Di mbang nyaom peih ngak di biar harei kabroi 14 bilan 4 di Mban tacei pato ka bruk pasalih birau veik, ramik veik bruk ngak di karja, Thu tuong Pham Minh Chinh caong khin dom mentri, dom gah, jabat, bhum palei brei ramik caga blaoh blai meng harei 1 bilan 7  anak tal piah bruk ngak tui jalan salih birau  di karja dua pakat hadei ramik, pataom tame. Thu tuong caong khin bruk ramik brei njauk tukvak, njauk bruk ba tabiak, njauk caik hatai tal bruk ramik pasak y te, sang bac saong khik brei lagaih ka bhap bini.

Meng hadei Tet Nguyen dan mbiah tal ini, yaom lasun tim katam di ban sit Duyen Hai, tinh Tra Vinh trun biak takik. Urak ini akaok lasun tim yaom meng 10.000- 20.000 dong sa kilo, trun meteh dut haong dom thun dahlau. Yaom lasun tim di trun biar ngak khat lahik biak ralo tal laba di urang pala. Anak bruk nan, karja palei pambuak haong dom don vi duah jalan  pablei hu tani tanat daong ka urang pala lasun duah laba tame.

Piah caga bruk njom ia mbak gam langik pandiak dalam bilan thun thun ini, dom po bein hu phun mang cut  brei baoh karei bilan di dom tinh, ban di  bhum taneran kraong Cuu Long brei buh khak, pruh ia saong caga ia dalam bein. Dalam nan, gah ngak nong  Cần Thơ pambuak haong dom So, dom gah saong karja palei tui iek duah thau tani tanat  langik tasik, hlau ia piah khan brei bhap bini jeng yau  karja dom pakat hu thau samar ka bruk pandiak bhang tua riya, njom ia mbak. Meng nan, piah samar pacang caga dahlau bruk pandiak bhang tua riya, kurang ia,  njom ia mbak.

Gah chuc nang daok khik brei rilo siam mekre piah ba 6 drei cim Sếu meng Thao cam vien Sai Gon nao tame Bein pakat negar Tràm Chim, huyen Tam Nong, tinh Dong Thap tui kuhria mboh dahlau lac harei 19/4 anak tal. Urak ini, dom bruk padang ngak piah duh ka Danak dak khik ramiksaong patagok Sếu akaok bhong hu ngak salah blaoh, khik brei ginup dom bruk lagaih piah ba Sếu njauk tui bruk ba tabiak. Dalam danak dak khik ramik cim Sếu meda pataom tame bruk raong Sếu  brei caik menek sang palao tame glai.

Di huyen Hàm Thuận Bắc, tỉnh Bình Thuận birau hu 1 urang metai kayua ruak gila asaw kaik. Dahlau di nan, urang ruak asaw kaik meng harei 8/2 min oh klauk jru caga ruak. Mbiah tal harei 9/4, urang ruak hu mboh glaih glar, pandik tarakong, oh pandiak, mbiah harei 10/4, ba tame Sang iek ruak Đa khoa tỉnh Bình Thuận. Tapa dut iek ruak dom bac si mboh ruak meruai. Urang ruak metai meng harei 11/4. Ini lac urang metai ka 4 kayua ruak sraw gila kaik  di tinh Binh Thuan kuhria meng akaok thun 2025 mbiah tal ini.

Bhap bini Campuchia yam tame thun birau dalam chreih chrai bui sambai, salamat. Tet bangsa thun ini di urang Campuchia hu peih ngak adat likau brei salamat siam mekre di baha klak Angkor Wat danei angan di gah Tay Bac Campuchia, ala tacei ba di patao Norodom Sihamoni. Rayo thun birau ini peih ngak meng harei 14 tal harei 16/4, hu dom bruk ngak ilamo biak gheih karei di dom tinh, ban dalam negar, lac sa bruk piah pachreih tuai damuai  dalam saong  langiu negar mai Campuchia.

Hadei 3 thun ginum biai, dom urang di Gah Y te dunya (WHO) hu njauk hatai  ka “sa kadha ba tabiak” hiep uoc dunya ka bruk pacang caga, sap pagap saong pacang jit ruak harei hadei. Bruk biai njauk gauk brei hu taong abih dom taneh ia brei tapa. Bruk njauk gauk camereip nan lac bruk hu makna biak praong, rik tame ngak brei salah  bruk pacang caga jit ruak praong pok tagok  Nyaom biai pakat Y te dunya jaik peih ngak di bilan 5 anak tal.

Cảnh sát Tay Ban Nha chap mek sa kapol pablei manuac bhian ba manuac di cu suan hukum meng Maroc tame chau Au tapa Romania. Dom urang di cu  ralo mai meng Maroc, hu ba nao meng kapal ahaok tapa Romania, hadei di nan tapa Tây Ban Nha yaok urang hu tabiak abih 3.000 Euro. Dalam 2 thun tapa, bruk ini peih ngak hu 50 mbang, kuhria abih tih ba manuac suan hukum meng 1.000 tal 2.500 urang tame Tay Ban Nha./.