Thủ tướng Chính phủ Phạm Minh tadhau ayuh 115 urang vak, kapol urang cih vak hu jao giải

Melam 21/6, bruk alin brei Giải Báo chí pakat negar mbang XVI, thun 2021 nan Giaỉ thưởng glong abih di gah mbao chí dalam negar peih ngak dalm praong prang di Cung Ilamu Lao động Hữu nghị Việt Xô - Hà Nội. Tadhau ayuh 115 urang vak, kapol urang cih vak hu jao giải Giải Báo chí pakat negar mbang XVI, thun 2021, Thủ tướng Chính phủ Phạm Minh Chính mboh lac: Giai thuong harei ini piah hadar tal dhar phol dom urang cih vak mbao hu rik daong bruk hu maka praong  dalam dom bruk ngak siam, jak jeng di taneh ia dalam thun 2021, sa thun yam tapa dom kan kandah oh ka bhian mboh kayua jit ruak. Kadha vak: “Dom harei oh var!” di nyaom urang dalam Liên chi hội nhà báo Rayo sap ndem Viet Nam lac 1 dalam 10 kadha hu Giaỉ A.

Jeng dalam harei 21/6, Hội Nhà báo TP.HCM peih bruk jao giải báo chí TP Hồ Chí Minh mbang ka 40 thun 2022. Hu 65 giải thưởng hu pok brei dom kadha báo chí gheih di abih, dalam nan hu 5 giải nhất, 14 giải nhì, 21 giải ba saong 25 giải khuyến khích. Jeng tapa nan, mBan Tuyên giáo Thành ủy, Hội Nhà báo TP.HCM hu pok meyaom 13 kadha báo chí di 13 jabat báo chí Trung ương daok di ban raya. Jabat rayo sap ndom VN daok di TP.HCM hu pok meyaom dom kadha vak "TP.HCM kajap bruk dang akaok kapal di taneh ia".

Var ndem biai bhap bini thông minh dunya ( iew lac ICE) pok meyaom Bình Dương lac sa dalam Top 7 bhap bini hu Bruk peih ngak suai lavik patagok thông minh naih gheih di dunya di thun 2022 di melam 21/6. Sa ban raya hu tame Top 7, dahlau abih njauk brei hu 6 tanut biak kan di ICF ba tabiak nan lac: Pambuak - Băng thông rộng; Urang ngak; Salih birau hadah krah; Sumu gauk dalm bruk taduan kỹ thuật số; Pachreih tui saong Khang kajap. ICF brei roh duah saong taong yaom yaok rituh ban raya di dunya piah palih ruah tame Top 21. Hadei di nan, dut iek saong taong yaom tani tanat palih tame Top 7 dom ban raya hu chiến lược patagok ban ray thông minh abih. Ini lac mbang ka 2, bhum thông minh Bình Dương hu tame Top 7, sumu  haong dom đô thị thông minh di dunya. 

Meng biar harei 21/6, yaom Xăng E5RON92 tagok jang 185 đồng/lít , jeng 31.302 đồng/lít; Xăng RON95-III: tagok 498 đồng/lít, jeng 32.873 đồng/lít. Dom janih menyek tagok jang meng 378 – tal jaik 1000 đồng/lít (tui janih). Yaom dom janih xăng menyek dalam jaik 10 harei tapa daok tagok, abih di nyu lac dom janih menyek diesel haong meyek khaih. Makna lac kayua bruk pabak xăng menyek ka darak pasar dunya daok takik nao meng bruk Mỹ saong dom taneh ia Châu Âu pakauk blei pandap meng Nga.

Tui urang ngak praong UB bhap bini huyen Thuận Bắc, tỉnh Ninh  Thuận, dalam huyen hu 9 labik ba ia pandar praong ralo kayua Pasak Ia hacih saong Hacih alam moi truong palei pala tỉnh khik iek labaih 1.557 bingun ia. Yau nan min, kayua pandiak dui atah yau nanye dom bingun kuac meng mac, bingun kuac rok daok thun lagu, oh ginup ia ka bhap bini pandar. Yau nan ye, karja palei khin Bộ Chỉ huy Bol lin Biên phòng tỉnh pajeng ia hacih ma labik bhap bini kurang ia abih piah pabak ka bhap bini ngan haong 24 m³ dalam sa harei. UB bhap bini huyen tacei tabiak xã, palei pathau khan ka dom baoh sang bhap bini ka bruk pandar ia patak pataom, gam brei ngak dahlau bruk pasang iek labik piah kuac bingu, kuac, pasiam dom bingun ia dalam bhap bini  piah duah ia pandar dalam tukvak kan kandah ini.

Ia ndik ia sua jeng daok rah tabiak khang di rilo labik di bhum Nam Á lac Bangladesh saong Đông Bắc Ấn Độ dalam harei 21/6. Takik di nyu hu  69 urang metai kayua hajan ia sua dui atah rilo harei tapa di labik ini. Di Bangladesh, tui Kadung jien uraniah Liên hợp quốc, 90% bilai y tế di taneh ia ini njauk ia dauk rilo harei ini mai, tui nan mbuan tamuh tabiak dom ruak kayua ia nerak tachauk. Dalam tuk jaik 10 triệu menuac daok gar saong oh taduan hu pandap mbang saong ia menyum uống.

Ruak đậu mùa khỉ daok njom pambak di rilo taneh di dunya ya. Gah Y tế Dunya mbiah tal ini hu labaih 2 ribau 100 mbang urang njom ruak đậu mùa khỉ saong sa urang metai di 42 taneh ia di dunya, dalam nan 84% dom urang njom ruak di châu Âu. Tui Gah Y tế Dunya, dom urang njom ruak meda tagok glong jang. Tui kuhria dahlau Gah Y tế Dunya brei ginum biai chip di harei paguh 23/6 piah duah thau mbang tamuh jit ruak đậu mùa khỉ urak ini langiu bhum Tây saong Trung Phi hu jeng bruk y tế công cộng chip ngak dunya haduh hatai huac ha-oh.

Harei 21/06, Duma Quốc gia Nga brei tapa dalam mbang ginum biai ka 3 ka hukum brei blei tame meng negar langiu pandap panda bo oh cang hu bruk njauk hatai brei di gah ngak pandap atau urang khik bản quyền. Hukum hu ba tabiak piah khik caga kinh tế saong rahra Nga anak dom bruk taong phạt di phương Tây./.

Urang lang: M. Phương & Bhumi – 22/06