Harei ini (16/1), di TPHCM, Ban Bí thư peih nyaom biai pasang iek, peih ngak Sarak ka 31-NQ/TW di Mintri Chính trị ka jalan ngak, bruk ngak cak rok patagok TPHCM tal thun 2030, pamaong tal thun 2045. Sarak 31 lac sarak ndung bak sajarah, ba bruk ngak bahrau ka TPHCM. Dalam nan, Sarak hu ndem cambaih dom bruk ngak, gam ndem cambaih laih ka dom bruk brei thau, taong yaom 10 thun peih ngak Sarak 16 di Mintri Chính trị mbang XI, ka dom jalan ngak, bruk ngak, langyah ka tukvak zaman bahrau, ba bruk ngak hu makna praong ka TPHCM cak rok patagok kein lagaih ka yaok prein khang piah cak rok patagok samar saong khang kajap. Sarak 31 meda ba kein lagaih abih ka TPHCM cak rok patagok samar, khang kajap, peih jalan ka ban raya ba tabiak dom sarak siam makre, lagaih, bahrau.

Dalam dom bruk "Ba gauk ngak jeng Tết" kayua Tổng Liên đoàn Lao động Việt Nam pambuak haong kapul dam dara Cộng sản Hồ Chí Minh pakat negar peih tabiak meng harei 7/1 tal harei 15/1, 8.000 pok pandap hu jao ka urang ngak daok di 11 tỉnh ban lac: Vĩnh Phúc, Hà Nội, Nghệ An, Khánh Hòa, Đăk Lắk, Bình Định, TP Hồ Chí Minh, Bình Dương, Long An, Sóc Trăng haong Tiền Giang. Danak dak daong ka urang ngak gaok kan kandah, ngak siam bruk ngak.

Kapul urang kumei Việt Nam pambuak gam haong urang kumei di Quân khu 7 peih danak dak “Xuân anit ranam jumpataom gauk”. Danak dak hu jao alin 340 paok pandap ka urang ngak lac kumei saong dom urang kumei gaok kan kandah hu yaom lac 1 triệu đồng sa paok pandap; jao alin pandap Tết ka 100 ranaih matuai kayua COVID-19, 23 adei hu taduan pandap Tết saong học bổng hu yaom lac 4 triệu đồng. Dahlau di nan, Kapul urang kumei Việt Nam hu pambuak haong Quân đoàn 4 peih bruk saong jao alin jaik 100 paok pandap ka ranaih matuai, 200 sang urang kumei gaok kan kandah di Tây Ninh.

Dalam tuk Tết Nguyên đán anek sak tapai thun ini, ban Rạch Giá, tỉnh Kiên Giang hu rilo labik me-in sambai brei ka bhap bini nao me-in Tet61. Di labik lih tabiak tasik Tây Bắc bahrau peih pakak jalan bingu mai ngan saong kadha “jalan bilan xuân” atah labaih 200m, hu ngak meng jaik 9.000 dhar  mai kanyik katam saong pambuak haong rilo tiểu cảnh Tết meng kan saong bingu tết piah ngak jeng labik ndung bak Tết Việt Nam.  Tapa nan, Tập đoàn tư vấn, đầu tư saong padang ngak Kiên Giang hu alin hadiah 1,5 tỷ đồng ka MTTQ Việt Nam tỉnh piah daong 3 rabau pok pandap brei ka urang kan kathaot. Gam haong nan, daong 1 tỷ đồng brei ka urang ngak saong anek saih kan kathaot kham merat yam tapa.

Kayua caong pandar di darak pasa Tết meng kan tagok glaong, nan ye urak ini, pa-aok Hòa Lộc di tỉnh Tiền Giang daok kurang, yaom tagok. Di tukvak ini, baoh pa-aok Hòa Lộc hu yaom meng 120-130 ribau đồng/kg, tagok labaih 30 ribau đồng/kg dut saong tukvak ini di thun dahlau. Min, sản lượng baoh pa-aok Hòa Lộc di sang bein vu Tết ini biak bier, njauk labaih 10% bein pa-aok hu jien mek tame dalam tuk Tết. Tỉnh Tiền Giang hu mblang taneh pala pa-aok Hòa Lộc lac labaih 300 ha. Ini lac janih baoh kayau angan je hu pala rilo di abih di pak ini hu pablei tabiak darak pasa kan tame di negar langiu.

Harei ini (16/1), Nyaom biai yaok thun Diễn đàn Kinh tế Dunya (WEF) peih tabiak di ban Davos di Thụy Sĩ. Di nyaom biai, Philippines brei mboh hatai caong jeng prein khang pachreih patagok bhum châu Á – Thái Bình Dương. Peih tabiak di tuk dunya dang anak rilo cuang kandah, dom mbang nyaom di Diễn đàn WEF 2023 meda pataom tame dom kadha “pandiak”, yau srau kadau năng lượng haong an ninh lương thực; biến đổi khí hậu; bruk lam phát glaong, tagok suai veik, nợ công; bruk laik trun di kinh tế dunya, kurangt urang ngak gheih tangin, jien mek tame oh samu gauk…

Abih tih 72 urang di mangaok sruh ahaok pajeng tuai ATR 72 di gah kapar haoh Yeti Airlines njauk laik trun di bhum Pokhara, gah kreih negar Nepal harei 15/1/2023 metai abih. Dom urang kanja bahrau duah mboh 68 rup tau di pak labik rahtabiak bala. Rilo rup tau dalam dom urang ini oh thau cambaih lac urang halei, dalam tuk 80% srruh kapar njauk pui khuah. Ini lac bala laik haoh biak trak damak abih di Nepal meng di thun 1992, tuk kapar haoh Airbus A300 di Gah kapar haoh dunya Pakistan njauk laik trun tuk pateok trun mblang kapar haoh Kathmandu, ngak ka abih tih 167 urang di sruh kapar haoh metai.

Công ty xổ số Mega Millions, Mỹ brei thau lac sa vé xổ njauk giải độc đắc yaom 1,35 tỷ đôla hu menuac njauk bloh. Menuac njauk meda taduan mek abih jien njauk atau taduan mek meneing yaok thun dalam 29 thun. Meyah taduan mek sa mbang, yaom jien njauk ini hadei di tuk kak je bloh daok 724,6 triệu đôla. Labik pablei pablei vé số patuah nan jeng taduan hu pok jien thưởng praong. Nan lac giải độc đắc hu yaom praong ka 2 dalam sajarah negar Mỹ. Tỷ lệ njauk giải độc đắc dalam mbang xổ số ini, lac 1/302,6 triệu./.