Mentri Tài nguyen saong moi truong pambuak saong Danak dak patagok LHQ peih ngak di harei 12/5 di Hà Nội

Mbang peih pakak taong abih gah pakat glong “Nyaom biai dunya ka kinh te đại dương khang kajap saong Lagaih haong bien doi khi hau” kayua Mentri Tài nguyen saong moi truong pambuak saong Danak dak patagok LHQ peih ngak di harei 12/5 di Hà Nội. Nyaom biai hu ginum biai dom bruk lagaih hu makna praong dalam bruk jhul pakhang, pandar khang kajap dom kaya kan di tasik jeng yau dom kan kandah praong di bruk sraw kadau di Covid -19, bien doi khi hau saong nerak alam moi truong, dalam nan hu Thỏa thuận dunya ka bruk nerak nhựa di tasik praong.

Dalam 4 bilan akaok thun 2022, bruk mek tame kadung jien karja meng taneh riya di TPHCM hadah hadai jang tuk tagok tal labaih 12.600 tỷ đồng (meblah 10,5% jien mek tame). Min, jeng dalam 3 bilan meng akaok thun 2022, Cục Thuế TP.HCM peih ngak catang, langyah 10.876 harak chuyển nhượng taneh riya sang danaok, mek tame hu rilo jang 180 tỷ đồng brei kadung jien . Ong Thái Minh Giao- Phó akaok Cục Thuế TP.HCM brei thau, hu rilo urang khan yaom taneh riya sang daok song jabat jien je bier jang yaom biak di nyu. Bruk ni, ngak kan kandah ka jabat kak je dalam bruk duah thau yaom pablei salih biak di nyu.

Piah rik daong patrun patakik khat lahik kayua dom mbang khuah patuh, Tập đoàn jhik menyim Việt Nam (Vinatex) pambuak haong Tập đoàn Sơn KOVA hu ba tame pandar cong nghe Nano, roh duah saong ngak tabiak hu siam khan bai pacang apui khuah VINATEX – KOVA. Khan bai pacang khuah VINATEX – KOVA daong khik urang pandar tuk gaok apui saong oh mblung sauk, meda jhik khan ao pacang rup ka urang ngak dalam dom bruk hu taom gaok nhiệt độ glong saong jru yau: Menyek, điện, kuac mek mỏ, gah kapal haok; gam haong brei pandar ngak pandap pandar yaok harei yau ye: panieng pabah mbang, tạp dề, khan me-om radaih…

Tui yaok pataom di Chi cục pala drak song khik ramik phun pala tỉnh Hậu Giang, urak ni hu labaih 2.600 ha padai Hè thu njom anek ruak plai kaik , tagok jang 700 ha dut song adit dahlau. Bruk njauk duh hatai abih lac dalam tuk vak ni hu jiak 1.000 ha padai Hè thu dalam tuk vak tabiak dhar njauk njom ruak đạo ôn hala. Langiu di nan, dok hu labaih 600 ha padai Hè thu njauk halak mbang phun, halak balik hala, ruak vàng lùn… plai kaik

Ong Nguyễn Hồng Tâm, Pho Yam ndoc Pasak pasang iek ruak kik Ban raya HCM brei thau, kuhria tal jala pandiak 12/5, ban raya hu 7.129 urang ruak pandiak tabiak darah, tagok 10,77% dut saong tukvak ini thun dahlau. Dahlau di nan, urang ruak trak lac 158 urang, tagok labaih 5 mbang dut saong tukvak ini thun dahlau. Urak ini Ban raya hu 6 urang metai. Tagok 200%. Ong Tâm brei thau, ini lac jit ruak biak njuak brei thau paglong. Gah Y tế tui iek catang bruk pacang caga. Bhap bini njauk brei caik hatai meyah mboh pandiak, gah li-ar pandik ta-lang oh thau kayua halei, atau tagok tanut bong darah anagok kalik ye samar nao iek ruak saong taong ruak di labik y tế.

Ngoại trưởng nyaom dom taneh ia ngak cong patagok dang akaok dunya (G7) harei 12/5 hu taom gauk di Đức piah ginum biai ka bruk mesruh gauk di Ucraina song bruk yak klaak pacang veik yaok triệu tấn ngũ cốc dok kandong veik di Ucraina kayua tavak tavaiy di bruk mesruh. Bruk ngũ cốc oh pajeng ba hu ba tal bruk kurang pandap mbang di yaok triệu menuac, abih di nyu nan lac di bhum châu Phi song Trung Đông – dom labik blei rilo ngũ cốc meng Ucraina.

Hadei di sa tukvak katut panak sahaneng kuhria, Tổng thống saong Thủ tướng Phần Lan birau hu panuac pachreih tui bruk tame NATO, yam tal jaik jang bruk jeng taneh ia di lien minh quan su kayua Mỹ ba kaok. Ini lac “jalan vaih sajarah dakrai” di taneh ia Bắc Âu tuk klak sarak dang kreh dui atah dom pluh thun tapa. Tui kuhria mboh dahlau, Thụy Điển nan lac taneh ia hu tui sarak oh pambuak bruk quân sự, jeng daok hu jalan nao dreih nan hadei meng panuac di dom urang dang akaok Phần Lan.

Mintri Lao động Mỹ bahrau brei thau bruk lạm phát di gah kinh tế prong abih di dunya bilan 4 meng bloh tagok 8,3% dut song tuk vak ni thun bloh , gam song nan lac bilan ka 2 gam gam dalam thun ni lạm phát yam tapa labaih 8%. Yau nan lạm phát di Mỹ dalam bilan 3 (8,5%) song bilan 4 thun ni jeng tagok tal tanut glong di abih dalam labaih 40 thun tapa, kuhria meng bilan 12/1981./.

Urang lang: Hani Pha – Bhumi – 13/06 10:37:06