Urang ngak gilac mai ngak bruk tui jalan tacei pato di dom mban, dom gah  

Mban tacei jalan pakat negar pacang caga jit Covid-19 mboh lac, di Viet Nam, jit ruak daok pasang iek hu di dalam negar. Meng puac bilan 12 thun 2021, hadei di tuk hu urang camereip njom biến thể Omicron, dom urang njom ruak dalam negar tagok glong abih dalam 3 adit akok bilan 3 kayua biến thể Omiron mboh ralo abih, hadei di nan trun khang meng puac bilan 3 mbiah tal ini. Dalam 3 adit tapa, dom urang njom ruak, urang ruak trak saong metai di dom tỉnh, ban daok trun tapa yaok harei.  

Di ban sit Vĩnh Châu, UB bhap bini tỉnh Sóc Trăng bahrau peih pakak ba tame ngak bruk mbang 1 sang mac điện ngin ka 5 saong Sang mac điện ngin ka 6 haong prein khang abih tih lac 60MW, haong yaom phun jien buh tame ngak jaik 3.000 tỷ đồng. Tỉnh Sóc Trăng hu Thủ tướng brei ngak 20 danak dak điện ngin, urak ini hu 4 danak dak hu ngak blaoh saong daok peih ngak điện pablei mek jien. Tui kuhria dalam thun 2022, tỉnh meda hu gac 6 danak dak (prein khang abih tih 296MW) ba tame ngak tabiak điện pablei mek jien, patagok abih tih prein pabak tame jalan điện negar tagok 436,8MW.

Gah ngak nong huyện Đông Hải, tỉnh Bạc Liêu pambuak saong Đồn Biên phòng Gành Hào peih bruk palo 4 trieu 200 drei hadang pajaih trun labik pabah tasik Gành Hào. Ini lac labik dom janih kaya ikan dalam ia mbuan diuk, meda caik menek, parilo tagok. Bruk palao pajaih hadang piah pabak kaya dalam ia lac bruk ngak yaok thun di gah ngak nong piah jhul pakhang bruk pathau khan, paglong jalan sahaneng di bhap bini dalam bruk khik caga, chap mek kaya ikan dalam ia, plaik njiak bruk chap mek abih kaya dalam ia meng praong tal sit ba tal abih kaya ikan hadang tapen tasik.

Harei 10/4, tuk daok menei ia tasik di xã Phước Tỉnh (huyện Long Điền, tỉnh Bà rịa-Vũng Tàu) haong gauk gar di drei, Trung úy Thái Ngô Hiếu, 33 thun, urang jakar Kapul padam khuah saong daong urang gaok bala bhum Trảng Bom (Đồng Nai) mehit lac hu menuac mblung ia. Sa-ai Hiếu samar caluai nao gah dom urang daok njauk rayak dui tabiak atah di takai tasik jaik 40 m. Hadei di tuk glaih glar haong riyak praong, sa-ai Hiếu daong ba tame hu 4 urang, urak ini prein yava taong abih 4 urang nan hu tani tanat, 1 urang umo 23 thun metai hu duah mboh di labik atah di nan dom ratuh mét.

Ong Phan Văn Mến, Yam ndok Bảo hiểm xã hội TP HCM brei thau, dom harei tapa hu rah tabiak bruk hu biak rilo menuac mai ngak harak gar taduan bảo hiểm xã hội sa mbang oh lac di ban Thủ Đức bo daok lac di dom quận 12, Bình Tân, huyện Hóc Môn, Củ Chi, Bình Chánh…Tui ong Mến, meng bloh TP HCM gaok kan kandah biak  trak damak kayua jit, urang ngak  lahik bruk ngak, raidiuk kan kandah nan ye caong taduan mek jien daong brei sa mbang  piah hu jien mbang cai. Tui adat,  bhap bini meda nao tal jabat bảo hiểm xã hội halei jeng hu piah hu daong ngak harak gar, oh cang mai tal TP HCM.

Dalam tuk dom menuac njom bahrau di Quảng Châu tỉnh Quảng Đông, Trung Quốc meng 2 urang di harei 9/4 tagok tal 10 urang di harei kabroi, Karja ban Quảng Châu, tabiak bruk lac meng harei ini (11/4), menuac sia oh brei tabiak truh ban (langiu di urang hu bruk njauk nao). Dom urang ngak praong di ban Quảng Châu jeng tabiak bruk lac, dom sang bac tiểu học saong trung học di dalam ban brei kreik pabah mbang saong brei bac online meng harei ini tal harei adit tal (17/4).

Giáo hoàng  Francis hu panuac ieu sa lệnh padeih cuh di Ucraina dalam tuk Lễ Phục sinh. Giáo hoàng dahlau di nan jeng brei thau lac halan hatian hu mbaok tame bruk kham merat pacang cakak mesruh gauk, ndom lac halan hatian nao tal Ucraina. Lệnh padeih cuh meda daong ka dom gah pamaong tal ginum biai saong sron mbon. Lễ Phục sinh thun ini di harei 17/4 tal.

Hadei di jaik 3 thun kreik pabah mbang piah pacang caga jit COVID-19, bein bingu Keukenhof di Hà Lan hu peih veik pabah mbang raok tuai mai ravang iek.  Bein bingu Keukenhof hu maong lac «suraga » di bingu tulip. Ini jeng lac bein bingu praong abih di dunya bo thei jeng caong khin hu sa mbang mai tal piah mboh di anak meta dom janih bingu./.

Urang lang: Mousaphuong- Ái Nghiêm-11/4