Phó Thủ tướng Rajaei Trần Lưu Quang bahrau mbaoh tangin tame sarak pok brei huyện Xuân Lộc, tỉnh Đồng Nai, mek hu tanut chuan palei pala bahrau paglaong thun 2023. Kuhria tal puac thun 2023, huyện Xuân Lộc hu 8/14 xã mek hu tanut chuan palei pala bahrau paglaong. Huyen hu pambuak haong bruk cak rok patagok ngak tabiak pandap panda kaya nong khang kajap; pataom prein tame cak rok patagok bruk ngak, salih janih phun pala, padang tabiak rilo bhum ngak pataom gauk, bhum chuyên canh hu prein pablei tabiak negar langiu, hu yaom kinh te glaong. Thun 2023, hu jien mek tame tui kuhria yaok akaok manuac dalam huyen mek hu labaih 90 triệu đồng.

Thun ini, tuk padeih lễ harei Jayah 30/4 saong harei Dunya urang ngak 1/5 hu harei 29/4/2024 (lac harei som) daok kreh harei padeih lễ saong harei padeih yaok adit. Nan ye Mintri LĐTBXH hu harak payua dom gah pambuak tal, ieu likau salih harei ngak bruk 29/4 saong pabak tapa harei karei piah ka tuk padeih lễ 30/4 - 1/5, urang jakar, viên chức saong urang ngak hu padeih 5 harei gam. Mintri LĐTBXH langyah lac, bruk salih harei ngak bruk yau ini, nyu daong pachreih bruk du lịch saong cai pandar di menuac sia, jhul patagok KT.

Harei pataom Du lịch TP.HCM mbang ka 20 ngan haong biak rilo bruk ngak, dui pachreih bruk du lich daok hu peih tabiak di mblang bein 23/9, Quận 1, TPHCM. Ngan haong asal kadha “20 thun jalan nao biak siam makre, chreih chrai”, harei pataom hu peih tabiak meng ini tal abih harei 7/4, ngan haong bruk hu mbaok di labaih 150 gian hàng mai meng 45 tinh, ban saong 50 doanh nghiệp du lịch, jit vu. Di pak ini, rilo khuyến mãi yau ye alin pandap, trun yaom tour, bốc thăm njauk thuong hu dom doanh nghiệp du lịch, lữ hành pathau khan duh ka tuai kakei blei tour ka mbang padeih 30/4 saong dom tour hè aval. Meng labik lac pasak du lich praong di dalam taneh ia, tal urak ini, gah du lịch Ban raya daok pasiam veik saong patagok siam, daok lac pasak pambuak gauk saong jhul khang bruk cak rok patagok di du lich bhum Đông Nam Bộ saong bhum taneran kraong Cửu Long.

Di dalam ban Ngã Bảy, tỉnh Hậu Giang bahrau hu bruk glut jaleih taneh takai kraong atah labaih 40 mét, dalam tame labik praong abih lac 5m, mbaok taneh lahik 220m2, ngak lahik 1 taluy jalan. Kuhria meng akaok thun tal ini, dalam tỉnh hu 11 labik glut jaleih, atah abih tih 315m, khat lahik labaih 2 tỷ đồng. Makna glut jaleih lac kayua ia nduac.

Jala pandiak harei 3-4, ong Nguyễn Văn Dũng (daok di puk 2, ban sit Ngan Dừa, huyện Hồng Dân, tỉnh Bạc Liêu) tabiak mblang hamu cuh pong nerang, puh ramik mblang hamu. Dalam tuk cuh, kayua langik pandiak khang, hu hangin khan nan ye apui mbang tapa dom bhum karei. Mboh yau nan, ong Dũng kham marat padam pui min pui mbang dak khang njom tabiak praong ngak ka ong biak glaih, oh daok prein, mblung sauk saong metai. Tui rilo rahra pak ini, jaik abih mblang taneh ngak padai đông xuân hu yuak meng mac yuak jar liên hợp, pong nerang tuh grauk labik dalam mblang hamu, mayah pataom mek meng tangin lac lahik biak rilo tukvak. Kayua yau nan ye, piah ngak hacih mblang hamu, urang ngak nong njauk pilih ruah jalan ngak lac cuh mblang hamu.

Philippines lac taneh ia hu bala meng langik tasik rilo abih di dunya. Taneh ia ini daok dalam labik vành đai pui saong rabuk Thái Bình Dương, hu labaih 7.100 baoh kaoh pulao, jalan takai tasik mbuan khut jaleih kayua ia tagok glaong meng ribuk, yaok thun Phillipines bhian hu 20 mbang rabuk, dalam nan hu rilo mbang rabuk khang ngak tayah tayac praong. Thun 2022, Philippines jeng dang akaok harak angan dom taneh ia gaok rilo bala meng langik tasik di dunya.

Kanja Zimbabwe hu tabiak panuac lac bala praong pakat negar tuk langik pandiak bhang biak trak damak daok rahtabiak. Tổng thống Zimbabwe brei thau lac, negar ini caong hu 2 tỷ USD jien daong piah raong yaok trieu urang daok eik lipa. Kayua hajan takik nan ye labaih 2,7 triệu urang di negar ini meda oh ginup pandap mbang piah mbang dalam thun ini. Jaik abih dom tỉnh pak Zimbabwe – negar oh jaik taphia tasik hu mboh bruk pala drak oh hu kuhria  meng bilan 11/2023.

Radaih juak hu maong lac janih pandap nao mai khang kajap, yaom mbiah lap saong khang kadang. Ini lac panuac hu Liên minh châu Âu (EU) brei tapa piah pachreih bruk pandar radaih juak saong hu maong lac sa binah praong dalam sarak khí hậu di châu Âu. Meng panuac tabiak ka bruk pandar radaih juak di châu Âu hu mbaoh tangin, dom taneh ia dalam Liên minh châu Âu pachreih bruk padang ngak jalan ka radaih juak, pasiam bruk salamat saong patagok bruk buh jien tame ngak gah radaih juak. Dom Cty hu pachreih daong ka urang ngak nao ngak bruk meng radaih juak, tui jalan pabak radaih juak saong labik pataok radaih./.