Harei ini (30/5), Mbang ginum biai ka 3, Quốc hội mbang 15 yam tapa adit ngak bruk ka 2. Dah page ini, Quốc hội pang Harak pathau khan di Kapul pasang iek saong ginum biai di hội trường ka bruk peih ngak sarak, hukum dalam bruk quy hoạch kuhria meng tuk Hukum Quy hoạch hu ba tame pandar. Ini lac bruk ngak hu makna praong, kayua mayah quy hoạch nao dahlau sa takai yam, khik tani tanat bruk ngak, chất lượng siam meda daong jhul tagok bruk cak rok kinh tế- xã hội di taneh ia.

Tui jalan mboh lac “Ngak nong, urang nong, palei pala hu labik dang biak prong”, Di nyaom menyai ndom menyai nao mai song urang nong Việt Nam mbang ka 4 di harei kabroi  (29/5) di tỉnh Sơn La, Thủ tướng Phạm Minh Chính hu panuac ieu biak sangka tui pang hatai cong khin, patagok pren khang,, bruk ngak di urang nong, dalam patagok gah ngak non, palei pala. Paglong bruk ngak, labik dang di urang nong, piah urang nong ngak pok công nghệ dalam bruk ngak mbang, pablei salih , song meda ngak kaya meng bruk ngak nong; patagok bruk ngak nong salih bahrau, siam lagaih, khang kajap, padang ngak palei pala bahrau tui jalan  salih bahrau.

25 gru jru ranaih umo ngak tui panuac pato tacei di Wa thun 2022 bahrau hu tỉnh đoàn Bình Thuận pok manyaom. Ini lac dom urang gru jru ranaih umo hu angan je dalam bruk bac taa saong ngak tui jalan hadha krah siam mekre di Hồ Chí Minh, hu hatai ngak bruk siam, abih drei sangka iek glang, daong khik prein yava di bhap bini.  

Tỉnh đoàn Sóc Trăng bahrau peih bruk  tabiak mbaok Chiến dịch Dam dara halan hatain  Hè thun  2022 di huyện Thạnh Trị. Dalam mbang ni, hu jao bảng tượng trưng 100 bộ pandap bac daa, Peih harei pataom Dam dara, peih bruk padang sang bac mẫu giáo, pala phun hajao, iek ruak, brei jru ka urang kan kathaot, brei pandap ka dom boh sang  njauk kan kandah kayua jit  COVID-19…Tapa bruk ngak nan, hu daong ka urang đoàn , dam dara pasram megru song prong tagok, rik dong ka rai dam dara duik rai siam mekre, hu ilamu, hatai sahneng hadah krah rik dong padang ngak palei pala song khik caga taneh ia.

Di dalam xã Xuân Tâm, huyện Xuân Lộc, tỉnh Đồng Nai bahrau rahtabiak bruk mblung ia ngak brei 3 anek saih metai. Dahlau di nan, tuk bier harei 28/5, 2 adei saai pajeng lac H.T.S (tal 9), H.T.P (tal 3) saong adei Đ.T.P (tal 5) ba gauk nao ma-in. Mboh dom adei suai mai sang, gauk gar hu nao duah ye mboh radaih juak di dom adei patok tapen sa danao ia jaik sang. Gah Cảnh sát pacang khuah padam khuah saong daong duah dom urang njauk bala huyện Xuân Lộc hu trun danao duah saong mboh rup tau di 3 adei di ala danao ia.

Urang pal akaok dom taneh Liên minh châu Âu harei ni peih nyaom biai pakat glong  abih di  Bỉ piah ginum biai ka bruk mesruh di Ukraine, sarak quốc phòng, sarak năng lượng song khik ginup padai brah, pandap mbang. Dalam nan, dom sarak di châu Âu ngan saong Nga hong  Ukraine meda lac bruk prong, abih di nyu lac pok tong  phạt ka  6 bo Liên minh châu Âu kuhira kateik tagok Nga. Mbang ginum biai rah tabiak dalam tuk talei jum pataom di dom taneh ia  Liên minh châu Âu ka dom jalan  pacang cakak song bruk mesruh di  Ukraine dak harei dak mboh hu bruk oh njauk gauk.   

Tui taong yaom di Gah Y tế dunya (WHO) ba tabiak di harei 29-5, ruak đậu mùa khỉ daok ngak kan kandah di tanut mbiah ngan haong prein yava di manuac sia dunya. Dahlau di nan, WHO brei thau lac hu rilo urang ruak di dom taneh ia ka oh mboh hu anek ruak. Ruak đậu mùa khỉ rilo meng lac njom ruak tapa bruk taom gaok jaik nan ye mada pacang plaih pambak ruak meng bruk khik paatah di gauk saong bhian rao tangin, khik ka rup pabhap hacih saat.

Takik di abih 57 urang metai, yaok pluh urang karei lahik song yaok ribau urang njauk nao labik kakrei kayua ia sua song glut jaleih taneh di rilo labik di gah pai Brazil. Ni lac mbang ia sua prong ka 4 dalam  5 bilan tapa di taneh ia  châu Mỹ ni. Tổng thống Brazil harei kabroi hu mai tal labik ni  piah tacei pato  bruk dong menuac gaok bala. Bol bala jeng hu ieu pataom nao dong duah dom urang lahik ./.

Urang lang: Thu Thao & H.Pha – 30/5/2022