Di mbang nyaom, Thủ tướng Phạm Minh Chính brei thau lac, thun 2022, rajaei peih 9 mbang nyaom asal kadha ndem ka bruk padang hukum, sarak, brei panuac, brei tapa 40 danak, ieu kakei padang ngak hukum, dom mbang nyaom, danak dak, ieu kakei hukum rilo abih dalam dom thun tapa. Bruk padang ngak, salah dom sarak meda hu jalan ngak siam lagaih, dak harei dak hu ba tame ngak tani tanat, dak harei dak hu ilamo jang, khik tani tanat bruk ngak, chất lượng. Min, bruk ngak ini daok hu rilo bruk njauk ngak piah pasiam sarak, pamadeih dom gah piah pabak bruk cak rok patagok samar jang, khang kajap.

UBND tỉnh Bình Dương bahrau peih pakak danak dak padang ngak jalan saong tatua pambuak tỉnh Bình Dương saong tỉnh Tây Ninh. Danak dak hu yaom phun jien buh tame abih tih jaik 412 tỷ đồng, hu 6 jalan radaih, brei peih nduac 80km sa tuk, mbaok jalan meng bê tông nhựa pandiak. Jalan hu daong pasiam bruk nao mai di tỉnh Bình Dương saong tỉnh Tây Ninh, duh ka bruk nao mai saong pajeng ba pandap panda di bhap bini 2 tỉnh, jhul patagok bruk ngak mbang, KT daong palagaih bruk du lịch.

Thun ini, gah kaya tasik dalam taneh ia patagok khang, kim ngạch pablei tabiak negar langiu glaong abih kuhria meng dahlau mai ngan haong labaih 10 tỷ USD. Dalam nan taeng tỉnh Đồng Tháp llac thun jayah, tui kuhria tal puac thun ini, taong abih yaom ngak tabiak kaya tasik di tỉnh hu 12.831 tỷ đồng. Đồng Tháp lac tỉnh ngak tabiak ikan pra praong abih di Bhum taneran kraong Cửu Long, meblah jaik 35% sản lượng ikan pra dalam bhum. Tỷ trọng kim ngạch pablei tabiak negar langiu kaya tasik meblah jaik 40% dut saong taneh ia; pabak labaih 60% sản lượng pajaih ikan yaok thun ka bhum Taneran kraong Cửu Long.

Thun 2022, Long An jak ba hu jaik 500 tỉ đồng padang ngak dom danak dak, peih ngak dom bruk kein laba ka raidiuk, ka rahra dalam tỉnh. Dalam nan praong di abih lac ngak tatua, ngak cống, ngak jalan palei, brei yaok rabau drei lamo pajaih ka sang kathaot, padang ngak, pasiam veik yaok ratuh baoh sang anit ranam, padang ngak rilo sang bac, daong jien bac ka rilo anek saih, SV saong daong bruk pacang caga jit COVID-19… Ini lac danak dak hu makna siam, daong ka dom sang kan kandah, abih di nyu lac sang njauk bala COVID-19 hu pabak prein khang piah yam tagok.

Daok dalam dom bruk ngak di Harei pataom arieng Cà Mau – mbang ka 1 thun 2022, bier harei 25/12, di Quảng trường Thanh Niên, Phường 5, ban Cà Mau hu peih bruk pacacah Patao ngak ging meng arieng saong brei angan kỷ lục 69 pandap mbang ngak meng arieng Cà Mau. Hu 15 kapul hu mbaok tame ngak dom pandap mbang. Hadei di jaik 2 maong pacacah, Nhà hàng Hoàng Hôn-Đất Mũi, huyện Ngọc Hiển, biak naih mek hu jai Nhất pacacah patau ngak ging meng arieng, ngan haong yaom jai thuong lac 20 triệu đồng. Tapa nan, kapul Kỷ lục Việt Nam hu jao harak pok angan kỷ lục Việt Nam ngan haong kadha “bruk ngak saong pathau khan dom pandap mbang ngak meng arieng Cà Mau rilo abih di Việt Nam (69 janih pandap mbang)” ka Sở Ilamo, Thể thao saong Du lịch tỉnh Cà Mau.

TTK Liên hợp quốc brei mboh hatai suh sah ka bruk oh brei urang kumei ngak bruk ka dom kapul nyaom langiu rajaei di karja Taliban di Afghanistan. TTK sa mbang tra ndom lac taong abih urang kumei jeng hu quyền hu mbaok tame kapul ngak bruk, rik daong ba mai dom kein laba, siam mekre jang. Adat di karja Taliban meda ngak brei trun prein ngak bruk di rilo kapul nyaom di Afghanistan dalam bruk daong ka dom urang mbuan gaok bala, abih di nyu lac urang kumei saong uranaih kumei.

Rajaei Ấn Độ brei pabak pandap mbang oh mek jien ka labaih 813 triệu urang kan kathaot di dalam sa thun tui Hukum An ninh pandap mbang pakat negar (NFSA). Urak ini yaok bilan Rajaei Ấn Độ jeng daok pabak 5kg ngũ cốc ka yaok urang. Danak dak ini meda dui atah tal bilan 12-2023. Kanja rajaei Ấn Độ brei thau lac, bruk ngak bahrau abih di kanja lac “brei dom paok hadaih thun bahrau ka urang kan kathaot di dalam taneh ia”. dom urang hu mbang tui meda oh njauk biyar jien hagait piah hu pandap mbang.

Hu takik di abih 20 urang metai saong 6 urang karei njauk rambus kayua pui khuah di melam 23/12 di sa viện dưỡng lão tư nhân daok di 1 ban dalam bhum Tây Siberia di Nga. Dom urang iek gah adat hukum brei thau, makna di bruk khuah lac kayua pandar ging hơ pui oh njauk./.