Jabat Rajaei bahrau hu harak pathau khan Thủ tướng Phạm Minh Chính pato tacei Mintri Công thương saong Mintri jien padai roh duah ba tabiak jalan langyah rami ramik yaom xang manyek piah caga pambuak gauk, langyah samar drah, khik tani tanat, siam lagaih. Pato tacei ini hu ba tabiak tuk rahra mboh lac makna ba tal bruk kurang xang manyek di urak ini lac bruk ngak di dom jabat khik ramik ka yaom phí blei tame dalam yaom di cơ sở, doanh nghiệp praong padeih blei, brei adat ngak jeng gah trung gian parabha, jabat hải quan oh brei blei tame xang manyek, bruk khik piah xang manyek di taneh ia brei khik hu labik pabak suai lavik. 

Daok jaik 2 bilan lac tal Tết Nguyên đán, tukvak ini, rilo doanh nghiệp di TP.HCM daok tame bruk ngak pandap, khik piah pandap Tết. Tui Sở Công thương TP, pandap mbang, menyum piah pablei ka Tết thun sak tapai 2023 lac jaik 40.000 tấn. Dalam bilan 10 saong 11, sở brei ngak bruk haong dom doanh nghiệp piah thau cambaih veik bruk ngak pandap. Tui kuhria mboh dahlau, dalam thun ini, prein blei di bhap bini meda tagok glaong duk haong 2 thun dahlau.

Sở Y tế Bình Thuận bahrau ieu kakei dom sang iek ruak, pasak y tế huyện patagok bruk pacang caga cúm manuk ada. Paglaong bruk pasang iek piah duah mboh samar dom urang ruak viêm phổi trak kayua virus; pasang iek dom urang ruak medil lac ruak cúm manuk ada; langyah samar dom sruh jit tuk duah mboh. Dom kapul pasang iek, brei caga dahlau jru tavao, pandap panda, hóa chất, radaih piah samar drah daong ka puk palei langyah dom sruh jit cúm di manuac rahtabiak di pak ini. Urang ruak cúm A(H5) lac uranaih kumei umo 5 thun daok di Phú Thọ hu Mintri Y tế khan brei thau.

Dua harei tapa, ia di mangaok kraong Hậu labik Cần Thơ-Hậu Giang saong ia mangaok kraong, ribaong dalam mbalng hamu di tỉnh Hậu Giang tagok tal tabung glaong. Anak bruk ini, tỉnh hu kakei bhap bini pacang danao ikan, pok ar pacang bein phun mbang baoh. Dom labik jalan dauk dalam, brei hu biển báo saong brei caik hatai sangka tuk ba anek sit nao bac dalam tuk ia tagok, oh caik ka dom adei sit saong anek saih menei ia kraong. Dom harei akaok bilan 11, ia dalam mbalng hamu tagok glaong, dom puk palei sangka rami ramik harei trun pajaih Đông Xuân ka nyu lagaih.

Mikva Khmer di tỉnh Sóc Trăng urak ini meblah labaih 30% rahra, bruk khik ramik sap ndem panuac puac, akhan vak di mikva hu iek praong. Dalam nan, bruk pato akhan Khmer di dom labik baha, sang bac di dalam tỉnh tuk halei jeng hu karja palei pachreih ba. Urak ini hu 92 baoh baha Khmer dalam tỉnh pato akhar Khmer ka anek saih tuk padeih hè. Tui Sở Pato magru tỉnh Sóc Trăng, kuhria tal puac thun bac 2021-2022, dalam tỉnh hu 481 sang bac dom pakat, dalam nan hu 133 sang bac pato akhar Khmer hu 42.204 anek saih. Pak ini daok hu 10 sang bac Phổ thông Bangsa gam bac gam daok ngan haong labaih 3.000 anek saih yaok thun jeng hu peih bruk pato akhan Khmer.

Nyaom biai pakat glaong abih Mỹ - châu Phi hu peih tabiak di Washington meng harei 13/12 tal harei 15/12. Ini lac tuk piah ka  Mỹ brei mboh bruk sanya suai lavik haong châu Phi, gam haong nan brei mboh yaom glaong di talei pambuak bruk Mỹ - châu Phi. Tapa nan, patagok dom bruk ngak kinh tế, pakhang bruk sanya ka dân chủ haong nhân quyền, duah jalan ngak brei trun hanjul kan kandah di COVID-19 saong dom jit ruak di harei hadei. Lambaok rajaei dom taneh ia châu Phi, urang asal Phi daok di Mỹ tui kuhria meda hu mbaok dalam bruk ini.

Dalam kham marat ba rahra lac dom urang kumei saong uranaih daok njauk kareih di labik pataom manuac Roi (Roj) di Syria ba mai palei negar, harei 27/10, kapul camriep hu 17 urang hu ba tabiak truh labik piah ba mai Australia. Ini hu brei thau lac bruk kham marat camriep abih di Rajaei Australia dalam bruk ba mai veik palei negar taong abih 60 urang kumei Australia saong uranaih njauk kareik di pak ini meng di thun 2019. Urak ini, labaih 25 taneh ia hu ba rahra di drei tabiak truh dom labik pataom manuac di Syria mai veik palei negar. Bahrau abih lac di adit dahlau, France hu ba 40 urang kumei saong 15 uranaih tabiak truh dom labik pataom manuac.

 Sa liên doanh di Tập đoàn Tata di Ấn Độ saong hãng ngak kapal haoh châu Âu Airbus meda peih bruk ngak kapal haoh pajeng ba quân sự C-295 di sang mac daok di bang miền Tây Gu-gia-rát (Gujarat) di Ấn Độ, hadei di tuk peih bruk padang ngak sang mac ini di harei 30/10. Ini lac mbang camereip abih kapal haoh Airbus C-295 hu ngak langiu châu Âu saong jeng lac mbang camereip abih sa danak dak ngak kapal haoh quân sự hu ngak di Ấn Độ. Abih tih yaom jien ka danak dak lac 2,8 tỷ USD./.

Urang lang: M.P & Thu Thao