Dah page 10/4, di Jabat Rajaei hu peih mbaok mbang nyaom Rajaei ka bruk padang ngak hukum bilan 4 piah pasang iek, brei panuac ka bruk mek panuac di rahra saong ngak salah danak dak hukum taneh riya (pasiam veik) payua tagok Quốc hội saong bruk taduan mek panuac di Ủy ban Thường vụ Quốc hội ngan haong danak dak Hukum sang danaok (pasiam veik). Thủ tướng Rajaei Phạm Minh Chính brei thau lac, urak ini hu rilo bruk njauk peih ngak, rajaei pilih ruah dom bruk praong piah pataom prein tame ngak, min brei ngak dahlau di abih jeng lac 3 jalan ngak bahrau, dalam nan hu bruk ngak bahrau ka padang ngak, pasiam sarak. Kayua yau nan ye, rajaei njauk pambuak pagam haong bruk di anak meta, iek praong  bruk di anak meta, tabiak meng bruk mboh di anak meta, mek bruk di anak meta piah tui nan padang ngak hukum.

Bộ Chỉ huy quân sự ban Cần Thơ bahrau peih bruk salam uan Chôl Chnăm Thmây di huyện Thới Lai ngan haong rilo bruk ngak siam, lagaih... Dalam nan, jaik 100 urang jakar, urang lin haong bhap bini dalam palei ba gauk ngak rilo bruk yau ye: puh ramik hacih sa-at alam môi trường, caik gom truac hadah di dom jalan, ngak jalan bê tông anak papah mbang tapen di baha Neryvone... Langiu di nan, hu peih bruk padang ngak 5 baoh sang Jum pataom, 3 baoh sang anit ranam, yaom yaok baoh sang meng 50 – 100 triệu đồng, iek ruak, brei jru, alin hadiah 1000 paok pandap ka sang sarak karja, sang kan kathaot, brei 100 sruh radaih juak ka anek saih tarieng bac, sang kan kandah...

 Di kraong Chắc Kha (puk Bình Lợi, xã Minh Hòa), UBND huyện Châu Thành (Kiên Giang) bahrau peih mbang pakacah ghe ngo uan Tết meng kan Chôl Chnăm Thmây thun 2023 di mikva bangsa Khmer.  Thun ini, mbang pakacah hu mbaok di 25 kapul pakacah, ngan haong 250 urang pakacah mai meng dom xã, ban sit dalam huyện. Langiu di bruk pakacah ghe ngo, UBND huyện daok pambuak haong Tỉnh đoàn Kiên Giang peih dom kadha ma-in meng kan ka dom urang dalam kapul, dam dara, rahra dalam huyện, anek saih negar Campuchia daok tui bac di Sang bac Đại học Kiên Giang hu mbaok tame.

Di tỉnh Bình Phước, urang ngak nong yau daok “daok angaok pui” kayua asar pa-ok blait that laik yaom, meng 26.000 đồng sa kg di akaok vụ, urak ini trun daok 22.000 đồng sa kg. Langiu di laik yaom, asar pa-ok blait dalam bilan ini jeng trun 30%-40% duk haong bilan dahlau. Di Đồng Nai, Bà Rịa - Vũng Tàu, Bình Dương..., yaom pa-ok blait jeng laik yaom yau nan. Hu thau, pa-ok blait hu takik baoh lac kayua meng Tết Nguyên đán tal ini, hu rilo mbang hajan suan bilan dui atah, ngak kan kandah tal bruk tabiak bingu, ndam baoh, ba tal phun takik baoh. Gam haong nan, rilo doanh nghiệp chế biến padeih blei pa-ok blait di tuk paik baoh kayua abih harak pambuak bruk pablei tabiak negar langiu, ngak brei pa-ok blait laik yaom.

Patui veik khau tin ka bruk yam ndok urang negar Trung Quốc pametai urang kumei ngak brei ka drei di Bình Dương. Viện kiểm sát bhap bini tỉnh Bình Dương bahrau brei tapa dom harak khởi tố bruk nan saong brei cap kreik ong Yang Zhong Wu (umo 47 thun, negar Trung Quốc) piah pasang iek ka duas pametai manuac, rahtabiak di Công ty TNHH Vinh Nhuận di ban sit Tân Uyên. Tapa duah thau, mboh lac makna ba tal bruk ini lac kayua ong medik lac urang kumei kế toán meblah mek drap ar di công ty. Tết thun 2023, hadei di tuk nao palei negar mai gilac veik, ong mboh gilang pandap lahik biak rilo. Taphia di nan, ong mboh lac urang kumei kế toán ini peih tabiak sa cty karei hu angan deih yau cty di drei. Kayua yau nan ye, dua urang rahtabiak bruk oh njauk gauk, kamlah gauk, ba tal pametai manuac.

Tui kuhria mboh di Liên hợp quốc, Ấn Độ meda tapa mbaok Trung Quốc piah jeng taneh ia hu rilo menuac abih di dunya, lac labaih 1 tỷ 400 triệu menuac di bilan 4 ini. Yau nan, Ấn Độ meda jeng taneh ia dang akaok dunya ka menuac sia dalam thun ini. Tui jalan patagok menuac sia hu Liên hợp quốc kuhria mboh dahlau, menuac sia Ấn Độ meda hu rilo jang Trung Quốc 5 triệu menuac. Bruk ini nyu peih tabiak sa blah bahrau ka taneh ia Nam Á ni haong menuac sia tui kuhria daok tagaok jang dalam 40 thun tal. Tui kuhria mboh dahlau di Liên hợp quốc, menuac sia Ấn Độ meda hu 1 tỷ 7 ratuh rabau menuac dalam thun 2064.

Hàn Quốc hu javap jalei ka bài báo kayua New York Times ba tagok ndom lac dom jabat tình báo Mỹ pang klaik dom taneh ia đồng minh, dalam nan hu Hàn Quốc, ka dom jalan ngak di dom taneh ia ini dalam bruk daong phao ndao ka Ukraine. Jabat Tổng thống Hàn Quốc jeng brei thau lac, rajaei oh salih jalan ngak haong Ukraine, tui nan, Hàn Quốc jeng daok pataom prein tame daong ngak pahla, salih ka bruk daong pabak phao ndao.

Gah pablei salih dunya (WTO) kuhria mboh lac, yaom pandap mbang tagok 18% di mangaok dunya dalam thun 2022, dalam nan yaom ngũ cốc tagok 21%. Tui WTO, yaom khak tagok glaong jang labaih 63% duk haong yaom kuhria rah tapa yaok thun. WTO hu panuac lac, gah lý thuyết, jien ka pandap mbang glaong jang "meda pachreih bruk ngak nong rilo jang, ba tal bruk pabak pandap mbang rilo jang, saong yaom padai brah pandap mbang biar jang di harei hadei", min jeng hu panuac lac, bruk salih tapa pandar khak chit jien  meda ba tal trun năng suất phun pala saong puac di abih lac yaom padai brah pandap mbang nyu tagok veik./.