Mbang nyaom ka 6, Quốc hội mbang 15 hu peih tabiak di dah page ini (23/10), di Hội trường Diên Hồng, Sang Quốc hội. Mbang nyaom ini, tui kuhria Quốc hội pasang iek, brei tapa 9 hukum dalam nan hu dom Danak dak hukum hu makna praong yau ye Hukum taneh riya pasang veik, Hukum sang danaok pasiam veik, Hukum pablei salih sang danok taneh riya pasiam veik, Hukum dom kapul brei masaiy jien pasiam veik; Quốc hội jeng brei panuac  mbang camriep ka 8 danak dak hukum karei. Tui hatai caong, Dự thảo Hukum taneh riya pasiam veik hu brei tapa meda khik caga siam jang kein laba di urang hu taneh njauk pataom mek. Ini lac mbang nyaom biai hu makna ka bruk dak padang hukum saong brei ngak dom bruk hu makna di taneh riya, hatai caong, dom sarak di Quốc hội di Mbang nyaom ini meda pabak hu panuac ieu kakei di bruk anak mata dalam raidiuk jang yau hatai caong maong di rahra saong di gah doanh nghiệp.

Melam blaoh, di Hà Nội rah tabiak bruk jao giải mbang pakacah Chính luận ka khik caga jalan sahneng di Đảng mbang ka 3 thun 2023. Hadei di labaih 9 bilan peih tabiak, bruk pakacah hu ngak jeng prein pambak praong dalam gah chính trị di grauk 63 tỉnh, ban dalam taneh ia haong labaih 300 rabau kadha payua tame pakacah,, rilo jang jaik 3 mbang duk haong Bruk pakacah thun blaoh. Rilo kadha brei mboh bruk hadah krah di Đảng, tui jalan pambuak di padang haong pacang, mek siam mekre jhul kadun likuk kanjah jhak. Rilo kadha brei mboh bruk mesruh hu siam lagaih haong bruk pacuh pajarak di kol khamang dalam tukvak tapa. Rayo sap ndom VN mek hu 1 giải A haong kadha "Cagar veik bruk ndom puac oh njauk ka Đảng Cộng sản Việt Nam" di kapul urang vak Ban Thời sự. 

Ban Cần Thơ bahrau brei tapa Sarak Quy hoạch ban Cần Thơ tukvak 2021 - 2030, pamaong tal thun 2050. Quy hoạch hu padang ngak di asal kadha tani tanat gam gam, hu bruk pato veik ka rai hadei, lagaih haong bruk quy hoạch taong abih gah di taneh ia, quy hoạch gah dalam taneh ia, quy hoạch bhum ĐBSCL saong quy hoạch pakat ban hu peih ngak dalam tukvak tapa. Quy hoạch ban jeng ba tabiak dom jalan langyah khik ramik, pasang iek bruk cak rok patagok đô thị hu bruk salih gauk di dom bruk quy hoạch klak saong quy hoạch bahrau tani tanat lagaih di kein laba di kanja, rahra saong urang buh jien tame.

Harei kabroi, amuk Dương Cẩm Thúy, Chủ tịch Hội Điện ảnh TP. Hồ Chí Minh, akaok mban peih harei pataom phim katut TP. Hồ Chí Minh thun 2023 brei thau, ini lac mbang camereip TP Hồ Chí Minh peih harei pataom phim katut piah duah tabiak dom kadha gheih di abih di janih phim ni. mBan peih bruk taduan hu 96 phim payua tame pakacah, lac 60 phim truyện, 23 phim tài liệu saong 13 phim hoạt hình di dom urang chuyên nghiệp gam dom urang ngak phim daok ranaih umo meng grauk labik dalam taneh ia ngan saong rilo asal kadha, meng phim sajarah saong ilamu cách mạng, raidiuk mbang ngui daok dang, khik caga alam môi trường, pacang caga jit ruak COVID-19... Klau kadha hu mban peih bruk sangka taong yaom lac dom kadha brei mboh bruk sahneng duah dalam nghệ thuật, pamaong tal pato pakai, lagaih haong ilamu meng kan siam mekre di taneh ia, pok paglaong anek menuac Việt Nam.  

