Di paka 81, hu brei adat ka dom bruk pataom mek taneh kayua ngak suan hukum taneh riya. Dalam nan, klak saoh taneh ngak nong lac bruk ngak suan hukum, mayah urang pandar taneh ngak nong oh pandar taneh biak suai gam gam meda njauk pataom mek.

Tui Hiệp hội Njam patam baoh kraoh Việt Nam, 6 bilan akaok thun ini, thanh long pablei tapa negar langiu hu 292 triệu USD, tok dang hadei baoh durian. Ong Đặng Phúc Nguyên, Tổng thư ký Hiệp hội Njam patam baoh kraoh Việt Nam brei thau, thanh long Việt Nam hu pala di bhum hu pandiak rilo, nan ye biak yamen saong la-an bingi, abih di nyu lac thanh long ralow bhong. Nan ye labik dang di thanh long Việt Nam pablei tapa negar langiu hu rilo mbuan lagaih dalam bruk dang dhi 2, hadei di baoh durian. Urak ini, jaik abih dom darak pasar blei tame baoh thanh long langiu Trung Quốc jeng hu yaom tagok glaong, yau ye: Ấn Độ 21 triệu USD; Mỹ 18 triệu USD; Hàn Quốc 10 triệu USD…

Durain lac sa dalam dom janih baoh kayau angan je di tỉnh Bến Tre hu yaom pablei tabiak negar langiu glaong. Urak ini dalam tinh hu labaih 2.760 ha taneh pala durain, baoh tui kuhria mek hu jaik 24.200 tấn. Anak bruk khik ramik angan je, chat luong baoh durain di tỉnh Bến Tre pablei tapa darak pasa Trung Quốc, UBND tỉnh Bến Tre bahrau hu harak payua Mintri Ngoại giao ka bruk likau daong samar drah bruk khik angan chung nhan “durain Bến Tre” pak Trung Quốc ngan haong hatai caong, tinh samar drah padang quyen sở hữu trí tuệ ngan haong angan chung nhan “durain Bến Tre”, pacang cakak dom bruk ngak suan bhum labik “Bến Tre” ka baoh durain.

Dalam thun ini, tỉnh Cà Mau hu jalan daong pato bruk ngak ka urang ngak dalam umo ngak bruk, lac urang bangsa takik, urang bangsa Kinh sang kan kathaot, jaik si kan kathaot daok dalam dom huyện bhum urang bangsa takik, pandar ngak Danak dak pakat negar patagok kinh tế - xã hội bhum urang bangsa takik saong bhum ceik vaktu 2021-2030. Urak ini dom tal pato bruk ngak ka urang bangsa takik daok hu peih tabiak, dui pachreih hu biak rilo urang ngak tut angan tame bac bruk ngak, rik daong langyah tukvak daok saoh di adei sa-ai kumei bangsa takik dalam tỉnh.

Pasak kuhria mboh dahlau bruk magei baoh taneh saong kakei ka bala sóng thần - Viện Vật lý Địa cầu di Viện Hàn lâm Khoa học saong kong nghe Việt Nam hu pathau khan lac, dalam dah page ini (29/7), 17 mbang magei baoh taneh rahtabiak di huyện Kon Plông, tỉnh Kon Tum, ngan haong tanut khang 2.5 - 3.2, độ mbang dalam chấn tiêu labaih 8.1 km, pakat mbuan rahtabiak bala pakat 0. Dahlau di nan dalam harei kabroi, jeng di Kon Plông hu rahtabiak 21 bala magei baoh taneh khang meng 2.5 đến 5.0. langyah ka makna dom mbang magei baoh taneh rahtabiak yaok mbang, dom urang roh duah ilamo gah địa chấn brei thau lac, ini lac mbang magei baoh taneh pachreih, rahtabiak kayua bruk pataom ia samar drah di dom binek caik ia thuỷ điện di labik ini.

Bruk tranh cử di Phaok Tổng thống Mỹ Kamala Harris ieu pataom hu 200 triệu đôla Mỹ saong pilih ruah hu 170 rabau urang halan hatian pak di dalam adit camereip kuhria meng di tuk amuk hu pok ngak ứng cử viên Tổng thống đảng Dân chủ. Tapa dom mbang duah thau bahrau abih brei mboh, yaom lac ong Donald Trump, ứng cử viên Tổng thống đảng Cộng hoà daok khik labik dang anak amuk Kamala Harris, min atah di gauk oh hadom. Tapa nan brei mboh lac, bruk pakacah tame Nhà trắng thun 2024 hu rilo chreih chrai.

Rahra Nhật Bản trun thun ka 15 gam gam dalam tuk taneh ia daok rahtabiak bruk manek bier. Tui mintri Nội vụ Nhật Bản, kuhria tal harei 1/1/2024, negar ini hu labaih 124.885.000 rahra, trun labaih 531.700 urang, samu 0,42% dut saong sa thun dahlau di nan. Meng di tuk tame tabung glaong di thun 2009, rahra Nhật Bản rilo mbang mboh trun. Urak ini rai ranaih dak harei dak huac tok diuk tok pasang atau manek kayua kan kandah dalam raidiuk. Rahra Nhật Bản hu kuhria lac meda trun daok 87 triệu urang di thun 2070, dalam tuk nan, yaok 10 urang ye hu 4 urang dalam umo 65 thun tagok.

Mbang camereip abih sa tòa án di bang Victoria di Australia tabiak panuac mek caik guk 3 thun sa urang kamei kayua kateik greik anek kamei tok pasang. Urang kamei nan angan Sakina Muhammad Jan kateik greik anek kamei di drei umo 20 thun tok pasang di bilan 8/2019. 5 bilan hadei di tok pasang, urang anek kamei njauk pasang pametai. Bruk nan rah tabiak hadei di 6 thun sang asal Afghanistan mai daok di Australia saong hadei di 13 thun daok dalam trại tị nạn di Pakistan. Anek kamei njauk kateik greik tok pasang mbang camereip tuk umo 13 thun saong hadei di nan luai gauk. Yaom lac anek brei thau lac oh khin tok pasang mbang ka 2 haong urang hu amaik tacei, min urang amaik jeng kateik greik anek tok urang langiu di hatai caong khin./.