Hoi An taduan tuai dalam thun du lich biak hajao mekre 

Melam ini, di ban Hội An, tỉnh Quảng Nam, hu bruk peih pakah Thun Du lịch pakat negara - Quảng Nam 2022 ngan haong asal kadha “Quảng Nam – labik mai Du lịch hijao”. Thun du lịch dalam taneh ia lac tuk piah ka Quảng Nam yaih khan thaot bingu, dom yaom glaong ilamo maong mboh, ilamo oh maong mboh, tài nguyên saong pandap panda du lịch siam ghieh; patagok bruk pachrieh ngak, pambuak gauk cak rok patagok du lịch di dom tinh, ban, paglaong labik dang, thaot bingu di taneh ia, anek menuac VN jeng yau anek menuac tỉnh Quảng Nam,  jhul patagok veik gah du lịch gaok kan kandah biak trak damak kayua jit ruak Covid-19.

Peih ngak danak dak “Mẹ đỡ đầu” kayua Kapul urang kumei VN pakat negar ba tabiak, tukvak tapa, dom pakat kapul urang kumei dalam tỉnh Bạc Liêu hu taduan iek glang, daong raong jaik 60 uraniah metui kayua jit praong COVID-19. Gam haong nan, iek tui bruk dalam sang di yaok adei, dom pakat kapul urang kumei daok hu jak ba dom kapul nyaom, menuac urang alin hadiah sổ tiết kiệm, jien bac, pandap mbang menyum, jak ba ramik ngak pasiam sang danaoh….gam haong nan, bhian nao ravang, pachreih ba, daong ka dom adei di tuk lễ Tết, atau tuk gaok kan kandah bahrau…

Urak ini, urang nong daok di dom tỉnh ban dalam bhum Nam bộ daok tame bilan yuak padai vụ đông xuân 2021-2022. Cục Pala drak (di Mintri ngak nong saong patagok palei pala) taong yaom, ini lac bilan pala hu năng suất siam, min kayua jien buh tame pala drak, pah manuac ngak tagok yaom… ngak ka jien laba di urang ngak padai trun daok takik. Piah khik ka bilan pala drak ini mek hu laba glaong, Cục pala drak hu panuac kakei dom tinh, ban njauk pataom tame pato tacei jalan, rami ramik tukvak trun pajaih ka nyu lagaih, oh ngak kan kandah tal bruk pala drak bilan thu đông saong vụ mùa 2022, ba tabiak tukvak pala drak cambaih laih ngan haong dom bhum sinh thái, pilih ruah pajaih ka nyu lagaih. Gam tui di nan, njauk jhul samar bruk salih janih phun pala di mblang taneh ngak padai tapa pala phun karei saong raong kaya ikan hu kein laba glaong jang.

Kayua darak pasar pablei tabiak negar langiu saong bruk pablei tabiak gaok kan kandah nan ye urak ini urang pala thanh long di tỉnh Long An saong Tiền Giang brei kaoh klaak phun thanh long piah salih tapa pala dom jnaih phun karei. Tui UBND tỉnh Tiền Giang dalam danak dak “Patagok phun thanh long di tỉnh Tiền Giang tal thun 2025” tui quy hoạch lac 9.000ha. Min urak ini, taneh pala  thanh long di tỉnh rilo jang taneh pala di danak dak lac labaih 700ha. Urak ini, gah chức năng daok hu jalan ngak piah daong ka rahra khik veik bein thanh long saong salih tapa pala thanh long ilamu glaong piah patagok chất lượng baoh thanh long, piah palagaih ka bruk pablei tabiak.

Hu duah mboh makna di bruk anek rieng metai biak rilo di tỉnh Cà Mau. Dhar Roh duah kaya ikan Nam Sông Hậu brei thau, arieng ruak metai rilo di Cà Mau kayua ký sinh trùng giáp xác takei tơ praong tagok saong ấu trùng di ký sinh trùng daok diuk dalam rup anek rieng, njom tame  gan, baoh hatai di arieng. Urak ini langik pandiak dui atah ngak ka nhiệt độ saong độ mbak tagok glaong, nyu pambak tal labik raong hadang, arieng, meda ngak brei khat lahik rilo jang ka urang raong, dalam tuk nan ka oh hu jru taong ruak ka ruak ini. Kayua yau nan y, Sở ngak nong saong patagok palei pala tỉnh Cà Mau kakei mikva raong hadang, arieng njauk tui iek langik tasik, jit ruak piah pambuak haong dom jabat chuyên môn, piah samar langyah ngak pasiam, patakik dom khat lahik.

Mintri Y tế, Lao động saong Phúc lợi Japon tabiak bruk brei klauk mbang vaccine pacang COVID-19 ka 4 piah patagok prein pacang, plaih jit ka rahra.  Min mbiah tal tukvak ini, gah chức năng jeng oa ka tabiak tukvak saong menuac halei hu klauk mbang ka 4. Mboh lac, Japon meda pandar vaccine pacang COVID-19 di hãng Pfizer atau Moderna piah klauk mbang ka 4, kayua lac dahlau di nan, Rajaei Japon brei blei pabak 145 triệu mbang vaccine di dua hãng này. Langiu di Japon, Israel haong Vương quốc Anh jeng hu panuac pachreih klauk vaccine mbang ka 4, min brei klauk ka dom urang ngak bruk y tế saong dom menuac mbuan njauk ruak trak.

Rajaei Mỹ meda peih viek bruk oh kak je ngan haong 352 pandap panda blei meng Trung Quốc. Dom pandap panda ini njauk Mỹ mek jien je camriep di thun 2018 ala jamar di rajaei Tổng thống Mỹ dahlau dieh, ong Donald Trump tuk bruk  pablei salih di Mỹ saong Trung Quốc daok catang tagok. dalam 352 pandap panda hu peih viek bruk oh kak je, hu rilo janih, yau ye pandap pandar, linh kiện màn hình TV tal kadung bak, radaih juak, patar…Bruk ini hu ba tabiak dalam tuk Mỹ daok dang anak bruk lạm phát glaong di abih.

Lac darak pasar blei ameh praong ka 2 di dunya tok dang hadei Trung Quốc,  Ấn Độ daok dang anak bruk srau kadau gah ngak pandap lakhah kayua yaom ameh gam gam tagok glaong. Rilo gu njauk klaak ngak lakhah di drei kayua sang gah kumei oh caga hu ginup dom ameh ngak pandap hồi môn. Gilang pariak khik piah di Ấn Độ brei thau lac, rilo urang Ấn Độ hu pandar ameh ngak drap ar ba nao padang piah mesraiy jien. Di rilo palei di Ấn Độ, urang daok pablei ameh tuk ameh tagok yaom piah pabak tame yaom jien khat meng ngak mbang pablei salih kayua jit praong Covid-19./.

Urang lang: Mousaphuong- Thu Thảo -26/3