Mbang nyaom ka 5, Quốc hội mbang 15 hu peih tabiak di dah page ini (22/5). Tui kuhria dalam 23 harei ngak bruk, Quốc hội meda pasang iek, brei panuac ka dom asal kadha praong. Daok bruk lập pháp, Quốc hội meda pasang iek, brei tapa 8 danak dak hukum, dalam nan hu 6 danak dak hu brei panuac di Mbang nyaom biai ka 4. Quốc hội jeng hu pasang iek, ba tabiak 3 sarak adat hukum; sarak ngak iek dom jalan ngak, sarak angan je piah cak rok patagok Ban raya Hồ Chí Minh; Sarak ka bruk mek phiếu pachreih tui, buh phieu pachreih tui ngan haong dom urang ngak praong kayua Quốc hội, Hội đồng bhap bini pok ngak atau brei tapa (pasiam veik); Sarak ka Danak dak padang ngak hukum, sarak thun 2024, pasiam veik Danak dak padang ngak hukum, sarak thun 2023.

Thành đoàn TP.HCM saong kapul VinaCapital Foundation (VCF) haong dom gah, bahrau peih bruk iek ruak brei ka 1.200 uranaih gaok kan kandah kayua jit ruak COVID-19, uranaih anek di urang ngak hu raidiuk kan kandah daok di huyện Bình Chánh. Dom adei hu pasang iek prein yava saong hu taong yaom gah hatai sahneng. Meyah mboh hu ruak, dom adei hu pasang iek ruak veik saong hu taong ruak di sang iek ruak Nhi đồng ban raya, hu urang ngak pahla daong jien jru tavao taong ruak saong jien sahui nao mai. Hadei di tuk dom bác sĩ pasang iek bloh, dom adei hu mban peih ngak danak dak alin hadiah pandap panda. 

Meng akaok thun tal urak ini, dom urang ngak hu nộp harak gar piah mbang jien lahik bruk ngak di Bình Dương tagok. Dalam abih tij urang ngak hu nop harak gar mbang jien daong lahik bruk ngak hu labaih 5.300 urang labaih umo 40 thun, tagok jaik 40% dut saong thun 2022. Dom urang ini hu tanut jien bilan tui kuhria lac 3,9 triệu đồng sa bilan. Dalam 5 bilan tapa di Bình Dương hu 173 doanh nghiệp trun phun jien atau tayah ngak ka urang ngak lahik bruk ngak, trun maong ngak bruk, padeih ngak oh hu jien bilan. Anak bruk ini, Pasak Dịch vụ bruk ngak tỉnh Bình Dương hu langyah yaih khan bruk ngak ka labaih 21.000 urang.

Urak ini, yaom ikan padoc di tỉnh Trà Vinh daok tagok glaong, meng 50.000 – 52.000 đồng/kg. Tui panuac khan di dom sang raong ikan padoc di huyện Trà Cú, ikan padoc raong 5 bilan trak hu meng 700 gr tal  1,2 kg sa drei. Yaom phun yaok drei ikan raong lac 32 rabau đồng/kg. Tui nan, urang raong laba hu 20.000 đồng/kg, yaok vụ raong laba hu  50 triệu đồng. Min gah ngak nong hu panuac kakei mikva urang ngak nong jhui mboh laba di anak meta bo raong rilo, abih di nyu lac oh raong di dom labik oh hu quy hoạch, oh palao raong rilo, darak pasar labik pablei meda gaok kan kandah.

Sở Ilamo, Thể thao saong Du lịch tỉnh Cà Mau daok parang iek “Inem krung ilamo Cam Ninh Thuận", piah yaih khan dom siam gheih ilamo, parang iek thaot binguk, pandap panda angan je di ilamo Cam Ninh Thuận. Di pak ini, Mban peih bruk hu parang iek 25 thaot binguk saong 68 pandap  ilamo meng kan, ilamo angan je di mikva bangsa Cam Ninh Thuận. Dalam nan njauk ndem di abih lac pandap panda pambuak tal bruk ngak meng tangin, pandap pandar dalam raidiuk mbang ngui, dalam adat cambat, khan aw ngui cuk meng kan, ragu ragam meng kan Cam. Tukvak parang iek “inem krung ilamo Cam Ninh Thuận’’ di Cà Mau dui atah tal 30/6/2023. 

Triều Tiên bahrau peih bruk uan ngak salah bruk padang labik sang daok bahrau di ban ine Bình Nhưỡng. Ini lac sa binah dalam danak dak pakat negar padang ngak 50.000 căn hộ bahrau, siam di ban ine mbiah tal thun 2025. Bruk nan daok dalam danak dak padang ngak dom labik sang daok bharau di ban ine Bình Nhưỡng. Tui hãng thông tấn negar Triều Tiên (KCNA), ini lac danak dak pabak sang daok bharau “praong abih” di Triều Tiên, brei mboh bruk padang ngak di bruk cakrok patagok saong harei hadei di chủ nghĩa xã hội.

Tổng thống Mỹ Joe Biden hu taom gaok Tổng thống Ukraine di gah langiu nyaom biai pakat glaong G7 di Nhật Bản. Di mbang taom gaok, Tổng thống Mỹ hu ndom veik panuac sanya di Mỹ lac daok tui jalan daong ka Ukraine khik caga quyen ngak po di taneh ia ini. Gam haong nan brei mboh bruk halain hatain di Mỹ daok daong gah an ninh piah pabak dom caong maong di Ukraine di mangaok mblang maesuh metak dalam nan hu gam paok daong 375 triệu đô la. Langiu di nan, Tổng thống Mỹ jeng hu ndom tal bruk daong di Mỹ saong dom taneh ia karei dalam nyaom G7 ngan haong bruk padang ngak veik Ukraine dalam nan hu gam bruk kham marat padang ngak veik dom cơ sở hạ tầng năng lượng di taneh ia ini saong bruk Ukraine peih ngak dom bruk salih bahrau njauk ngak.

Sa Cty khai khác meh di Trung Quốc khan lac bahrau duah mboh gac labaih 200 tấn ameh di mỏ meh Tây Lăng daok di Lai Châu, tỉnh Sơn Đông, gah timur Trung Quốc. Tui nan,  abih tih dom meh di mỏ Tây Lăng tagok hu 580 tấn, ngak ka nyu jeng mỏ kim loại quý praong abih di Trung Quốc, haong yaom kuria mboh tagok tal 200 tỷ Nhân dân tệ (28,5 tỷ USD). Tui Hiệp hội Vàng Trung Quốc, labik gah Đông Bắc tỉnh Sơn Đông lac labik hu mỏ vàng praong abih di Trung Quốc, haong sản lượng glaong abih dalam taneh ia./.