Pahadar 60 thun Bruk jak ba gauk ngak “Ribau bruk siam” (24-3-1963 - 24-3-2023), Mban Bí thư T.Ư Đoàn TNCS HCM brei meyaom 1.000 urang “Dũng sĩ ribau bruk siam”. Dalam dom bruk di harei pahadar, meda peih ngak dom bruk: Pakacah cih rup cih “Harei pataom sambo mau” thun 2023 brei ka uranaih ngan haong kadha “ Uranaih Viet Nam – Ngak ribau bruk siam”; ginum biai brei patagok makna bruk jak ba gauk ngak “Ribau bruk siam” dalam tukvak urak ini; harei pataom “ Uranaih bui sambai khang kajap – Yam takai tagok Đoàn” ngan haong kadha “Gam haong adei ngak bruk siam yaok harei” … Langiu di nan, daok hu dom bruk ngak karei hu makna yau: alin brei danak dak “ Ribau bruk siam”; alin pandap saong paok jien bac ka lien doi saong uranaih hu raidiuk kan kandah; rivang inem krung sajarah dakrai Đền Đô, palei rup cih Đông Hồ; cuh gilau, pok bingu kakuh Tổng Bí thư Nguyễn Văn Cừ; nao kabak ba gauk khik ramik alam moi truong.

Akaok UBND tỉnh Vĩnh Long bahrau tabiak harak brei ka urang jakar, urang ngak bruk karja, urang ngak, urang lin, anek saih, sinh viên bangsa Khmer hu padeih 3 harei 14, 15, 16/4/2023 piah mbang tết Chôl Chnăm Thmây. Ngan saong dom doanh nghiệp, iek tui bruk di drei bo rami ramik brei menuac ngak lac urang bangsa Khmer hu padeih ka nyu lagaih, khik kajap bruk peih ngak siam sarak bangsa di Đảng, Karja saong sarak brei ka bhap bini bangsa Khmer bhum taneran kraong Cửu Long.

UB bhap bini tỉnh Bến Tre birau iew dom sơ, ban, nganh UB bhap bini dom huyện, ban brei samar peih ngak Danak dak cak rok patagok kinh te melam dalam tỉnh vaktu 2021 -2030. Dalam nan ba tabiak bruk patagok kinh te melam tui jalan siam lagaih, khang kajap saong patagok siam abih adat cambat siam gheih, ilamu biak gheih di Bến Tre, piah dui atah tukvak pablei salih tuk melam di bhap bini pak ini saong pachreih tuai mai rivang. Meng nan, pabak prein khang ka bruk cak rok patagok kinh te Bến Tre saong lagaih haong bruk patagok dalm taneh ia.

Tỉnh An Giang ba tabiak bruk lac tal thun 2025 hu 170 pandap OCOP mek hu angan meng 3 patuk tagok, dalam nan hu 10 pandap OCOP mek hu angan 5 patuk pakat Negar. Tal thun 2025, tỉnh patagok takik di abih 20% pandap OCOP hu taong yaom saong dak hạng; brei patagok dahlau pandap OCOP pambuak pagam haong angan di pandap, patagok bruk ravang me-in puk palei. Tỉnh kham merat hu takik di abih 30% pandap OCOP lac di hợp tác xã, 30% pandap lac di doanh nghiệp sit saong mbiah.

Bà Rịa-Vũng Tàu urak ini hu 5 labik pala durien, ngan haong taneh praong 124ha hu Tổng cục Hải quan Trung Quốc mbaoh harak brei mã số labik pala. Dalam tukvak anak tal, Chi cục Pala drak saong Khik caga phun pala tỉnh meda pambuak saong dom bhum palei, dom bhum palei pasram, tacei saong dut iek jru khik caga phun pala labaih kandong, pasang iek anek palai kaik tui bruk ba tabiak di taneh ia blei tame dahlau yaok bilan paik paoh yaok thun; tacei pato dom bhum pala brei pasang iek anek ruak; tavak veik tame ho so điện tử…piah khik brei ginup bruk ngak tui mã số, khik brei bruk ngak tabiak baoh sumu gauk. Urak ini, Bà Rịa-Vũng Tàu hu jaik 1.150ha durien.   

Tổng thống Hàn Quốc Yoon Suk Yeol ndom lac pambuak gauk haong Japon lac hu makna biak praong dalam bruk pacang caga dom đe dọa tên lửa di Triều Tiên saong khik caga chuỗi cung ứng dunya. Tui ong Yoon Suk Yeol, piah pacang cakak dom bruk đe dọa tên lửa saong hạt nhân dak harei dak rilo di Triều Tiên, njauk patagok jang talei pambuak bruk an ninh di Hàn Quốc - Mỹ - Japon. Ong caong hu sa harak pambuak bruk klah rabha thông tin haong japon, hu ieu lac GSOMIA, meda daong pabak prein khang tuk 2 taneh ia hu padang veik hatai jia.

Dalam bilan 2, yaom blei pandar di Argentina tagok labaih 102% dut saong thun dahlau, brei mboh tanut glong abih kuhria meng puac thun 1991. Tapa nan hu makna lac Argentina daok dang anak bruk lạm phát glong abih di dunya tuk yaom kaom tagok glong pacang bruk patagok saong dom po cưa hàng gam gam brei thau yaom kaom. Ini lac mbang akok meti hadei di labaih 3 pluh thun, bruk nan di Argentina dang dhi 3 laik so kuhria meng tuk lạm phát trak di thun 1991, tui nan ngak trun bruk blei cai di urang taneh ia Nam Mỹ ini.

Meta - cty amaik di Facebook khan lac daok brei padeih veik 10 rabau menuac ngak. Dalam sa harak payua ka menuac ngak di drei, Yam ndok điều hành Meta - Mark Zuckerberg brei thau, bruk cakak meneing menuac ngak mbang ini piah ngak ka Cty hu lagaih jang, sami samar jang saong paglaong siam mekre jang, pamaong tal mata maong atah dhua, saong ndom lac, taong abih dom cty “njauk caga ka bruk ini daok hu ba tabiak ngak dalam rilo thun anak tal”. Dahlau di nan, di bilan 11/2022, Meta jeng brei thau bruk brei padeih 13% dom menuac ngak di drei, samu 11 rabau urang lahik bruk ngak./.