Dom danak dak halain hatain hè pachreih hu labaih 90.000 urang halain hatain

Melam kabroi (7-8) Thành đoàn TPHCM hu peih bruk pataom iek veik dom danak dak halain hatain hè Ban raya thun 2022. Dom danak dak halain hatain hè hu peih tabiak meng harei 5-6 tal harei 7-8 pachreih hu labaih 90.000 urang halain hatain saong 112.598 urang hu mbaok tame di dom danak dak: Bilan hè hijao, Daong prein bilan pacacah, Hoa phượng đỏ, Kỳ nghỉ hồng, Hành quân xanh saong gru pato ao hijao. Gam haong nan, Thành đoàn TPHCM jeng hu taduan 71 sinh viên halain hatain dunya Malaysia di Kapul Sinh viên halain hatain dunya hu mbaok tame saong hu taa 28 urang halain hatain lac sinh viên Lào daok bac magru di TPHCM gam hu mbaok tame. Dalam danak dak bilan hè, hu 522 urang đoàn naih jjoi hu ba tame Đảng.

Bình Dương daok ba tabiak rilo sarak piah dui pachreih bác sĩ mai tỉnh ngak bruk. Tui nan, ngan saong tiến sĩ, bác sĩ chuyên khoa pakat II, bác sĩ nội trú hu mbang chip 600 triệu đồng; thạc sĩ, bác sĩ chuyên khoa pakat I lac 500 triệu đồng; bác sĩ đa khoa, bác sĩ răng hàm mặt bac tamat meng naih joi tagok lac 450 triệu đồng, bac tamat tanut khá lac 420 triệu đồng saong tamat trung bình, trung bình khá lac 400 triệu đồng. Langiu di nan, dom bác sĩ daok hu daong jien pah sang yaok bilan meng 2 tal 3,5 mbang yaom jien bilan cơ sở saong dom bruk daong brei karei karei. 

Gah y tế Tiền Giang bahrau hu Viện Vệ sinh dịch tễ Trung ương parabha veik jaik 120.000 mbang vắc xin pacang caga Covid-19 janih Pfizer. Dom vaccine ini hu pandar piah peih bruk klauk mbang cơ bản, mbang pabak veik ka dom urang meng umo 12 thun tagok. Urak ini dom tinh, ban daok pasang iek, yaok pataom dom urang hu mbaoh tangin tame klauk vaccine, oh caik ka bhap bini nao klauk jru bo kurang vaccine.

Urak ini, ikan pra pablei tabiak negar langiu tagok jaik 77%, lac hu tal 1,4 tỉ USD dalam 6 bilan akaok thun. Yaom lac ikan pra pablei tabiak negar langiu tagok, min urang raong oh hu laba. Tui dom urang dang akaok dom doanh nghiệp pablei ikan pra tabiak negar langiu di bhum ĐBSCL, makna lac kayua phun jien buh tame raong tagok glaong, urak ini, daok di tanut meng 25.000 - 27.000 đồng/kg ikan tamo. Yaom phun daok biak glaong ngak ka rilo urang raong daok padeih raong.

Pambuak tal bruk 8 sinh viên njauk jru mek kayua manyum alak oh thau cambaih asal di nyu, rahtabiak di phường Phước Long B, ban Thủ Đức, TP.HCM di melam 4/8 ngak ka 2 urang metai, 6 urang karei njauk tame sang iek ruak cấp cứu. Tal urak ini 2 urang jeng daok suak yava meng jamraik, halang darah di Khoa Hồi sức tích cực chống độc – Sang iek ruak Bhap bini Gia Định TP.HCM, dalam nan hu 1 urang daok biak trak mbuan metai. 2 urang karei daok hu tui iek, taong ruak di Khoa Nội tiết-Thận. 2 urang daok veik hu prein yava tani tanat, meda tabiak truh sang iek ruak dalam dom harei anak tal.

Dom gah chức năng Cuba jeng daok duah jalan pacang khuah di labik caik xang menyek di tỉnh Matanzas meng bruk daong di 2 taneh ia lac Mexico, Venezuela. Labik caik xang menyek ini lac pataom saong pajeng ba menyek ka rilo sang mac nhiệt điện di Cuba. Dahlau di nan, tuk melam 5/8, 1 dalam 8 danao caik menyek tamo dalam labik ngak kong jaik ban Matanzas njauk cakala klaak ba tal khuah praong. Pui khuah hadei di nan pambak tapa danao ka 2 saong ngak brei patuh. Hu 1 urang metai, 17 lin padam pui lahik saong 121 urang njauk rambus. Jaik 5 rabau menuac hu ba nao tal dom labik siam mekre, salamat.

Thượng viện Mỹ, urak ini kayua đảng Dân chủ pasang iek, harei kabroi (7/8) hu brei tapa hukum hu yaom 430 tỷ đô la piah pacang caga haong bruk biến đổi khí hậu, trun yaom jien jru tavao, gam haong nan brei tagok yaom kak je ngan haong dom tập đoàn di taneh ia ini. Ini hu maong lac sa jayah ngan haong Tổng thống Joe Biden saong caong lac meda daong ka đảng Dân chủ hu jalan piah khik tani tanat bruk pasang iek Quốc hội dalam mbang pilih ruah di kreih thun ini.

Labaih 30 rahra metai saong 16 urang karei njauk rambus dalam mbang taong tame di kol phiến quân saong dân quân di gah timur Cộng hòa Dân chủ Congo di harei 6/8 meng bloh. Urang jakar pak nan, hu panuac lac gah Dân chủ Đồng minh lac gah taong tame. Kol ini bhian taong tame pametai yaok rabau rahra di gah timur Cộng hòa Dân chủ Congo saong taneh ia jaik tapen lac Uganda kuhria meng thun 2014 tal urak ini./.

Urang lang: M. Phuong & Thu Thao – 08/08