Mbang nyaom urang Quốc hội ngak bruk chuyên trách mbang ka 4, tukvak mbang 15 hu peih tabiak di dah page ini (28/8) tal harei 30/8, di Sang Quốc hội. Mbang nyaom hu brei panuac, ginum biai ka 8 danak dak hukum payua tagok Quốc hội di Mbang nyaom ka 6 anak tal, lac Hukum taneh riya (pasiam veik); Hukum pablei salih sang danaok taneh riya (pasiam veik); Hukum sang daok (pasiam veik); Hukum kaya ia (pasiam veik); Hukum Viễn thông (pasiam veik); Hukum Căn cước công dân (pasiam veik); Hukum kapul hu mbaok tame khik caga an ninh, trật tự di labik, Hukum khik ramik, daong khik danak dak quốc phòng saong labik quân sự.

Mikva urang ngak nong tỉnh Tiền Giang daok yam tame bilan yuak padai Hè Thu 2023. Urak ini jaik abih dom pajaih padai jeng pablei hu yaom glaong jang thun bloh meng 1.500 đồng tal 1.800 đồng/kg, nan ye mikva urang nong uan tabuan lo. Tui Sở Ngak nong saong Patagok palei pala tỉnh, taneh ngak padai Hè thu thun ini hu labaih 40 rabau ha. Piah pabak ka bruk pablei tabiak negar langiu, urang nong ngak dom pajah padai siam hu chất lượng glaong, ngak tui jalan GAP, jhul khang bruk ba jamriak tame ngak piah trun yaom phun jien. Padai pablei hu mbuan lagaih, yaom glaong, hu daong ka urang ngak nong hu jien mek tame rilo, ba hatai jia piah ngak brei jayah dom mbang pala hadei.

Dom thun jaik di ini, mikva di rilo labik dalam bhum ĐBSCL klaak padai vụ 3 (padai Thu Đông) piah raok ia sua. Bruk raok ia sua piah taduan mek phù sa, gam tui di nan jeng ngak hacih, tathuak ia lakhun dom mbang hadei, padai meda siam jang. Min, puac adit blaoh, ia di 2 bilai Tân Châu, Châu Đốc di akaok kraong Tiền saong kraong Hậu bahrau hu 1,7m, bier jang 25-60cm dut saong tukvak ini thun dahlau, meda bier jang jaik 1m dut saong kuhria rah tapa di rilo thun. Tui kuhria dalam adit anak tal, ia tuh mai jeng oh rilo jang, tui nan, thun ini meda daok lac thun ia ndik sit di bhum taneran kraong Cửu Long. Ia ndik sit,  ia njom mbak meda tal aval jang meng di bilan 12/2023 saong meda dui atah tal bilan 5 thun hadei.

Miuyim Biệt động Sài Gòn- Gia Định bahrau hu tabiak mbaok di phường Tân Định, Quận 1, TP.HCM. Miuyim kayua Cty TNHH Miuyim Biệt động Sài Gòn - Gia Định saong sang AH tapon nyaom bol pan phao kraong bhap bini Trần Văn Lai padang tabiak. Di Miuyim, mbang camereip abih, sa thaot binguk ka jalan padang, jalan ngak biak kandauk dalam di Biệt động Sài Gòn- Gia Định hu brei mboh dinup saong cambaih tapa  dom lubang caik phao ndao, lubang dauk lin hu padang ngak pak di dalam bhum kol khamang dalam rilo thun duh ka dom mbang taong dane angan di Biệt động dalam Sài Gòn, duh ka bruk brok tagok Tết Mậu Thân 1968. Miuyim meda pambak tabiak khang jang ilamu meng kan, abih di nyu lac dalam anek saih, SV, dalam rai dam dara, urang ranaih.

Cục Khik ramik darak pasa tỉnh Bình Dương hu payua harak gar bruk pablei salih yaok ribau tapuk siphau ja ka Jabat Cảnh sát pasang iek, Công an ban Thủ Dầu Một, tỉnh Bình Dương langyah tui thẩm quyền.  Dahlau di nan, jabat chức năng peih bruk pasang iek di Công ty TNHH tapuk saong pandap panda pato magru Duy Ngân di ban Thủ Dầu Một. Tukvak pasang iek, kapul chức năng hu duah mboh jaik 3.500 blah tapuk siphau dom janih daok hu pablei min oh hu harak adat, biar brei thau cambaih ka asal di nyu. Tapa pasang iek hu brei thau lac, dom blah tapuk siphau jeng lac pandap ngak ja di Gah xuất bản pato magru Việt Nam. Abih tih yaom dom tapuk ini jaik 200 triệu đồng.

Talei pambuak bruk quốc phòng di Australia saong Philippine daok hu patagok tuk 2 taneh ia jaik ini bharau peih bruk pasram quân sự haong gauk mbang camereip abih. Akaok Mintri Quốc phòng Australia ndom lac, 2 taneh ia lac “biak jaik gauk, lac ayut sahabat” saong 2 gah jeng “sanya gauk khik caga sron mon, tani tanat, ginup meda bhum taneh, labik dom taneh ia tự do peih ngak quyền ngak po di drei lagaih haong adat hukum dunya”. Gam haong nan ndom lac, dua taneh ia daok hu rilo bruk ngak quân sự haong gauk di anak tal, dalam nan hu bruk tui iek haong gauk di Biển Đông tui sanya khik ramik hòa bình saong an ninh dalam bhum.

Tui yaok pataom hu pathau khan di Hàn Quốc brei mboh lac, labaih 1,26 triệu urang ranaih umo thun di negar ini jeng ka oh hu bruk ngak hadei di tuk bac tamat blaoh. Tui hãng tin Yonhap, tui kuhria ranaih hadei di tuk bac tamat blaoh brei hu labaih 10 bilan piah duah hu bruk ngak camriep. Labaih 15,3% dom urang ranaih, samu 591.000 urang brei thau lac, njauk lahik labaih 2 thun hadei di tuk tamat blaoh meng duah hu bruk ngak. Tui paka di Rajaei Hàn Quốc mboh lac, bruk ngak duh ka dom urang daok di umo thun 20 saong 40 hu trun, dalam tuk bruk ngak duh ka dom urang di umo labaih 50 lac tagok khang.

Hãng Thông tấn negar Triều Tiên brei thau panuac khan di Jabat pacang caga jit ruak samar drah pakat negar Triều Tiên lac, "rahra daok di negar langiu hu adat mai veik". Panuac khan nan jeng hu ndom lac bruk brei peih pabah mbang negar ini nyu lagaih haong dom ramik veik ka bruk pacang jit hadei di tuk jit praong COVID-19 di dunya trun pandiak. Ini lac mbang camereip abih Triều Tiên peih pabah mbang negar piah taduan raok rahra daok di negar langiu mai veik taneh ia hadei di jaik 3 thun ngak catang piah pacang  COVID-19.