Meng akok thun mbiah tal ini, dalam negar hu 4 urang metai kayua ruak meruai gala saong 39 mbang urang ruak kayua athur kaik di 13 tỉnh. Abih di nyu nan lac, tukvak jaik ini, dom urang metai kayua ruak gala daok rah tabiak di dom tỉnh oh ka mboh urang halei metai. Ruak gala meda daok rah tabiak ngan hoang manuac dalam tukvak anak tal nan biak glong kayua tame bilan pandiak. Tui Cục Thú y, piah samar pasang iek  dom sruh jit ruak glong gala di athur, pacang caga  dom sruh jit ruak birau tamuh saong nyom mbak, dom tỉnh, ban brei pataom prein tame peih ngak  catang dom jalan pacang caga , pacang ruak gala tui bruk ba tabiak.

Piah langyah bruk menuac likau jien, likau mbang di dom canah 4 jalan, labik ngak bui, me-in sambai, UBND TP Hồ Chí Minh tabiak bruk pambuak gauk pataom veik uraniah, urang nao ban glai ban klo daok likau jien, urang njauk khik caga samar drah karei karei. Dalam nan, urang prein yava oh siam, lavang lavaih, mboh yau hu dom ruak njaom mbak atau ruak gah glo akaok, kapul ngak bruk brei ba nao tal dom sang iek ruak piah pasang iek, taong ruak. Daok dom menuac hu prein yava tani tanat, hu labik daok atau hu gauk gar, ye kapul ngak harak biên bản, jao ka gauk gar, ba dom urang nan tame angan khik iek di palei…

Tui  Mban Bangsa tỉnh An Giang, kuhria taong abih phun jien peih ngak suai lavik Danak dak pakat negar patagok kinh tế - xã hội bhum urang bangsa takik saong bhum ceik di An Giang dalam thun 2023 lac labaih 176 tỷ đồng. Yau nan min, urak ini bruk padang, pasang iek, mbaoh tangin dom bruk ngak di Danak dak, bruk peih brei jien tok hu 2%. Bruk peih ngak suai damuai lac kayua dom mentri, dom gah di T.Ư suai ba tabiak sarak tacei pato ngak, daok tavak kateik gauk, oh cambaic laic, oh njauk hasa jalan haong gauk...abih di nyu lac daok tavak tame bruk peih ngak pamblak 3 Danak dak pakat negar.

Labik du lịch Mũi Cà Mau, labik hu mốc tọa độ GPS-0001 – lac labik puac angaok mbaok haluk di taneh ia, bahrau hu UBND tỉnh Cà Mau brei rami ramik, dak padang veik. Hadei di tuk hu ba mai Bein pakat negar Mũi Cà Mau, labik du lịch hu pandar taong abih 42.000 ha taneh di bein. Ini lac labik ravang me-in dui pachreih hu rilo tuai abih tuk mai tal Cà Mau, ngan saong 328.000 mbang tuai tame ravang me-in di thun 2022. Labik ini dui pachreih tuai kayua lac labik hu tọa độ GPS-0001, lac labik puac di taneh ia, bo daok hu kraong ribaong, hu glai dauk ia mbak gheih mekre, du lịch sinh thái cakrok patagok.

Labaih 560 urang dalam labik tapen tasik di xã Đông Hải, huyện Duyên Hải, tỉnh Trà Vinh daok mbuan lahik abih kayua glut jaleih taneh. Urak ini, UB bhap bini xã Đông Hải likau brei  hu jalan paduan ba samar 49 baoh sang daok di labik tapen tasik, mbuan gaok bala; padang bruk panduan ba labaih 100 baoh sang tapen tasik jaik labik mbuan rah tabiak bruk glut jaleih. Langiu di nan, gah ngak nong brei ba tabiak bruk  padang ngak ar pacang ia tasik tame; khik caga phun pala saong raidiuk di bhap bini daok jaik labik mbuan rah tabiak bala.  

Mintri Pablei salih Hàn Quốc brei thau lac meda suak mek veik harak pathau Nhật Bản tagok Gah pablei salih dunya (WTO) hadei di tuk Nhật Bản klaak dom adat brei patakik bruk pablei tapa negar ini. Dua gah jeng njauk gauk brei ginum biai cambaih laih ka jalan pasiam veik adat pablei salih njauk caik hatai jia tame gauk. Dahlau di nan, thun 2019, Nhật Bản ba tabiak adat brei patakik pablei tapa Hàn Quốc 3 janih công nghệ glaong pabak ka bruk ngak  “chip bán dẫn” saong màn hình di Hàn Quốc. Nhật Bản jeng ba Hàn Quốc tabiak truh angan dom taneh ia hu daong patrun tal tanut biar di abih dom hạn chế gah pablei salih.

Rajaei Anh saong dom urang y te taneh ia ini birau njauk gauk thỏa thuận ka bruk jien bilan. Thỏa thuận ini hu iek lac bruk ngak salih birau hadei di rilo bilan rah tabiak bruk padeih ngak di dom y tá saong urang daong manuac ruak di  Dịch vụ y tế taneh ia (NHS) Anh. Yau nan min, urak ini oh ka thau cambiac laic dom urang karei di Dịch vụ y tế taneh ia yau dom bac si birau tame ngak bruk, amuk mbuai, hu taduan ginup quyen loi ka jien bilan atau oh. Urak ini, Mentri Y te  Anh saong dom công đoàn pambuak tal jeng oh ka ba tabiak panuac halei ka bruk nan.

Gah “di cư” dunya (IOM) brei thau dom bruk samar drah ka langik tasik yau ye pandiak bhang, ia dauk ia sua saong khuah glai tagok glaong di  bhum Sừng châu Phi lac makna ngak brei rilo menuac sia dom taneh ia dalam bhum njauk nao “di cư”, duah labik karei daok. Yaok pataom di jabat viện trợ brei mboh lac labaih 20 triệu menuac, daok dang anak bruk lahik an ninh biak trak damak dalam tuk pandiak bhang jhak di abih kuhria dalam 40 thun tapa daok palai pajoa bhum Sừng châu Phi. Anak bruk ini, Gah “di cư” dunya IOM hu panuac ieu dom taneh ia, bhum taneh, brei samar peih dom jalan ngak piah pacang caga haong bruk samar drah ka langik tasik saong bruk “di cư”./.