Tuk mboh ruak pandiak tabiak darah, bhap bini nao tal labik y tế iek ruak

Sở Dulich tỉnh Bà Rịa - Vũng Tàu brei thau, dalam bilan 6, tỉnh taduan labaih 1 trieu 3 rituh rabau mbang tuai, jien mek tame labaih 1.300 tỉ đồng. Ini lac bruk biak siam peih mbaok ka bilan dulich hè. Bilan 7, tui kuhria, bruk rivang ma-in padeih padei di Bà Rịa - Vũng Tàu tagok glong. Urak ini, dom labik rivang dulich praong di Vũng Tàu, Xuyên Mộc, Côn Đảo…rilo khách sạn, resort jaik tasik abih bilik tal abih bilan 8.

Meng akaok thun tal ni, tỉnh Tiền Giang hu jiak 2.500 urang ruak pandiak tabiak dadah (SXH), hu 3 urang metai. Dalam 3 urang metai ni, hu sa urang prong song 2 uranaih. Dalam tỉnh hu labaih 600 sruh jit pandiak tabiak darah song hu langyah bloh. Gah y tế tỉnh Tiền Giang hu panuac kakei, bhap bini jhui iek lap anak bruk jit ruak pandiak tabiak darah daok tamuh tabiak, kuhria gam urang prong jeng meda njauk ruak song metai. Tuk mboh ruak pandiak tabiak darah, bhap bini nao tal labik y tế iek ruak, jhui iek lap, jhui eng drei blei jru mai tong ruak di sang, biak mbuan ngak ka ruak trak jang, kan si tong ruak.

Tui Mban tacei jalan Pacang caga bala meng langik tasik saong Duah daong urang gaok bala tỉnh Bình Thuận brei thau, dalam dom harei tapa, labik tapen tasik di tỉnh hu hangin Tây Nam khang ngak ka riyak tasik glong, ngak brei glut jaleih trak rilo labik tapen tasik dalam tỉnh. Tui duah thau, kayua hangin khang, riyak praong gam ia ndik ngak ka labaih 500 met labik takai tasik di phường Thanh Hải, Ban Phan Thiết glut jaleih trak. Urak ini, hu sa baoh sang jaleih abih, rilo baoh sang karei khut tayak, tui kuhria khat lahik yaok rituh trieu dong.

Labaih 3 bilan jiak di ni, yaom patei xiêm song liya di huyện U Minh Thượng, Kiên Giang laik yaom khang, dok 2.000 đồng/sa tasi patei, duk haong dahlau daih lac meng 5.000 - 6.000 đồng/sa tasi; akaok liya hu tuk tagok tal 25.000 đồng/sa kg, Min, urak ni, dok meng 3.000 - 4.000 đồng/sa kg. Ong Phạm Duy Tân, Phó akaok jabat ngak nong song patagok palei pala huyện U Minh Thượng brei thau, patei song liya trun khang, kayua dahlau deih urang blei nao pablei tapa Campuchia, Min, urak ni Campuchia hu pala patei xiêm biak rilo, nan ye, oh dok pablei hu rilo. Urak ni, U Minh hu labaih 2.600 ha pala patei xiêm song labaih 1.000 ha liya.

Công an huyện Bảo Lâm (t.Lâm Đồng) pambuak saong dom jabat chức năng ngak bruk saong dom urang pambak tal bruk ngak urang karei njauk rambuac saong jak tah glai. Tui nan, harei 8/7/2022, ong Lê Văn Ba, daok di xã Lộc Phú, huyện Bảo Lâm mboh hu rilo phun thông di labik 438A tak trun yau nan ye khan brei UBND xã Lộc Phú saong Hạt Kiểm lâm huyện Bảo Lâm thau. Piah khik veik bruk nan, hadei di tuk khan blaoh, ong Ba mai veik labik nan thaok bingu meng phone tangin saong quay phim bruk jak tak kayau nan. Dalam tuk ong Lê Văn Ba daok quay phim - thaot binguk, klau urang pandar tamo cối taong ong jaoh tangin, cah talang bara saong barah akok. Dalam tuk duah thau labik nan, janat chức năng hu mboh rilo labik kol jak tak glai kuac lubang dar kayau thông hadei tuk tak trun piah padauk.

Harei 19/7, dom kapul urang lambaok meng jiak abih dom taneh ia châu Phi hu tal Rwanda, piah hu mbaok tame nyaom biai châu lục camereip abih ka bruk di dom labik khik ramik piah khik kajap harei hadei di boh taneh. Nyaom biai nan hu peih ngak dom bilan dahlau du tuk nyaom biai pakat glong ka đa dạng sinh học Liên hiệp quốc (COP15), tui kuhria hu peih tabiak di bilan 12 anak tal di Canada, dalam nan, dom urang pal akaok dunya hu duah jalan brei tapa hiệp ước njauk brei padeih meng lavik mai, piah khik ramik langik tasik anak bruk palai pajoa di anek menuac.

Dom urang birau njom COVID-19 di Hàn Quốc tagok labaih 73.000 mbang dalam harei 18/7 di tuk janih phụ di biến thể Omicron daok njom mbak samar dalam negar dalam tuk dom jalan pacang caga jit hu pacadu. Langiu di nan, hu 12 urang metai, tui nan, abih tih urang metai kayua COVID-19 di taneh ia tagok tal 24.765 mbang. Hàn Quốc hu urang birau njom COVID-19 tagok khang kuhria meng puac bilan 6 meng blaoh dalam tuk janih BA.5 di biến thể Omicron daok njom mbak samar dalam bilan padeih hè.

Takik di abih 20 urang metai, dalam nan jiak abih lac urang kamei song 30 urang karei lahik, hadei di tuk sa sruh gaiy pajeng 100 urang nyu takhuak di mangaok sa baoh krong di gah kreh negar Pakixstan. Tui urang pal akaok pak ni, sruh gaiy pakhuak tuk daok nao mbang likhah. Jiak 35 urang njuk hu mbaok song dong hu jiak 90 urang. Gah chức năng dok kham duah urang lahik, tui nan, dom urang metai meda hu rilo jang ./.

Urang lang: Bhumi & Hani Pha – 19/07