Thủ tướng Rajaei bahrau padang Kapul rami ramik tacei jalan bhum taneran kraong Cửu Long kayua Phó Thủ tướng Lê Minh Khái pan akaok. Bruk padang ngak Kapul rami ramik tacei jalan ini lac piah salih bahrau jalan rami ramik tacei jalan ngak di bhum, jhul khang bruk cak rok patagok khang kajap bhum Taneran kraong Cửu Long lagaih haong bruk biến đổi khí hậu. Kapul rami ramik tacei jalan bruk ngak di bhum lac kapul pambuak dom gah kayua Thủ tướng brei padang ngak, piah peih ngak dom bruk daong ka Thủ tướng roh duah, tacei jalan, rami ramik langyah dom bruk ngak hu makna, dom gah ka bruk pambuak bhum, cak rok patagok khang kajap bhum. Dom urang dalam kapul hu dom akaok mintri, thứ trưởng saong samu dom mintri, dom jabat samu mintri.

Hadei di panuac brei thau di Rayo sap ndom Việt Nam (VOV) ka yaom pah labik pablei di darak Vũng Tàu, mBan khik ramik darak Vũng Tàu brei ramik veik yaom pah. Min bruk ramik veik ini jeng oh ka lagaih ngak ka yaok rabau urang blei salih suh sah hatai. Tui sarak 02 di UBND, tỉnh Bà Rịa – Vũng Tàu, darak Vũng Tàu hu yaom pah quầy, sạp glaong di abih lac 120.000 đồng/m2/sa bilan labik dhi 1,  yaom biar di abih lac 55.000 đồng/m2/sa bilan labik dhi 3. Yaom nan hu ba tabiak pandar meng bilan 5.  Hadei di rilo mbang urang blei salih hu panuac brei pasang iek veik yaom pah, tal bilan 8 ni, mBan khik ramik darak Vũng Tàu brei ramik veik, trun labik dhi 1 daok 80.000 đồng, labik dhi 2 trun daok 55.000 đồng.  Daok labik dhi 3 jeng khik tamo yaom 55.000 đồng/m2/sa bilan. Tui panuac khan di rilo urang blei salih, labik dhi 3 daok khik yaom brei pah klak lac oh lagaih saong kan kandah ka urang blei salih.

Tui Chi cục Thủy sản tỉnh Trà Vinh, danao raong hadang sú saong hadang thẻ takai putih njauk khat lahik tagok glaong kayua langik tasik oh siam, langik pandiak hajan sarau kadau. Meng akaok vụ tal urak ini, Trà Vinh hu jaik 1.400 ha hadang sú saong hadang thẻ takai putih njauk khat lahik, ngan haong labaih 1,3 triệu drei pajaih palao raong. Hadang raong njauk khat lahik rilo meng lac kayua ruak đốm trắng, bhong rup, ruak tung pruac dalam tukvak 22 tal 55 harei umo thun. Piah plaih njaih di jit ruak njom pambak ka vụ hadang, Sở Ngak nong saong patagok palei pala tỉnh hu ba urang jakar ilamo mai piah daong ka dom baoh sang hu danao raong hadang njauk metai langyah ka alam piah raong gilac veik; paglaong bruk pasang iek jit ruak ngan haong hadang pajaih; gam tui di nan jeng  kakei urang raong pasang iek biak catang prein yava hadang raong; paglaong bruk khik ramik alam môi trường ia dalam danao raong saong ia tathuak nerak.  

Urak ini, jit ruak tangin takai cambuai di TP.HCM daok trun, min pandiak tabiak darah tagok tal labaih 19% duk haong bilan dahlau. Kuhria meng harei 7/8 tal harei 13/8, dom urang njauk ruak tangin takai cambuai trun di TP, tok daok labaih 2 rabau 140 urang ruak. Min dom bác sĩ kakei lac, meng bilan 8 nao meda lac tabung glaong pandiak tabiak darah, meyah oh hu jalan pacang caga, mbuan tamuh jit ruak. Urak ini, gah y tế TP.HCM hu jalan phone ieu tapak brei ka bhap bini ieu khan brei thau dom labik mbuan hu jit ruak pandiak tabiak darah. Bhap bini meda thaot saong payua tapa ứng dụng, karja brei langyah chip dalam 48 mon.

Tukvak tapa, dom bruk pametai manuac, taong paoh manuac di Bình Dương mboh tagok rilo, dalam nan hu rilo bruk rahtabiak kayua oh njauk gauk, tamuh tabiak dalam tuk manyum alak mbia, ngak bruk. Meng akaok thun 2023 tal urak ini, Bình Dương hu 24 mbang pametai manuac, tagok 3 mbang; taong paoh ba tal njauk rambuas rahtabiak 165 bruk, tagok 50 mbang dut saong thun 2022. Makna lac kayua kamlah gauk dalam sang, marau dalam bruk anit ranam gauk, kamlah gauk dalam tuk manyum alak mbia, ngak bruk, ginuh gauk dalam tuk ndik radaih di mangaok jalan mbak… rilo mbang pametai manuac hu pambuak tal prein yava, maroi saong hu tuk oh thau hagait kayua ma-in ma túy.

Akaok Quốc hội Thái Lan Wan Muhamad Noor Matha brei thau, ong hu pan akaok nyaom biai haong lambaok dom thượng nghị sỹ saong liên minh, chính đảng hu hạ nghị sỹ piah njauk gauk ka danak dak mbang nyaom buh phiếu piloih ruah Thủ tướng bahrau di harei paguh (22/8). Tui akaok Quốc hội Thái Lan, mbang nyaom Quốc hội piah pilih ruah Thủ tướng ka 30 hu peih tabiak tuk mon 10h00 harei 22/8 ini. Dom nghị sỹ hu ndom biai nao mai dalam 5 mon dahlau di tuk buh phiếu pilih ruah Thủ tướng.

Nhật Bản meda pambuak haong dom taneh ia dalam ASEAN piah jhul samar bruk salih kỹ thuật số ka bruk pablei tabiak – blei tame, tapa nan ba kein lagaih ka bruk pablei salih ka dua gah. Dua gah meda njauk gauk sa sanya ka jalan ngak di kỹ thuật số yau sa binah di jalan ngak di Mbang nyaom baai Akaok Mintri Kinh tế Nhật Bản - ASEAN, dalam danak dak Mbang nyaom biai Akaok Mintri Kinh tế ASEAN, tui kuhria hu peih tabiak pak Indonesia di puac bilan 8. Jalan ngak ini meda hu peih tabiak tapa bruk số hóa dom bruk pachreih bruk pablei salih di dua gah, jang yau dom adat hải quan di yaok taneh ia, tapa nan jhul samar bruk ngak cambaih laih saong siam lagaih dom jalan ngak pablei salih di Nhật Bản saong ASEAN. Taphia di nan, pandar ilamo công nghệ saong kỹ thuật số jeng daong piah ngak mbuan jang dom adat hải quan.

Sruh kapal haok  Chandrayaan-3 di Ấn Độ meda par trun mbaok ia bulan di mon 6 biar harei sup 23/8 ini. Nan lac panuac khan di di Gah roh duah Không gian Ấn Độ (ISRO) bahrau ba tabiak brei thau. Sruh kapal haok Chandrayaan-3 hu cuh tagok meng pasak Vũ trụ Satish Dhawan di quận Sriharikota, bang Andhra Pradesh di bilan dahlau. Meyah nyu par trun hu siam mekre, Ấn Độ hu jeng taneh ia ka 4 di dunya ngak hu bruk ini hadei di Mỹ, Nga saong Trung Quốc./.