnh An Giang meda peih ngak rilo bruk ngak lagaih pamaong tal urang ngak. Tui nan, tuk Tết Nguyên đán thun sak anek ula 2025 dom pakat kong doan meda buh tabiak phun jien piah nao rivang, alin pandap ka labaih 12.000 urang ngak gaok kan kandah, ruak kan kandah, gaok bala tuk ngak bruk, ngan haong paok jien labaih 12 tỷ đồng. Yaok paok pandap daong ka dom urang ini hu yaom lac 1 triệu đồng. Langiu di nan, LĐLĐ tỉnh daok peih ngak danak dak “Darak tet kong doan thun 2025” hu pablei online ka 2.500 urang ngak di bhum labik hu rilo doanh nghiệp.

Tapa bruk peih ngak samu bhap bini haong tapol urang njom ruak bahrau meng 10/2023 tal bilan 6/2024, Ban Cần Thơ bahrau duah mboh 427 urang njom ruak HIV. Dalam nan, dom urang dam dara, sinh vien hu rilo abih. Tukvak tapa, gah Y te Can Tho daong pambuak haong dom kapul dalam saong langiu taneh ia peih ngak rilo bruk ngak pathau khan ka anek saih, sinh vien caga njiom ruak HIV. Taphia nan, bruk “Taom gaok dom urang meda mbuan njom ruak” jeng hu peih ngak jak jeng di Can Tho. Bruk ngak daong duah mboh 23 urang njauk ruak HIV saong panduan taong ruak meng ARV, 166urrang daok dalam kapul dom urang mbuan njom ruak hu taong ruak meng PrEP.

Dalam tukvak meng thun 2019 – 2024, tapa peih ngak Danak dak 135, Danak dak padang ngak palei pala bahrau, danak dak bruk ngak negar 1719... huyện Hàm Thuận Bắc, tỉnh Bình Thuận hu buh tame ngak bahrau 57 danak dak hạ tầng kinh tế - xã hội bhum mikva urang bangsa takik, ngan haong abih tih phun jien lac labaih 56 tỷ đồng saong ngak pasiam veik 2 danak dak karei ngan haong phun jien jaik 500 triệu đồng. Taphia di nan, di 12 sang bac hu anek saih urang bangsa takik, dom sang bac saong pandap panda dalam sang bac hu huyen buh jien tame ngak, pabak hu panuac ieu kakei ka bruk pato saong bac. Urak ini 3 sang bac hu anek saih urang bangsa takik hu pok brei angan lac sang bac mek hu tanut chuan pakat negar. 

Meng rilo gah phun jien, tukvak tapa huyen Đạ Tẻh, tinh Lam Dong hu buh jien tame padang rilo danak dak piah patagok kinh te dalam bhum mikva bangsa takik. Abih di nyu nan lac, huyen Đạ Tẻh hu peih bruk buh jien tame, daong danak dak pala caosu pataom di xa Mỹ Đức hu 65 ha taneh, xa Quốc Oai hu 120 ha taneh ka mikva bangsa takik. Urak ini, yaom katak caosu daok mai veik haong yaom tani tanat, rahra daok yuak paik biak siam lagaih. Langiu di nan dom jabat, kapul dalam huyen daok peih bruk pathau khan daom adat hukum di Karja haong mikva pala phun caosu.  

Bình Phước urak ini hu jaik 56.000 ha glai tamo, dalam nan hu rilo janih athur glai mbuan lahik, athur quy, kan mboh hu khik ieik di Bein pakat negar Cát Tiên saong Bein pakat negar Bù Gia Mập. Tui Sở Ngak nong saong patagok palei pala, yaok thun pak ini taduan, daong diuk meng 80 tal 100 athur glai mbuan lahik, athur quy, kan mboh kayua rahra  ba mai saong palao tabiak glai. Kayua yau nan ye, piah ka bruk khik ramik, khik ieik athur glai biak hu lagaih, ye caong hu bruk sa tangin haong gauk bol bhap rahra. 

Ấn Độ saongTrung Quốc jaik salah blaoh bruk panduan bol lin tabiak truh dom labik daok meraik gauk rah tui Jalan Pssang iek Anak meta (LAC) di gah Pur Ladakh. Akaok Mentri Quốc phòng Ấn Độ Rajnath Singh brei thau, Ấn Độ saong Trung Quốc hu peih dom mbang nyaom biai, di pakat gah negar langiu saong gah bol lin, di rilo labik rah tui LAC piah langyah mesruh metiak. Hadei dom mbang nyaom biai ini, dua gah jeng hu njauk hatai haong gauk ka bruk pasiam veik bruk siam mekre salamat di labik, samu gauk haong hu kein lagaih haong gauk.

 Tui blah tạp chí du lịch danei angan dunya Lonely Planet, Lào hu dak padang ka 4 dalam angan tapuk 30 labik tal ma-in dang akaok di thun 2025. Dang akaok lac Cameroon, patui veik lac Litva saong ka klau lac Fiji. Ngan haong bruk cak rok patagok samar drah di cơ sở hạ tầng, pambuak gam haong bruk siam gheih daok tamo di langik tasik, bruk lagaih di anek manuac pak ini saong dom kham marat oh padeih dalam bruk mayaih khan du lich, Lào dak harei dak brei mboh labik dang di drei lac sa dalam dom labik tal biak dui pachreih rilo tuai damuai abih dalam bhum ASEAN saong di mangaok dunya.

Kum menuk ada urak ini njom pambak samar drah di dom negar dalam Lien minh châu Âu (EU), ngak tagok bruk duh hatai ka bruk mai veik dom mbang cuang kandah pametai yaok pluh ribau menuk ada di châu Âu saong meda njom pambak tapa menuac. Kuhria mboh dahlau di Kapul Thú y dunya brei mboh, tuk tame bilan ciim panduan labik daok dalam akaok bilan 8 tal tuk ini, dom negar Lien minh chau Au hu pathau khan abih tih 62 mbang njom mbak kum menuk ada di dom labik raong glang menuk ada, rilo meng lac rah tabiak di gah Pur chau Au./.