Thun ini, Liên đoàn Lao động TP. Cần Thơ daok jhuil khang danak dak pakacah gauk “Joi bruk taneh ia, naih gheih bruk sang” di dom urang kumei ngak kong, urang kumei viên chức; caga dahlau thau cambaih hatai caong saong kuhria dahlau ka bruk raidiuk, mbang ngui, bruk ngak di urang kumei đoàn viên, urang ngak bruk. Meng nan, samar drah ba jalan ngak piah langyah, taoh talaih dom kan kandah, dom bruk suh sah di urang ngak lac urang kumei, dom cuang kandah dalam bruk peih ngak sarak di urang kumei ngak bruk. Dom pakat công đoàn jeng meda paglaong bruk pasang iek, pasang iek bruk peih ngak dom kein laba, dom sarak hu pambuak tapak tal raidiuk, bruk ngak di urang kumei đoàn viên, urang ngak, khik siam makre dalam bruk samu gauk di urang kumei saong urang likei hu peih ngak siam lagaih.

Tỉnh Trà Vinh urak ini hu 299 pandap OCOP di 199 cty, doanh nghiệp, sang ngak mbang pablei salih saong HTX. Tỉnh kham merat dalam thun ini, tagok hu rilo jang 40 pandap OCOP. Piah daong ka pandap OCOP peih praong darak pasar pablei pandap, Sở Công thương hu daong dom DN, HTX, sang pablei salih ba dom pandap OCOP tagok dom sàn pablei salih điện tử praong dalam saong langiu taneh ia. Urak ini hu 239/299 pandap OCOP di Trà Vinh hu ba tagok sàn pablei salih điện tử, tuk camereip mboh hu siam lagaih. 

Uan salam bilan eik Ramadan tui sakawi Islam 1445 – thun 2024, Mban Thường trực Ủy ban Mặt trận negar Việt Nam TP.HCM bahrau peih mbang taom gaok dom urang lambaok Rahra tui agama Islam pak ban raya HCM, Mban khik ramik Sang magik, surau saong dom labik sampayang di Islam, di Sang magik Musulmane (Quận 1, TP.HCM). Di Mbang taom gaok, ong Phạm Minh Tuấn, Phó akaok Ủy ban MTTQ TP.HCM brei mboh hatai jia tame mikva Islam di TP.HCM daok jumpataom gauk, yam takai nao gam haong rahra ban raya hu mbaok tame dom danak dak pakacah gauk anit ranam taneh ia. Abih di nyu nan lac ngak salah jalan ba tabiak lac ba ban raya jeng lac ban hadah hadai, bahrau, bak hatai anit ranam, siam makre duah jalan ngak bahrau.

Ruak đậu mùa khỉ di Kiên Giang lac bruk njauk caik hatai tuk tỉnh ini hu gac 1 urang njauk ruak di ban Phú Quốc, tui nan tal urak ini hu 3 urang njauk ruak. Daok urang ruak di huyện An Biên njaom HIV njauk ruak đậu mùa khỉ dahlau di tết nguyên đán saong matai di harei 5/2/2024 kayua ruak HIV. Pasak y tế  pambuak bruk haong bilai y tế dom xã pambuak tal sang di 3 urang ruak piah duah thau dịch tễ, pruh jru pametai anek ruak sang dom urang ruak saong dom sang vil val nan.

Bier harei kabroi, di tỉnh Bình Phước rahtabiak sa bruk meblah tiem ameh. Tui khau tin brei thau tuk camriep, maong 1 jala pandiak harei nan, urang dam ndik radaih mac mai tal tiem ameh Ngọc Bích daok di jalan 6/1, di khu phố 1, phường Long Thủy, ban sit Phước Long blei ameh. Tuk po tiem ameh ba ameh tabiak ka urang dam nan maong ye urang ini handaoh mek meh blaoh ndih tagok radaih mac klaak nduac. Po tiem ameh samar preo tagok ieu rahra vil val mai daong saong cap mek hu urang likai dam nan. Taduan hu khau tin, jabat Công an hu mbaok di labik rahtabiak bruk ini, taduan mek urang likei nan piah pasang iek ngak cambaih bruk.

Bộ Y tế Hàn Quốc hu pasang iek ba đơn khiếu nại hình sự tagok cảnh sát ngan saong dom bác sĩ pasram bruk pacuh pajarak saong peih bruk đình công praong ngak kan kandah khang tal bruk daong blac raih saong dom bruk karei di dom sang iek ruak đa khoa praong di taneh ia ini. Bộ Nội vụ Hàn Quốc brei thau, rajaei daok sahneng kuhria ba tame pandar sarak taong phat ngak suan gah hành chính ngan saong 7.000 bác sĩ pasram bruk oh ka mai veik ngak bruk tui panuac ieu di rajaei saong dom gah chức năng.  

Gah y tế Thái Lan hu panuac lac, labaih 10 triệu rahra negar ini njauk nao taong ruak y te pambuak tal bruk tachrauk nerak alam di thun 2023. Dom ban di Thái Lan bhian hu mbaok dalam angan dom labik hu thur mur klik PM 2.5 glaong abih di dunya dalam dom bilan akaok thun ini. Makna lac kayua urang ngak nong cuh pong nerang saong nerak tachrauk ba tal hiệu ứng sang kreih meng bruk ngak kong saong dom sruh radaih nao mai di jalan mbak.

Jaik 740 rabau menuac nao buh phiếu dahlau dalam mbang pilih ruah urang ngak Tổng thống Nga. Ini lac dom menuac gaok kan kandah hu daong palagaih piah buh phieu dahlau. Langiu di nan, UB bầu cử negar Nga brei adat buh phiếu dahlau di 51 taneh ia. Bruk buh phiếu dahlau hu peih tabiak di Nga meng harei 25/2 di dom labik atah bayah saong angaok dom baoh kapal gilai daok di langiu tasik atah./.