UBTVQH birau pasang iek bruk ramik caga saong brei panuac ka asar kadha, danak dak mbang nyaom oh hu caga dahlau mbang ka 2, QH mbang XV. Tui kuhria dahlau mbang nyaom peih tabiak di harei 5-1-2023 saong tamat di biar harei 9-1-2023. Quoc hoi ngak bruk 4 harei, caga dahlau sa harei. Mbang nyaom caga peih ngak brei pataom tame di Sang Quoc hoi. Mbiah tal ini, dom mentri, dom gah caga hu ginup, tani tanat dom asar kadha ka mbang nyaom. Tapa nan dom bruk pasang iek, langyah, dom ủy ban di QH brei taong yaom ho so brei ginup piah ba tagok Quoc hoi pasang iek di mbang nyaom oh caga dahlau mbang ka dua.

Mintri jalan mbak pajeng ba (GTVT) brei caik tabiak jaik 2.200 tỷ đồng padang ngak bahrau 9 mbaik tatua jalan mbak, 1 mbaik tatua hu ngak pasiam veik saong yah klaak 1 tatua cacak gar dom jalan kraong dalam taneh ia piah ngak pasiam veik gah jalan mbak dalam bhum taneran kraong Cửu Long. Dom danak dak tui kuhria hu peih ngak di thun 2023, hu ngak salah di thun 2025. Hadei di tuk ngak salah, danak dak meda paglaong prein pajeng pandap nao mai meng jalan kraong dalam taneh ia di bhum Taneran kraong Cửu Long haong TP Hồ Chí Minh jang yau dom pabah lange tasik bhum Đông Nam Bộ.

Ndem ka bruk urang ngak kong njauk cakak trun tukvak ngak bruk, Mentri LĐTB saog XH brei thau, Ban raya HCM hu 110.000 urang ngak gam tame bruk nan saong 6.300 urang ngak  lahik bruk ngak.  Dalam tuk nan, di bilan 12 thun 2022, Ban raya HCM khin hu meng 23.000 tal 25.000 bruk ngak. Yau nan, iek tui bruk khin hu manuac ngak bruk saong urang ngak, brei mboh urang khin duah bruk ngak ralo jang. Yau nan min, daok mboh hu labik urang lahik bruk ngak, labik ye oh palih ruah hu urang tame ngak kayua bruk cung -cau tui bruk ngak oh sumu gauk saong labik nan. Urang ngak njauk cakak trun tukvak ngak bruk di dom gah daok trun takik đơn ngak pandap yau jhik, pet, kalik takhaoh oh salih tapa ngak bruk di dom bruk karei yau điện tử, cơ khí, dịch vụ…

Yaom jien thuong kuhria rah tapa ka urang ngak di doanh nghiep dalam tỉnh Bình Dương dalam tuk Tết Nguyên đán tui kuhria lac labaih 6 triệu đồng, bier di abih lac jaik 5 triệu đồng, glaong abih lac jaik 900 triệu đồng. UBND tỉnh hu brei daong ka urang ngak gaok kan kandah lac 1 triệu đồng sa urang. Tui kuhria, hu labaih 46.500 urang ngak meda taduan hu paok daong ini. Liên đoàn Lao động tỉnh pambuak haong dom kapul alin brei 5.000 harak vé radaih pui nao mai ka urang đoàn, urang ngak di dom tinh gah kreih, gah barak negar.

Palei bingu kiểng  Chợ Lách (tỉnh Bến Tre) daok tame bilan bingu kieng piah pablei tuk Tet Nguyen dan thun nasak Tapai. Bilan bingu kiểng Tet thun 2023, huyen Chợ Lách pala labaih 12 trieu pandap, tagok labaih 4 trieu pandap dut saong thun dahlau. Langiu di nan, tỉnh Bến Tre birau peih ngak Danak dak Patagok phun pajaih saong bingu kiểng Chợ Lách pakat negar, ngan haong phun jien buh tame ngak jaik 85 tỉ đồng. Bruk ba tal danak dak lac padang labik pala sa janih pataom tame meng 300 - 500 ha di taneh praong 1.500 ha piah patagok bruk ngak tabiak pajaih bingu, bingu kieng tui jalan cong nghiep piah pabak ka bruk ngak tabiak ginup pajaoh hu rilo, siam, lagaih saong bruk BĐKH saong bruk khin blei di darak pasar.

Trung Quốc meda ba mbuan lagaih jang ka tuai damuai dalam bruk nao mai tapa  negar, di tukvak mboh lagaih saong lac lagaih haong bruk di anak meta. Urang brei panuac di Mintri Ngoại giao Trung Quốc ndom lac, dalam luac tukvak rahtabiak jit ruak COVID-19, Trung Quốc hu ngak njauk tui jalan taom gaok samu gauk saong pambuak gauk gam hu kein laba ka dua gah, ba mbuan lagaih ka bruk nao mai di tuai damuai tapa dom harak sanya yau ye ngak mbuan lagaih dom sarak thị thực, patagok dom mbang par dunya hu tani tanat. Trung Quốc brei kareik pabah mbang dunya ngan haong jaik abih dom tuai dunya dalam jaik 3 thun tapa kayua jit praong COVID-19.

 Tui Jabat khí tượng Met di Anh, thun 2023, nhiet đô di dunya meda glong jang takik abih lac 1 độn C dut saong tukvak dahlau cong nghiep. Tui nan, thun anak hu dut mboh dahlau lac thun ka 10 gam gam brei mboh nhiệt độ kuhria rah tapa  di dunya meda glong labaih 1,2 độ C saong meda mbuan jeng sa dalam dom thun pandiak abih kuhria meng lavik mai di Baoh taneh. Bruk ba tal ngak brei thun 2023 nhiet do tagok saong jeng pandiak glong jang nan kayua langik oh hu La Nina ngak la-ar.

Dom urang jakar y tế châu Âu bahrau hu panuac khan lac jit cúm manuk ada rahtabiak sarau kadhau ka oh bhian mboh di labik ini. Dalam tukvak meng bilan 10/2021- 9/2022, hu labaih 2.500 mbang tamuh jit ruak cúm manuk ada hu duah mboh di var raong di 37 taneh ia di châu Âu. Labaih 50 triệu drei manuk ada njauk am cuk klaak kayua njauk ruak. Urang jakar ngak praong gah y tế châu Âu daok sahneng kuhria bruk klauk jru piah pacang cakak mbang njom mbak virus ini. Jit cúm manuk ada jeng daok rahtabiak sarau kadhau di dunya. Akaok bilan 12 ini, Nhật Bản jeng am cuk klaak labaih 4 triệu drei manuk./.