Baoh sang kathaot, jiak kan kathaot hu dong 40 triệu đồng

Meng di bilan 8 ni, boh sang kathaot, jiak kan kathaot hu dong 40 triệu đồng, piah padang sang dok bahrau, sang pasiam veik hu dong 20 triệu đồng/sa boh sang. Ni lac, asal kadha di Thông tư ka 01 di mintri padang ngak tacei pato peih bruk dong sang dok ka sang kan kathaot, sang jiak kan kathaot di dom huyện kan kathaot di danak dak pakat negar, patrun kan kathaot khang kajap tuk vak 2021-2025.

mBan tacei jalan danak dak pato pakai sap Khmer ka urang jakar, urang ngak bruk karja tỉnh Sóc Trăng bahrau peih dom tal pato sap Khmer thun 2022 brei ka 250 urang bac di Sang bac Pabak Ilamu Pali Trung cấp Nam Bộ (ban sit Sóc Trăng). Dom urang bac hu bac meng 4 tal 6 bilan, ngan saong labaih 400 mon bac. Hadei di tuk tamat mbang bac, mBan peih bruk brei peih pakacah saong brei harak chứng chỉ pakat negar. Ini lac dom tal bac daok dalam danak dak pato pakai sap Khmer ka urang jakar, urang ngak bruk karja dalam tỉnh Sóc Trăng.

Tui Sở ngak nong song patagok palei pala tỉnh Đồng Tháp, glut jaleih krong Tiền, krong Hậu dok rah tabiak di 19 xã, phường, ban sit di dom labik lac ban Cao Lãnh, Thanh Bình, Hồng Ngự, Lấp Vò song Hồng Ngự. Tui kuhria khat lahik labaih 4 tỷ đồng. Kuhria tal urak ni, abih tih jalan atah mbuan si glut jaleih di Đồng Tháp lac jiak 132km, jiak 6 ribau boh sang dok dalam labik mbuan si glut jaleih, njauk panduan ba nao labik dok siam mekre .

Pambuak tal bruk pacang caga tuk hu urang njauk ruak đậu mùa khỉ, Pasak pasang iek ruak kik TP.HCM (HCDC) brei thau, tal urak ini, Mintri Y tế oh ka hu sarak atau tacei pato halei ka bruk brei daok karei urang njauk ruak đậu mùa khỉ. Min HCDC hu panuac kakei urang njauk ruak brei daok karei di sang dalam 21 harei, lac tukvak dalam rup hu ruak saong urang ruak oh njauk nao daok karei di labik pataom praong. Urang ruak njauk nao tal Sang iek ruak Ruak nhiệt đới TP.HCM piah pasang iek saong taong ruak.

Gah cảnh sát điều tra, Công an huyện Đồng Phú, tỉnh Bình Phước hu khởi tố, cap kreik 3 bilan ngan song Trần Thanh Tú (ndih tapui thun 1999, dok di palei Đồng Tân, xã Tân Hòa, huyện Đồng Phú) piah duah thau ka bruk tong paoh, ngak pap anek. Tapa pasang iek tuk camereip, thun 2020, Trần Thanh Tú likhah haong Lầu Y Lầu, 2 duik pasang dok di palei Đồng Tân. Bilan 2/2022, Lầu taduan anek haong pasang dahlau di drei lac adei Và Y Dénh meng Nghệ An tame Bình Phước dok song gauk. Dalam tuk vak dok song gauk, mboh adei Y Dénh paleik pandap panda, nan ye, Tú song Lầu rilo mbang tong adei ba tal njauk rambuac. Tal harei 27/7, puk paga di sang Tú mboh angaok rup kamuan hu rilo laka, yau nan ye, hu thaot veik song ba tagok mạng xã hội facebook song khan ka Công an xã Tân Hòa thau.

Chủ tịch Trung Quốc Tập Cận Bình haong Tổng thống Mỹ Joe Biden bahrau hu mbang ndom biai nao mai tapa phone dui atah labaih 2 mon. Dua 2 urang dang akaok ini taong yaom bruk ndom biai nan, lac tapak saong dalam. Chủ tịch Tập Cận Bình brei thau, bruk lac talei rohim Trung-Mỹ maong tui gah meriak gauk praong, maong Trung Quốc lac gah cagar veik praong thách thức suai lavik trak damak di abih, lac bruk taong yaom suan ka talei pambuak bruk Trung-Mỹ saong iek suan ka bruk patagok di Trung Quốc, bruk ini meda ba tabiak tacei pato suan ka bhap bini 2 taneh ia saong menuac sia dunya.

Liên Hợp quốc hu panuac cagar veik dom bruk pagam tal bruk pandar vũ khí hạt nhân song hu panuac ieu pambuak veik bruk ginum biai oh hu hạt nhân di palao kaoh Triều Tiên dalam samar drah. Dahlau di nan, ngoại trưởng Hàn Quốc Park Jin jeng brei thau lac Triều Tiên meda dang anak dom bruk tong phạt khang jang, piah patrun prein tấn công khang, meyah Triều Tiên daok peih sa bruk cuh iek hạt nhân dalam tuk vak anak tal.

Takik di abih 16 urang metai saong 47 urang karei najuk rambus trak dalam bala jalan mbak biak khang tuk sa sruh radaih buýt laik trun daning patau di gah đông bắc Nicaragua di harei 28/7.Tui pathau khan di cảnh sát pak nan, sruh radaih buýt gaok bala kayua ndauc biak samar tapa tốc độ saong paoh tame 2 radaih karei nan ye laik trun daning ceik dalam labaih 80 m./.

Urang lang: Hani Pha & M. Phương – 29/07