Ginum biai di hoi truong ka bruk buh jien tame padang ngak jalan nduac samar Bắc - Nam gah pai labik Gia Nghĩa (Đắk Nông) - Chơn Thành (Bình Phước), dom urang Quốc hội hu panuac ieu brei adat ka danak dak hu pandar dom sarak karei piah mek kaya pandap ngak pandap padang ngak. Gam haong nan, ieu brei kuhri kuhria kadung jien kanja, rami ramik ginup phun jien piah peih ngak danak dak tui njauk jalan ba tabiak meda ngak salah di puac thun 2026. Ini lac jalan hu makna praong, pambuak bhum Tây Nguyên saong bhum Đông Nam Bộ, bhum Tây Nam Bộ saong TP. Hồ Chí Minh. Atah abih tih 128 km. Phun jien buh tame abih tih tuk camriep lac 25 ribau 540 tỉ đồng.

Meng akaok thun tal ini, jit ruak athur raong, menuk ada tamuh tabiak praong di rilo labik dalam taneh ia, mbuan ba tal bruk jit ruak tagok khang, ngak patrun bruk pabak ralow mbang. Nan ye Thủ tướng Rajaei hu harak ieu dom tỉnh pataom tame ngak khang, ngak samu gauk dom bruk pacang caga jit ruak athur raong, menuk ada. Akaok UBND dom tỉnh, thành taduan trách nhiệm anak Thủ tướng meyah caik rah tabiak jit ruak athur raong, menuk ada di labik praong, ngak khat lahik praong dalam tỉnh di drei.

Urak ini gah raong glang, taong mek kaya tasik di huyện Bình Đại, tỉnh Bến Tre mek hu tanut tagok glaong. Abih di nyu nan lac bruk raong nghêu pablei ralaow hu mbuan lagaih, daong ka urang ngak nong tani tanat raidiuk. Urak ini mblang taneh raong nghêu di huyện lac labaih 3.100 ha. Dalam 6 bilan tapa, dom kaya tasik mek hu labaih 10.600 tấn jien mek tame hu labaih 59 tỷ đồng. Meng ngak dom jalan pacang caga  njom mbak hu siam lagaih, jalan pablei tabiak hu mbuan lagaih ngan haong yaom tui kuhria lac labaih 30 ribau dong sa kg, nan ye bruk raong ngheu hu laba glaong, ba bruk ngak ka yaok ribau urang.

Pambuak tal bruk padai metai jaik labik padang ngak jalan cao tốc Bắc - Nam di tỉnh Hậu Giang, Mintri ngak nong saong patagok palei pala bahrau hu harak pathau tagok Thủ tướng ka bruk taong yaom cuah tasik mek ngak pandap lam mbaok haluk ngak jalan ini. Tapa dut iek độ mbak ia dalam hamu di 9 sang (taneh ngak padai praong labaih 3ha) daok di 2 gah ngak jalan mboh lac, nồng độ mbak di mblang hamu hu padai matai lac 2,5‰. Nan ye Mintri NN-PTNT hu panuac likau Thủ tướng tacei pato Mintri GTVT pandar dom gah padang ngak jalan oh caik ka ia njom mbak di dom labik padang ngak jalan sraiy tabiak labik vil val nan, ngak kan tal bruk ngak nong.

3 urang di sa baoh sang daok pak An Giang hu rahra duah mboh tuk metai bloh, kong an brei thau makna tuk camriep medil lac kayua điện giật. Dahlau di nan, di jala pandiak harei 16/6, saai Lê Thị Tuyết Loan (daok pak xã Ô Long Vĩ, huyện Châu Phú) nao tabiak gah likuk sang Ngô Văn Hùng ye mboh Ngô Văn Vũ Linh (anek di Hùng) ndih gidang. Tuk saai Loan tame sang saai Hùng ye mboh saai Hùng, haong diuk jeng metai blaoh. Tapa pasang iek labik rahtabiak bala saong rup tau di urang metai, makna tuk cameriep hu brei thau lac medil kayua điện giật. Bruk ini daok hu Công an huyện Châu Phú pambuak haong dom jabat nghiệp vụ Công an tỉnh daok pasang iek, ngak cambaih laih bruk ini.

Thủ tướng Hàn Quốc Han Duck-soo hu panuac ieu dom bác sỹ klaak bruk đình công dalam adit ini kayua ini lac sa bruk meda ngak brei catang jang bruk daok catang tagok dom bilan tapa di rajaei haong gah y tế. Thủ tướng Han Duck-soo ndom lac, yaom lac hu panuac ieu di dom urang ruak, ieu dom y bác sỹ padeih bruk đình công, dom urang ngak gah y te jeng oh caik hatai tal. Ini lac bruk caik veik pandik harao praong ka menuac sia Hàn Quốc. Thủ tướng Hàn Quốc ndom veik lac, rajaei oh xử phạt dom bác sỹ thực tập mai ngak bruk veik saong halan hatian ginum biai haong dom urang ngak gah y te.

Tui Tân Hoa xã, dah page harei 16/6 (tui maong pak ini), sa bala biak pandik harao rahtabiak ngak brei 8 urang metai kayua kan suak yava gar dalam radaih laar caik pandap pak tỉnh Hà Nam, gah kreih negar Trung Quốc. Dom urang njauk bala ngak suan adat salamat tuk daok dalam khoang caik lar di radaih tuk daok peih nduac. Dom urang njauk bala hu duah mboh dalam tuk var drei jan tuk radaih nan padeih di sa bilai nyuk xang di ban sit Hồng Trang Dương, huyện Diệp, ban Bình Đỉnh Sơn. Yaom lac hu dom menuac di kapul y tế abih drei daong, min taong abih 8 urang nan jeng oh tapa truh. Makna di bruk ini jeng daok hu pasang iek ngak brei cambaih laih.

Khuah glai khang di gah Tây Bắc ban Los Angeles (dalam bang California, Mỹ) ngak brei ralai lahik labaih 4.800 hécta saong ba tal bruk labaih 1.000 urang njauk plaih nao daok di labik karei. Hu 400 lin padam pui, 70 radaih padam pui saong 2 máy ủi hu ba mai padam pui khuah ini. Min langik pandiak saong ngin khang daok ngak kan tal bruk padam khuah. Kuhria tal jhung harei 16/6, gah padam pui bahrau pacang hu 2% mbaok taneh khuah. Pui daok mbang nao gah Đông Nam, pamaong tal Danao Pyramid. Jaik 1.200 menuac hu ba tabiak truh labik me-in sambai giải trí Hungry Valley, piah khik kajap siam mekre salamat./.