Mentri Ngak nong saong patagok palei pala hu padang ngak Danak dak Pacang caga pandiak bhang, njom ia mbak, ia mbak tame dalam, glut jaleih taneh saong ia pandar di bhap bini piah langyah hu taong abih 5 bruk di bhum taneran kraong Cuu Long. Tui taong yaom di Cuc Ribaong kraong, kuhria mboh dahlau, ia mbak thun ini tagok yau bhian, saong hu dom mbang ia ndik tagok biar jang dom thun dahlau. Yau nan min, anak bruk langik salih karei, abih di nyu lac ia ndik yau urak ini, ye hu mbang njom ia mbak glong jang kuhria rah tapa yaok thun. Tui kuhria mboh dahlau, meng harei ini 24/2, meda hu sa mbang njom ia mbak glong abih dalam thun ini, dui atah tal harei 4/3. Ia mbak ndik tame dalam  meng 65 – 70 km di dom labik pabah kraong.

UB bhap bini tinh Dong Thap birau brei mek veik harak pandap OCOP di 47 pandap mai meng 27 po ngak tabiak, dalam nan hu 44 pandap mek hu OCOP3 patuk saong 3 pandap OCOP 4 patuk. Bruk nan kayua dom pandap oh hu taong yaom tui tukvak ba tabiak 36 bilan. Dom pandap nan njauk mek veik harak brei angan saong oh hu pandar angan pandap OCOP Viet Nam, jeng yau dom patuk mbat tagok ao papaok pandap, brei thau angan di pandap.

Tukvak jaik ini, rilo gilai taong chap ikan tapen tasik tinh Soc Trang brei ndih angaok ar dui atah kayua langik oh lagaih, riyak glong hangin khang. Bruk gilai “ndik ngaok ar” ye bruk ngak jeng yau jien mek tame yaok rituh bhap bini  gaok kan kandah trak. Abih di nyu, ralo mikva  lac dom baoh sang kan kandah, oh hu taneh pala drak, bruk ngak mbang pambak tame ia tasik. Dom thun jaik ini, kaya ia ikan hadang tok takik, dalam tuk nan yaom menyek tagok, yaom ikan hadang trun, ba tal raidiuk dom urang daok tapen tasik oh hu karo, cuang kandah.

UB bhap bini ban sit Hoà Thành, tỉnh Tây Ninh “ Bruk jarah rivang ilamo meng kan di bangsa Khmer palei Trường An, xã Trường Tây”. Bruk padang ngak nan piah khik ramik, meyaom saong patagok dom ilamo meng kan di bhap  bini Khmer palei Trường An (puk Bàu Ếch). Tapa bruk ngak nan hu daong ka bhap bini Khmer  ba drei tame khik ramik saong yaih khan drap ar ilamo tal bhap bini saong ba drap ar tame dalam raidiuk, ilamo, nghe thuat, pato megru, yulit meda rik tame  paglong raidiuk jalan sahaneng, drap kaya kan di bhap bini.

Le hoi Caphe Buon Ma Thuot mbang ka 9 thun 2025 ngan haong kadha “Buon Ma Thuot – Labik angan caphe di dunya” kuhria peih ngak meng harei 9 tal 13/3/2025 di tinh Dak Lak. Ini lac bruk ngak hu makna biak praong, rik tame yaih khan angan je caphe Buôn Ma Thuột, dak padang thaot binguk Ban Buôn Ma Thuột lac “ Ban caphe  di dunya”; rik tame paglong labik dang  di gah Caphe Viet Nam di dunya saong jhul pakhang bruk  patagok kinh te - xa hoi saong yulit di tinh Dak Lak.

Tong cuc pasang iek bruk hinh su di Cảnh sát negar Indonesia chap mek hu bruk pablei 74 kilo can sa  di nyaom urang pambuak dom tinh. Gah chuc nang chap mek hu 2 urang, gam 74 kilo can sa padauk dalam 4 baoh kadung bao tải, padauk dalam baoh kayau saong 2 baoh phone tangin. Urak ini gah chuc nang  daok tangi duah thau tapa 2 urang ini  piah peih praong bruk pasang iek ngak brei cambaic laic. Dom duis nan meda pametai, daok guk luac rai atau 20 thun guk, gam bhat jien tagok tal 10 ti Rp, sumu  613.000 USD.

Rajaei di Tổng thống Mỹ Donald Trump khan lac brei cakak trun 1.600 labik ngak bruk di Jabat Patagok Dunya Mỹ, langiu dom urang ngak praong saong urang pan bruk di dunya. Dalam adit ini, Mentri Quoc phong meda brei cakak trun  takik abih 5% urang ngak bruk duh bhap bini – lac bruk kham merat  ngak brei takik urang ngak di lien bang karja Tong thong My. Dahlau di nan, karja Mỹ brei padeih bruk yaok ribau rajakar lien bang dalam  tuk daok pasram bruk.

Yaok ribau urang trun jalan, ralo lac anek saih, sinh vien saong gru pato, pataom mai di pasak ban ine Madrid, Tây Ban Nha piah iew Karja brei salih birau bruk pato megru di karja saong cagar veik  bruk cakak trun kadung jien di gah pato megru di karja. Dom urang trun jalan prew khang panuac kadha “ Daong bruk pato megru di karja, klak  bruk brei ka urang langiu  karja tame ngak gah pato megru”, cagar veik catang dom sarak kayua  Akok Đảng Bhap bini di Bhap bini Madrid ba tabiak. Dom thun jaik ini, bruk palih ruak anek saih bac gah langiu karja di Tay Ban Nha tagok rilo, ba tal bhap bini kurang bruk palih ruah bruk bac da-a sang bac di karja./.