Tỉnh Đoàn Khánh Hòa, Sở Pato magru tỉnh pambuak  haong Kadung jien bac Vừ A Dính – Jabat gah maraong negar saong Kalup kapul “kayua Trường Sa - Hoàng Sa anit ranam”bahrau peih bruk jao 210 paok jien bac ka anek saih bangsa takik saong anek mbik di dom urang taong cap ikan gaok kan kandah dalam tỉnh, 50 paok jien bac ka anek saih di Sang bac caga ka Đại học Bangsa Trung ương Nha Trang. Tỉnh Khánh Hòa hu 124 labik pato magru hu anek saih bangsa takik. Anek saih lac anek mbik di urang taong cap ikan pataom rilo abih di dua ban Cam Ranh, Nha Trang, ban sit Ninh Hòa, dua huyện Cam Lâm saong Vạn Ninh. Dom thun tapa, meng sarak di Đảng, Kanja, dom kadung jien bac rik tame daong ka dom anek kamuan di bhum mikva bangsa takik, anek mbik di dom urang taong cap ikan gaok kan kandah hu nao tal sang bac.

Tổng thống Mỹ Joe Biden harei kabroi (22/10) hu ndom biai tapa phone haong Thủ tướng Ixraen Benjamin Netanyahu. Dua gah hu ginum biai dom bruk rah tabiak di Ga-da saong dom labik jaik taphia nan. Tổng thống Joe Biden pok meyaom 2 kapul radaih pajeng pandap ngak pahla camereip abih hu nao tal Ga-da kuhria meng di tuk bruk mesruh gauk di Ixraen - Ha-mát tamuh tabiak di harei 07/10 saong ndom lac bruk daong ngak pahla daok hu ba tal Ga-da. Tổng thống Joe Biden jeng pok meyaom bruk daong di Ixraen piah ba jalan ka 2 con tin urang Mỹ hu peih palao. Dua gah hu ginum biai dom kham merat piah daong peih palao taong abih dom menuac urang njauk gah Ha-mát cap khik, dalam nan hu urang Mỹ saong peih tabiak jalan salamat ka urang Mỹ saong urang negar karei di  Ga-da meyah urang khin tabiak truh labik nan 

Tổng thống France Emmanuel Macron meda lac urang pan akaok phương Tây patui veik nao rivang I-xra-en di harei paguh (24/10) piah brei mboh bruk pachreih tui  taneh ia ini saong kham marat ngak pacadu veik bruk mesuh metak daok rahtabiak di rilo labik. Mintri Ngoại giao France jeng brei thau lac daok peih ngak siam di abih dom kham marat di gah langiu piah palao dom urang daok cap khik medil lac njauk kapul Ha-mát cap khik. Tổng thống France Macron jeng lac urang pan akaok phương Tây patui veik, hadei di Tổng thống Mỹ Joe Biden atau Thủ tướng dom taneh ia Đức, Anh, Italia mai tal Israel piah brei mboh bruk pachreih tui duh ka Israel.

Mbang pandiak khang abih daok nao tapa bhum gah barak saong gah pai Braxin ngak ka mbaok ia di dom kraong pak nan trun biar, ngak klaih klaoh khang bruk ngak di dom sang mac dalam labik pablei salih tự do Manaus daok di pasak glai nhiệt đới Amazon. Labik pablei salih tự do Manaus – praong abih  di Brazil – dalam nan hu sa labik ngak kong, sa pasak blei pandap miễn thuế saong sa labik cakrok ngak nong, haong raong glang. Pandiak bhang ngak kan kandah khang tal bruk ngak yaok harei di dom Cty công nghệ glaong dalam bhum. Tui kuhria, hu 70 tal 80% dom pandap panda pajeng ba dalam bilan 10 saong bilan 11 tal meda njauk klaih klaoh.