Harei ini (8/5), labaih 5.500 urang pakacah tut angan tame mbang pakacah sap Hàn saong pasang iek tangin ngak ka dom urang ngak hu hatai caong tut angan piah pilih ruah nao ngak bruk di Hàn Quốc tui Danak dak Brei adat bruk ngak ka urang ngak negar langiu di taneh ia ini yam tame harei pakacah camriep di Hà Nội. Hadei di nan, harei 9/5, labaih 12 ribau urang pakacah yam tame mbang pakacah di Đà Nẵng saong harei 10/5, labaih 5.500 urang daok veik hu mbaok tame pakacah di ban raya Hồ Chí Minh. Dom urang hu mbaok tame mbang pakacah brei tapa 2 mbang pakacah, lac mbang ka 1 (pakacah ndom puac sap Hàn) saong mbang 2 (pasang iek tangin ngak bruk saong taong yaom prein ngak). Thun ini, dom urang pakacah sap Hàn hu rilo di abih kuhria dalam 10 thun mai ini. Bruk bo Hàn Quốc caik ka urang ngak lac: Ngak pandap, ngak nong saong ngak gah padang sang danaok.

Tui yaok pataom di rilo sang bac ĐH, tal tukvak ini, dom anek saih tut angan plih ruah aval trun khang duk haong thun 2022.  Dom anek saih tut angan pilih ruah tame ĐH quốc gia TP.HCM urak ini bahrau samu 25% duk haong tukvak ini thun blaoh. Dalam tuk nan, dom anek saih tame pakacah taong yaom prein bac di ĐH tagok tal jaik 10 rabau adei. Dom labik pato pakai karei jeng hu dom anek saih pilih ruah aval trun. Dom urang pan akaok dom sang bac mboh lac, meda kayua tukvak taduan harak gar pilih ruah aval di dom sang bac dui atah nan ye anek saih daok sahneng kuhria bruk tut angan hatai caong. Gam haong nan, dom adei jeng daok cang thau ka bruk bac tal 12 nyu yau habar blaoh ka meng duah jalan pilih ruah siam di abih.

Kong doan dom KCX – KCN Ban raya HCM birau peih harei pataom “ Kong doan kayua urang ngak, urang ngak kayua D.N” pachreih labaih 5.000 urang đaon saong urang ngak kong hu  mbaok tame. Di harei pataom, 458 urang ngak naih gheih  hu rilo roh duah birau, hu ba tame ngak bruk, hu pok meyaom. Langiu di nan, danak dak daok jao brei paok jien bac “ Pagam sauk caong khin”ka dom anek kamuan di urang ngak kong metai kayua COVID-19; sang ka labaih 3.700 urang ngak kong gaok bala tuk ngak bruk, ruak trak, lahik bruk ngak, trun jien mek tame saong raidiuk kan kandah kayua jit ruak COVID-19.

Jaik di ini, bruk pablei hadang ia meteh mbak meteh taba haong hadang ia mbak di bhum ĐBSCL gaok kan kandah, yaom hadang trun khang, dalam tuk nan jien sahui piah raong tagok glaong, langik oh lagaih, ngak ka rilo urang raong khat trak. Duk haong tukvak dahlau tết nguyên đán 2023, yaok kg hadang thẻ yaom trun meng 50-70 rabau đồng/kg. Dalam tuk nan, jien sahui piah raong hadang công nghệ biak glaong, yaom pandap mbang, jru thú y, yaom điện, menuac ngak, jeng tagok glaong. Tui panuac khan di urang raong hadang, makna ngak brei yaom hadang trun lac kayua pablei tabiak negar langiu suai damuai, dalam tuk nan mbaok taneh raong hadang di bhum ĐBSCL dak harei dak tgaok glaong.

Dalam dom harei tapa, di dom tỉnh Bình Phước, Bình Dương, Đồng Nai...,yaom amriak kalu hu dom labik blei yaom labaih 70.500 đồng/kg, tagok 1.000 đồng/kg dut haong dom harei dahlau. Tui ong Bùi Quốc Hai, Yam ndoc HTX amriak kalu khang kajap Hưng Phước (xã Hưng Phước, huyện Bù Đốp, tỉnh Bình Phước), urak ini yaom biar jang meng 10 tal 15% dut saong tukvak ini thun blaoh yau nan ye ralo urang pala amriak kalu oh ka pablei hu. Tui urang pala amriak kalu di Lâm San (huyện Cẩm Mỹ, Đồng Nai), yaom amriak kalu meda tagok yau nan ye mikva urang ngak nong patui khik veik cang yaom tagok.

Dalam dom bruk di mbang tapa ravang Hàn Quốc di Thủ tướng Japon Fumio Kishida, 2 urang pan akaok 2 taneh ia hu taom gaok pakat glaong abih di ban ine Seoul. Dua urang pan akaok hu panuac lac bruk pasiam veik talei pambuak bruk Hàn Quốc- Japon meda ba mai kein laba praong ka bhap bini 2 taneh ia, saong njauk gauk brei patagok talei pambuak bruk tagok glaong jang di anak tal. Dua urang pan akaok dua taneh ia pok meyaom bruk pambuak gauk abih bruk dalam gah an ninh saong kinh tế, dalam nan hu gam bruk ginum biai an ninh nao mai di dom jabat ngoại giao saong an ninh, ndom biai nao mai gah an ninh kinh tế.

Dalam tuk mbuan gaok kan kandah gah chính trị taneh ia  saong khat lahik gah kinh tế, Trung Quốc brei tagok bruk khik piah ameh dalam bilan ka 6 gam gam. Khik piah ameh  di taneh ia ini  kuhria tal puac bilan 4 sumu 2.076,47 tấn. Ameh proh tagok yau sa drap ar piah kandauk hu salamat salam tuk gilang pariak oh tani tanat, chính tri taneh ia  saong bruk ngak mbang kinh te  gaok kan kandah. Gilang pariak  negar dom taneh ia hu blai ralo ameh piah hu ralo janih drap ar saong khik caga anak bruk kan kandah pambak tal jien dola trun saong bruk kạm phát tagok.

Urang jakar Philippines bahrau daong hu ka 1.090 urang meng rilo taneh ia châu Á njauk urang pachot ba tapa pablei di taneh ia ini, njauk mek kreik saong kateik greik ngak bruk pachot urang tapa online. Dom urang nan njauk kol pablei salih menuac mek padauk passport, oh brei nao halei saong kateik ngak bruk 18 mon sa harei, kateik ngak dom bruk pachot tapa online. Dom urang nan njauk kateik greik pagun sanya angaok mạng haong dom menuac daok di Mỹ, Canada, châu Âu, sanya  "padang harei hadei siam mekre haong gauk", blaoh pachreih urang blei jien điện tử atau payua jien tame tài khoản gilang pariak. Bruk pachot online dalam bhum Đông Nam Á dak harei dak tagaok khang, ngak ka urang jakar ngak praong di dom taneh ia tabiak panuac brei thau ka bruk pablei salih menuac, kateik urang ngak dom bruk pachot, blei saleik.