Ngak bruk haong 5 tỉnh dalam bhum Đông Nam bộ di harei 12/4 ka bruk pasang iek, langyah kan kandah, tavak taviay saong jhuk khang bruk peih ngak danak dak buh jien tame ngak, Phó Thủ tướng Trần Lưu Quang brei thau, bruk  yau gauk di jurak ini, lac rilo urang jakar daok haduh hatai  anak dom  bruk ba tabiak tui hukum daok tavak tavaiy, kateik angaok gauk, karung kuhrang,  oh khang hatai lang talaih. Ini ini “ paga pacang” praong, ngak jhak tal bruk jhul pakhang bruk cak rok patagok, abih di nyu lac dom danak dak FDI, ODA, PPP. Dom mentri di trung uong brei samar langyah, ba mbuan lagaih piah dom bhum palei pachreih hu dom prein khang jhul patagok  kinh te - xa hoi. Pho Thu tuong lac, dom tinh, ban brei hu sarak ka dom tavak tavaiy, kan kandah, payua tagok Mentri KH - ĐT piah Mentri ini pataom veik pathau tagok Thu tuong Rajaei.

Di Cần Thơ, "Tết Quân dân uan Chol Chnam Thmay" daok hu peih tabiak, ngak brei bui sambai chreih chrai dalam dom harei bhap bini bangsa Khmer uan Tết meng kan. Rilo bruk kein, lagaih hu peih ngak, gam haong nan, daok hu rilo bruk ilamu, daoh tamia, thể dục, thể thao, dom kadha mein bhap bini bui sambai Tết haong mikva. Dalam thun 2022, ban Cần Thơ hu daong padang ngak 88 baoh sang bahrau brei ka bhap bini Khmer haong yaom jien abih tih labaih 5 tỷ đồng; daong brei mesraiy phun jien ka jaik 1.000 sang haong yaom jien mesraiy abih tih labaih 20 tỷ đồng.

Anak bruk dom tỉnh, ban hu urang ruak  COVID-19 tagok glong, Mentri Y tế hu payua harak kakei dom tinh, ban brei thau cambaih saong peih ngak catang dom tacei pato di Rajaei, Thủ tướng Rajaei dalam bruk pacang caga jit COVID-19 saong dom jit ruak njom mbak karei; Jhul pakhang bruk brei klauk vaccine pacang COVID-19; Brei ngak dahlau bruk tui iek jit ruak di labik; caga  jalan pacang  sumu dom bruk meda rah tabiak di jit ruak. Pakhang bruk peih ngak dom jalan pacang caga jit COVID-19 di dom labik pato megru, tui iek di dom pabah mbang negar, dalam dom labik y te saong dalam bhap bini.

Yaom lac dalam tỉnh Tiền Giang hu rilo mbang hajan praong dalam dom harei tapa min bruk njaom ia mbak jeng daok rah tabiak srau kadau. Đài Khí tượng thủy văn Tiền Giang kuhria mboh lac tabung glaong di njaom mbak lac di puac adit tal meda hu di tanut glaong jang tukvak ini thun bloh. Jalan pacang caga di tỉnh Tiền Giang urak ini, lac daok brei pacang sre dom cống tapen kraong saong brei peih mek ia tuk mbak trun, ia taba tagok. Daok Cty TNHH MTV Pabak ia Tiền Giang paglaong công suất, peih labaih 60 nding raok ia brei pandar saoh ka bhap bini bhum atah bayah

Kong an Ban raya HCM daok pasang iek bruk kamuan likei umo sa thun  di xã Thới Tam Thôn, huyện Hóc Môn laka barah, pandung bauk rup,dreih amaik ame taong paoh. Dahlau di nan page harei 12/4, anai di kamuan nan mboh angaok rup kamuan  hu nem birau padung gam haong rilo laka karei di ka-ing, medil cuh meng pakao, di mbaok, gilaong tanye saong cada hu rilo laka yau taong paoh. Langiu di nan, kamuan likei daok njauk jaoh tangin hanuk. Bruk nan hadei di nan mikva khan brei jabat kong an thau piah daong. Thau ka bruk nan, gah chức năng  hu ba kamuan  tame sang iek ruak  piah jru laka. Urak ini, jabat chuc nang huyen  Hóc Môn, TP.HCM daok samar pasang iek, ngak brei cambaic laih.

Uan harei dunya anek menuac par tame langik tasik (12/4), Triều Tiên brei thau lac daok nduac tui rilo danak dak patagok không gian vũ trụ jang, dalam tuk hu rilo suh sah ka bruk Bình Nhưỡng cuh sa vệ tinh do thám quân sự dalam bilan 4 ni. Di bilan 12 thun blaoh, Bình Nhưỡng hu ba tabiak dom blah thaot jhuk patih ka Seoul saong sa pabah lamnge di Incheon bo urang ndom lac hu thaot meng "vệ tinh ngak iek".

Tổng thống  Han  Wuoc  Yoon Suk-yeol hu tabiak panuac brei thau Gangneung lac bhum njauk bala biak khang, hadei tuk ban njauk khut trak kayua apui khuah glai catang dahlau di nan sa harei. Tui panuac khan birau abih, takik di nyu sa urang metai, 16 urang karei njauk rambuac atau blung sauk, jaik 650 urang karei brei panduan ba nao labik karei, khuah ralai abih jaik 380 ha glai. Bruk ba tal apui khuah glai meda lac kayua phun thông (phun ngo) hangin yuh jaleih trun jalan talei điện.  Tổng thống Hàn Quốc ba tabiak bruk brei rajaei  samar pandar mac jamriah, manuac urang hu mbaok piah padam apui khuah glai aval di abih saong pacang plaih di metai lahik.

Karja Mỹ hu ba tabiak bruk taong phạt labaih 120 urang saong kapul nyaom di labaih 20 taneh ia kayua gam tal bruk daong ka Nga dalam bruk mesruh gauk di Ucraina. Dom urang saong kapul nyaom njauk taong phạt mbang ini, rilo meng ngak gah jien padai, dalam nan hu gam đồng minh di Mỹ yau Thổ Nhĩ Kỳ, Các Tiểu vương quốc A-rập thống nhất…Ngan haong Thổ Nhĩ Kỳ, karja Mỹ hu ba tabiak dom jalan taong phạt pamong tame 4 kapul nyaom, menuac urang, kayua ngak suan bruk pakauk pablei tabiak negar langiu di Mỹ saong daong ka Nga.