Thủ tướng Phạm Minh Chính song dom urang pal akaok ASEAN taom gaok dom doanh nghiệp Hoa Kỳ

Patui danak dak mbang nyaom ka 11, harei ini UBTV QH Ginum biai var tamat. Anak var tamat, UB TVQH pasang iek bruk kuhria caga jalan parabha phun jien meng kadung jien karja pakat negar vaktu 2021-2025 saong thun 2022 ka dom mentri, jabat trung ương saong palei peih ngak 03 danak dak pakat negar; pasang iek bruk pabak kadung jien trung ương thun 2022 dalam negar brei parabha ka dom mentri, dom gah, palei. Jeng dalam harei ini, UB TVQH brei panuac ka bruk pok tagok QH pasang iek, ba tabiak jalan buh jien tame vaktu ka 1 dom danak dak peih ngak jalan peih radaih drah samar Châu Đốc – Cần Thơ - Sóc Trăng; Khánh Hòa - Buôn Ma Thuột; Biên Hòa -Vũng Tàu.

Melam 12/5 (tuk vak pak ni), di Washington D.C.(Hoa Kỳ), Thủ tướng Phạm Minh Chính song dom urang pal akaok ASEAN hu mbaok tame var payak di Tổng thống Hợp chúng quốc Hoa Kỳ Joseph Robinette Bidenr. Jeng cala pandiak harei nan, Thủ tướng Phạm Minh Chính song dom urang pal akaok ASEAN taom gaok dom doanh nghiệp Hoa Kỳ piah ginum biai bruk pambuak gauk gah kinh tế.

Harei ini, di Heron Lake Golf Course & Resort Vĩnh Phúc hu rah tabiak dom asar kadha pakacah Vòng 1 ka urang likei, kumei di môn Golf di SEA Games 31. Mbang pakacah di U23 Viet Nam saong U23 Myanmar rah tabiak mong 19 tuk melam ini. Dahlau di nan, melam 12/5, Mbang peih pakak Nyaom roya Padhih thao Đông Nam Á mbang 31 – thun 2021 (SEA Games 31) peih ngak dalam praong prang saong hadah tanyiak sambo mau di Mblang vận động pakat negar Mỹ Đình di Ban Ine Ha Noi hu mbaok di 11 kapol the thao taneh di bhum Đông Nam Á. Peih tabiak tal harei 23/5, SEA Games 31 hu 40 môn pakacah, hu peih pakacah di Hà Nội saong 11 tỉnh, ban jiak taphia.

 HĐND tỉnh Tây Ninh mbang ka X, tuk vak 2021 - 2026 dok peih mbang nyaom ka 3, pasang iek, ginum biai dom asal kadha kayua UBND tỉnh pok tagok ka 5 dự thảo Sarak, dalam nan hu sarak dong sa mbang ka gah hu mbaok tame pacang jit COVID-19. Tui nan, di mbang nyaom dom urang HĐND tỉnh Tây Ninh hu pasang iek, brei panuac piah ka HĐND tỉnh Tây Ninh batabiak sarak dong sa mbang ka gah hu mbaok tame pacang caga jit COVID-19 dalam tỉnh. Tui kuhria hu labaih 4.400 urang hu brei bruk ngak tapak, labaih 16.500 urang ngak bruk gián tiếp hu mbaok tame pacang caga jit  song jiak 700 urang njom COVID-19 tuk ngak bruk pacang caga jit hu mbang tui sarak ni . Tui kuhria abih tih pok jien peih ngak sarak ni lac labaih 34 tỷ đồng. 

Melam 12/5, yaok ribau bhap bini saong Phật tử tuh mai baha Pháp Hoa (jalan Trường Sa, Quận 3, Ban raya.HCM) piah hu mbaok tame adat palao gom bingu di kraong Nhiêu Lộc uan raok Đại lễ Phật Đản. Adat palao gom bingu lac bruk kayua baha Pháp Hoa peih ngak di bilan Phật Đản yaok thun. Ini lac harei pataom palao gom bingu praong abih di Ban raya HCM. Harei nan baha Pháp Hoa jeng hu ramik ngak hadah tanyak ngan haong yaok rituh gom lồng saong bingu sen, ngak brei hadah mekre di jalan tapen kraong Nhiêu Lộc.

Hãng thông tấn negar Triều Tiên (KCNA) harei 13/5 brei thau, negar ni hu 6 urang metai kayua COVID-19 song labaih 18.000 urang mboh pandiak dalam negar, lac sa harei hadei di tuk hu urang njom camereip abih kayua biến thể Omicron song brei peih hệ thống khẩn cấp glaong baih piah pasang iek jit ruak.

Harei 12/5, Thẩm phán pakat 1 Tòa án tối cao Nhật Bản atah klak panuac lac oh hu duis di luật sư saong khik tamo guk chung thân ngan haong Yasumasa Shibuya, pametai adei Nhật Linh di thun 2017. Kamuan Nhật Linh lahik di harei 24/3/2017, angaok jalan nao sang bac tieu hoc. Jabat chức năng duah mboh atau adei 2 harei hadei nan di ribaong ia atah di sang 10 km. Bruk nan ngak haduh hatai bhap bini Viet di Nhat Ban saong urang Viet dalam taneh ia. Kadha ngak pandik hatai manuac sia lac Shibuya lac urang akok kapol amaik ame dalm sang bac di kamuan daok bac.

Phó Thị Trưởng Manila, muk Honey Lacuna hu ngak jeng sajarah, hadei di tuk hu brei pqanuac lac urang kamei thị trưởng camereip di ban ine taneh ia dalam mbang plaik phiếu palih ruah labaih 18 ribau urang ngak praong di Philippines. Dahlau di nan, muk Lacuna jeng lac urang lac kamei phó Thị trưởng camereip abih di ban tuk hu palih ruah tame dalam thun 2016 ala saman urang dahlau deih ngak Tổng thống lac Joseph Estrada./.

Urang lang: Hani Pha – Bhumi – 13/05